Gilas paalam sa gold medal tinalo ng China sa Asiad

by Anthony Servinio @Sports News | September 14, 2026

Photo: Gilas Pilipinas

Paalam gintong medalya. Binigo ng Tsina ang defending champion Gilas Pilipinas, 105-61, para wakasan ang kampanya ng mga Filipino sa Aichi-Nagoya Asian Games Men's Basketball sa Aichi International Arena.

Kinailangan ng mga Pinoy na manalo o kung hindi, huwag matalo ng mahigit 38 puntos. Umiwas ang mga Intsik sa komplikasyon at lumayo agad sa unang 10 minuto, 36-20.

Unti-unting lumaki ang agwat sa matalas na shooting ng Tsina - pasok ang 42 ng 82 tira o 51% kumpara sa 23/71 ng Gilas o 32%. Kontrolado rin ng mga Intsik ang rebound, 55-36, at assist, 24-18. Lumubog ang Pilipinas sa 1-2 at -17 ang kabuuang lamang. Nawalan ng bisa ang kanilang 109-78 tambakan sa Kazakhstan noong isang araw na pagbawi sa 85-89 talo sa Bahrain upang buksan ang torneo.

Tanging si Calvin Oftana ang gumawa para sa Gilas na may 13. Sumunod sina Sedrick Barefield na may 9 at Don Trollano na may 7 lang at nawala ang itinuturing na pinakamahalagang ginto para sa mga Pinoy.

Samantala, nanigurado ang Bahrain at dinurog ang Kazakhstan sa naunang laro, 101-78, at tumuloy sa quarterfinals. Halimaw muli si Jakarr Sampson na may 23 habang 20 si Mustafa Rashed para umunlad sa 2-1 at pangalawa sa Grupo C.

Parents ni Divine Adili dumating sa bansa, manonood ng 2 laro ng Ateneo

by Gerard Arce @Sports News | September 14, 2026

Photo: Ang mga magulang ng yumaong Ateneo player Divine Adili na sina Elias at Efeoma Adili nang dumating sa NAIA.

Mga laro bukas (Sept. 16) (MOA Arena)

3 pm – Ateneo vs UE

5:30 pm – La Salle vs UST

Dagdag motibasyon ang pag-aalayan ng mga laro ngayong UAAP Season 89 ng Ateneo de Manila Blue Eagles sa pagdating ng mga magulang ng yumaong dating student-athletes na si Divine Adili upang masilayan ang unang dalawang sabak ng koponan sa liga.

Dumating sa bansa nitong Linggo ng gabi sina Elias at Ifeoma Adili mula Nigeria upang ibigay ang ilang mga oras kasama ang Ateneo men’s basketball team, gayundin ang masilayan ang unibersidad ng anak, na matatandaang nalunod sa dagat bg Dipaculao, Aurora kasama ang incoming rookie na si Rene Baterbonia noong Hunyo 8.

Isa sa paraan upang maghilom ang masakit na alaala ng pagkawala ng dalawa ay nang mapatalsik at i-ban si dating head coach Tab Baldwin, habang pagbabawal kina Team Manager Epok Quimpo, at assistant coaches Reynado “Jon” Jacinto, Sandro Soriano, at Dean Castano sa mga aktibidad ng basketball team.

“Their arrival marks their first visit to the Philippines, and we are deeply grateful for the opportunity to have them with us and to spend time together in the days ahead,” ayon sa inilabas na statement ng Ateneo.

“Their visit carries special meaning for all of us. As the team begins a season dedicated to the memory of Divine and Rene Baterbonia, we are grateful that Divine’s parents can be here with the teammates, friends, and community who shared an important part of his life.”

Lalaro ang Ateneo bukas ng 3 p.m. sa ilalim ni head coach Louie Alas, kontra UE Red Warriors habang ang ikalawang laro ay sa Setyembre 26 sa parehong venue laban sa Adamson Soaring Falcons ng alas-12:00 ng tanghali.

Gilas Pilipinas ginulat ng Bahrain sa unang laro sa Asian Games

by Anthony Servinio @Sports News | September 9, 2026

Photo: Bagamat pumukol ng 31 puntos si Calvin Oftana ng 31 puntos ay di pa rin umubra ang Gilas Pilipinas laban sa Bahrain sa unang laro sa Asiad. (1xbet-krpix)

Laro ngayong Sabado -

Aichi 6:00 PM Pilipinas vs. Kazakhstan

Dumaan sa malalim na lubak ang kampanya ng Gilas Pilipinas sa 85-89 talo sa Bahrain sa Aichi-Nagoya Asian Games ngayong Biyernes sa Aichi International Arena.

Nalagay sa alanganin ang puntirya ng mga Pinoy na umulit bilang kampeon at kailangang manaig sa nalalabing dalawang laro sa Kazakhstan at Tsina. Kinapos ang huling tangkang humabol ng Gilas.

Pinangunahan nina Calvin Oftana at Adrian Nocum ang hataw ng mga Pinoy sa huling quarter subalit sinagot ito ng mga napapanahong shoot ng Bahrain.

Kontrolado ng mga mas matangkad na Bahraini ang laban at 49-43 lang ang lamang nila matapos ang dalawang quarter. Lalong umangat ang shooting at lumayo sila papasok sa huling quarter, 76-61.

Walang nakapigil kay dating NBA player Jakarr Sampson na double-double na 24 at 13 rebounds. Nag-ambag ng tig-20 sina Elijah Thomas at Mustafa Rashed. Ang huling isinama sa koponan at humabol lang sa Japan para palitan si Justin Brownlee, nagtala ng 31 puntos si Oftana mula sa siyam na tres.

Sumuporta si Nocum na may 14 habang 10 si Justine Baltazar. Sa isa pang laro sa Grupo C tinambakan ng Tsina ang Kazakhstan, 99-61. Hahanapin ng mga Intsik ang kanilang pangalawang panalo kontra sa Bahrain ngayong Sabado rin.

Nanguna sa Tsina sina sentro Yu Jiahao at gwardiya Pang Zhenglin na parehong may 17. Nagtala ng 11 si sentro Askar Maydekin habang 10 si forward Daniil Severgin.  

Ang Tsina ang huling umulit ng gintong medalya sa Doha 2006 at Guangzhou 2010. Kampeon ang Pilipinas sa unang apat na Asiad noong New Delhi 1951, Manila 1954, Tokyo 1958 at Jakarta 1962.