Mavs agaw-buhay sa bingit ng isang panalo ng Celtics

ni Anthony E. Servinio @Sports | June 18, 2024

Laro ngayong Martes – TD Garden

8:30 AM Dallas vs. Boston 

Hindi na kailangang tumingin sa malayo ang Boston Celtics at Dallas Mavericks sa kanilang kinalalagyan papasok ng Game 5 ng 2024 NBA Finals ngayong Martes sa TD Garden simula 8:30 ng umaga. Panalo lang ang kailangan ng Celtics upang itahi ang kanilang ika-18 na World Championship habang agaw-buhay ang Mavs na layunin maging unang NBA koponan na makaahon mula sa 0-3 sa seryeng best-of-seven. 

Noong nakaraang taon, nasa kabilang banda ang Boston at nalugmok sila ng 0-3 sa Eastern Conference Finals laban sa Miami Heat. Nagawang itabla ng Celtics ang serye sa 3-3 subalit nabitin sa Game Seven sa TD, 84-103. Sa panig ng Dallas, umarangkada sila ng 3-0 kontra sa Portland Trail Blazers sa Round 1 ng 2003 Playoffs. Bumangon ng Blazers at ipinilit ang Game 7 kung saan nanaig ang Mavs at maiwasang mapahiya sa sariling tahanan, 107-95.

Balik-2024 at determinado ang Boston na makaganti mula sa 122-84 tambakan na itinapal sa kanila noong Game 4 na pumutol din sa kanilang 10 sunod na tagumpay.  Mas malaking papel ang aasahan mula kay Jaylen Brown (20.8) at Jayson Tatum (20.0) na kahit nalimitahan ang opensa ay mataas pa rin ang kanilang numero sa serye. 

Mahalaga pa rin para kay Luka Doncic (29.5) at Kyrie Irving (21.0) na makahanap ng tulong mula sa mga kakampi. Maaaring makita ito kay PJ Washington (12.5) o Daniel Gafford (8.5) na abala rin na bantayan ang mga matatangkad ng Celtics. Kung magwawagi ang Mavs, ang Game Six ay nakatakda sa Biyernes sa American Airlines Center. Naka-reserba ang TD kung magkakaroon ng Game Seven sa Hunyo 24.  

Mahalaga si Irving sa Game 3 vs. Celtics

ni Anthony E. Servinio @Sports | June 13, 2024

Laro ngayong Huwebes – American Airlines Center

8:30 AM Boston vs. Dallas 

Hindi na kailangang lumayo ng Dallas Mavericks upang makahanap ng paraan na umahon mula sa 0-2 butas nila sa 2024 NBA Finals laban sa rumaragasang Boston Celtics. Nagawa na ito ng beteranong gwardiya Kyrie Irving at mahalaga ang papel na gagampanan niya sa Game 3 ng seryeng best-of-seven ngayong araw sa American Airlines Center simula 8:30 a.m.  

Noong 2016 Finals si Irving at koponan noon na Cleveland Cavaliers ay nabigo sa unang dalawang laro kontra Golden State Warriors. Naiwasan ng Cavs na mawalis sa Game 3 at kahit nadapa sa Game 4 ay nagawang kunin ang sunod na tatlo na tinuldukan ng Game 7 sa Oracle Arena para sa nag-iisang kampeonato ng prangkisa. 

Susubukan na ni Irving na maulit ang milagrong ginawa sa Mavs na umaasa na ang paglaro sa tahanan ay makakatulong ng malaki. Kahit umaapoy si Luka Doncic ng 31.0 puntos at 10.5 rebound sa serye, nalimitahan si Irving sa 14.5 puntos lang kaya dapat dagdagan ito.

Sa panig ng Celtics na nasa gitna ng siyam na sunod-sunod na panalo mula pa noong Mayo, ang pagtayo ng 3-0 bentahe ay halos katiyakan na at walang koponan sa NBA ang nakakabalik mula sa ganoong kalaking pagkalugmok. Perpekto pa rin sila ngayong playoffs at wala pang talo sa anim na laro bilang bisita. 

Limang Boston ang nagsusumite ng mahigit 10 puntos bawat laro na sina Jaylen Brown (21.5), Jrue Holiday (19.0), Jayson Tatum (17.0), Derrick White (16.5) at Kristaps Porzingis (16.0). Malaking tanong kung makakalaro si Porzingis matapos mapilay ang binti sa 3rd quarter ng Game 2. 

Wala itong kinalaman sa nauna niyang pilay noong Game 4 ng serye kontra Miami Heat noong Abril. Dahil dito, mahigit isang buwan siyang lumiban at naglaro muli noong Game 1 laban sa Mavs.  

Tatum at Brown ng Celtics nilikida ang Mavs, 2-0 na

ni Anthony E. Servinio @Sports | June 11, 2024

Laro sa Huwebes – American Airlines Center

8:30 AM Boston vs. Dallas

Naitakas ng paboritong Boston Celtics ang bisitang Dallas Mavericks, 105-98, sa Game 2 ng 2024 NBA Finals kahapon sa TD Garden. Hawak na ng Celtics ang 2-0 bentahe sa seryeng best-of-seven at nangangalahati na sa daan patungo sa una nilang kampeonato mula pa noong 2008. 

Determinado ang Mavs na makaagaw ng isang laro sa Boston at umarangkada sa maagang 13-6 lamang sa ipinagsamang 10 puntos nina Kyrie Irving at Luka Doncic. Biglang nagising ang Boston sa third quarter kung saan pinalawak nila ang 54-51 lamang sa halftime sa 83-74 salamat sa maaasahang tambalan “The Jays” nina Jayson Tatum at Jaylen Brown at tulong din ni Jrue Holiday.

Inalagaan ng Celtics ang bentahe at pagkakataon naman ni Derrick White na mag-ambag ng 8 puntos at walang pahinga sila ni Tatum sa buong 4th quarter upang mapigil ang mga tangkang lumapit ng Dallas. Natamasa ng Boston ang kanilang pinakamalaking agwat, 103-89, sa three-points at huling shoot ni White na may 3:34 nalalabi. 

Naagaw ni Holiday ang pansin sa kanyang 26 puntos at 11 rebound.  Sumunod si Brown na may 21 habang tig-18 sina Tatum at White at 12 si reserba Kristaps Porzingis. Nawalan ng saysay ang triple double ni Doncic na 32 puntos, 11 rebound at 11 assist.  Sinundan siya nina PJ Washington na may 17 at Irving na may 16 habang 13 si Daniel Gafford.

Malaking kabaligtaran at nakapalag ang Mavs kumpara sa Game 1 noong Biyernes kung saan maaga silang sumuko patungo sa 107-89 tambakan. Lilipat na ang serye sa American Airlines Center para sa Game 3 ngayong Huwebes at Game 4 sa Sabado. Kung magwawagi ang Mavs sa isa sa mga ito, ang Game 5 ay gaganapin sa Hunyo 18 sa TD Garden.