SGA gigil nang ilaglag ang T'wolves, isa na lang

ni Anthony E. Servinio @Sports | May 28, 2025

Photo: Nalusutan ni Shai Gilgeous-Alexander ng Oklahoma City Thunder sa pag-drayb ng bola si Anthony Edwards ng Minnesota Timberwolves sa yugtong ito ng kanilang laban sa NBA playoffs Game 4 ng West finals kahapon. (si.com.nba)

Pasado sa kanilang unang malaking pagsubok ang numero unong Oklahoma City Thunder at nilusutan ang Minnesota Timberwolves, 128-126 sa Game 4 ng 2025 NBA Western Conference Finals sa Target Center kahapon. Kumpara sa mga tambakan sa unang tatlong laro, hinintay ang huling segundo bago matiyak ang 3-1 lamang ng OKC sa seryeng best-of-seven. 

Inaalagaan ng Thunder ang 109-100 lamang at 6 na minuto ang nalalabi pero humabol ang Minnesota. Nagbanta ang Timberwolves sa dalawang free throw ni Naz Reid, 125-126 at binigyan agad ng foul ni Nickeil Alexander-Walker ang kanyang pinsan MVP Shai Gilgeous-Alexander na walang kabang ipinasok ang dalawa, 128-125, at 6 na segundo sa orasan.

Binigyan ng maagang foul ni Alex Caruso si Anthony Edwards upang mapigil ang posibleng 3-points at sa halip ay tumira ng free throw na may 4 na segundo pa.  Ipinasok ni Edwards ang una at sadyang minintis ang pangalawa pero nakuha ni SGA ang bola at ibinato ito palabas ng korte.

Pang-MVP talaga ang numero ni SGA na 40 puntos at 10 assist sa 40 minuto. Hindi malayo sina Jalen Williams na may 36 at Chet Holmgren na may 21.

Tatlong Minnesota ang may 20 o higit subalit hindi ito ang mga karaniwang inaasahan na sina NAW na may 23, Jaden McDaniels na may 22 at Donte DiVincenzo na may 21.  Pinili ang maling araw para umalat ang laro ni Edwards na may 16 at Julius Randle na lima lang. 

Maaaring wakasan na ng OKC ang serye sa kanilang tahanan Paycom Center sa Huwebes. Kung sakali, ito ang magiging pangalawang pagpasok ng koponan sa NBA Finals matapos ang 2012 kung saan lumuhod sila sa Miami Heat sa 5 laro.

Ayaw pawalis sa Pacers, Knicks nanaig sa Game 3

ni Anthony E. Servinio @Sports | May 28, 2025

Photo: Bumida si Karl-Anthony Towns para iligtas ang New York Knicks sa Game 3 para maiwasang mawalis ng Indiana Pacers sa NBA playoffs ng Eastern Conference finals. (sportingnews.com)

Nabuhayan ang kampanya ng bisitang New York Knicks matapos daigin ang Indiana Pacers, 106-100 sa Game 3 ng 2025 NBA Eastern Conference Finals kahapon sa Gainbridge Fieldhouse. Mahalaga na nagwagi ng isa ang Knicks dahil wala pang koponan sa kasaysayan ng liga ang umaahon sa 0-3.

Sa una, mukhang patungo ang Pacers sa 3-0 at bumanat ng 13 walang-sagot na puntos para itayo ang 55-35 lamang sa huling 3 minuto ng 2nd quarter. Hindi sumuko ang Knicks at humabol hanggang maagaw ang bentahe sa tres at three-point play ni Karl-Anthony Towns, 87-85 sa  8 minuto sa huling quarter. 

Nakabawi saglit ang Indiana pero binasag ng shoot ni Jalen Brunson ang huling tabla, 100-98 at sinundan ng dalawang free throw ni Josh Hart na may 20 segundong nalalabi, 102-98. Nagsilbing huling hirit ang buslo ni Tyrese Haliburton, 100-102 at mula roon ay tiniyak nina Brunson at Hart ang panalo sa tig-2 free throw sa huling 10 segundo. 

Mahina ang simula ni KAT pero bumomba ng 20 puntos sa huling quarter para magtapos na may 24 at 15 rebound. Sumunod si Brunson na may 23 habang may 16 si OG Anunoby. 

Nagtala ng 20 si Haliburton at nag-ambag ng 19 si Myles Turner at 17 kay Pascal Siakam. Ang Game 4 ay sa Miyerkules sa parehong palaruan at babalik sa New York City sa Biyernes para sa Game 5. 

Papasok ang Minnesota Timberwolves sa Game 4 ng Western Conference Finals ngayong Martes na todo ganado laban sa bisitang OKC Thunder. Nanalo ang Timberwolves sa Game 3, 143-101, para maiwasang mawalis sa serye. Kahit anong mangyari, ang 2025 NBA Finals ay magsisimula sa Hunyo 6 at itutuloy sa 9, 12 at 14.       

T'wolves gumanti sa Game 3 tinambakan ang OKC Thunder

ni Anthony E. Servinio @Sports | May 26, 2025

Photo: Ininumang nang i-shoot ni Jalen Williams ng Oklahoma City Thunder ang bola habang nakadepensa si Rudy Gobert ng Minnesota Timberwolves sa yugtong ito ng laban sa Game 3 ng Western conference finals ng 2025 NBA Playoffs sa Target Center kahapon. (Data Skrive) 

Umiwas na mapahiya ang Minnesota Timberwolves sa harap ng kanilang mga tagahanga at tinambakan ang bisitang Oklahoma City Thunder, 143-101, sa Game 3 ng 2025 NBA Western Conference Finals kahapon sa Target Center. Nakatulong ng malaki ang paglaro sa sariling tahanan at naitala ng Timberwolves ang unang panalo matapos bumagsak sa unang dalawa. 

Ipinasok ni OKC sentro Isaiah Hartenstein ang unang 4 puntos ng laro at mula roon ay puro Minnesota na ang lumikha ng ingay hanggang kunin ang unang quarter, 34-14, sa likod ng 16 ni Anthony Edwards. Hindi na nakaporma ang OKC at lalong lumaki ang agwat sa 129-84 bago ang huling 4 na minuto at tinatapos na ng mga reserba ang laro. 

Kahit hindi na naglaro sa huling quarter si Edwards, pinangunahan pa rin niya ang Timberwolves na may 30 puntos buhat sa limang tres sa 30 minutong paglalaro.  Bumawi si Julius Randle at nagtala ng 24 matapos gumawa ng 6 lang sa huling laro.

Ibinangko si Randle ni Coach Chris Finch sa huling quarter ng Game 2 noong Biyernes.  Hindi na pinalaki ang usapin at nanindigan si Randle na tanggap niya ang ginawa ng coach. 

Matapos magsabog ng kabuuang 69 sa unang 2 laro, 14 lang si MVP Shai Gilgeous-Alexander na kapantay ni reserba Ajay Mitchell.  Sumunod si Jalen Williams na may 13. 

Ang Game 4  ay ngayong Martes sa parehong palaruan. Dahil sa resulta, tiyak na may Game 5  sa Huwebes sa Paycom Center. 

Samantala, layunin ng rumaragasang Indiana Pacers na lalong ipitin ang New York Knicks sa Game 3 ng East Finals ngayong Lunes sa Gainbridge Fieldhouse. Malupit ang ipinakita ng Pacers sa tagumpay sa unang dalawang laro sa Madison Square Garden.