Spurs inilaglag ang OKC, finalist na vs. NY Knicks

ni Anthony E. Servinio @Sports | June 1, 2026

Photo: Nag-agawan sa rebounds sina San Antonio Spurs forward Victor Wembanyama (1) at Oklahoma City Thunder center Chet Holmgren (7) sa first half ng NBA basketball playoffs series kahapon. Swak na sa finals ang Spurs. (AP/Nate Billings)

Laro sa Huwebes - Frost Bank

8:30 AM NY vs. SA

Magkakaroon ng bagong NBA World Champion sa ika-walong sunod na taon.  Inalis ng bisitang San Antonio Spurs sa trono ang Oklahoma City Thunder, 111-103, sa winner-take-all Game 7 ng 2026 Western Conference Finals kahapon sa Paycom Center.

Tunay na pagmamay-ari ng Spurs ang laro at nakalasap ng lamang ang Thunder ng dalawang beses lang sa pangatlong quarter.  Huli ang 63-60 pero mag-isang bumira ng 8 puntos si Julian Champagnie upang maagaw ang bentahe at lumayo, 68-63.

Saglit pumalag OKC sa simula ng huling quarter, 82-84.  Iyan ang hudyat para kay Victor Wembanyama at Keldon Johnson na magtulungan upang lumayo muli, 97-86.

Pagkakataon ni kabayan Dylan Harper na nagpasikat sa nalalabing 8 minuto at bumanat ng 5 puntos para maging 107-95.  Sinubukang humirit pa ang Thunder na may 53 segundo pa,  103-109, ngunit hindi nila kakampi ang orasan.

Nagtapos na may 22 si Wemby at siya ang napiling MVP ng serye na may numerong 24.6 puntos at 10.9 rebounds bawat laro.  Sumunod sina Champagnie na may 20 at Stephon Castle na may 16.

Nagtala ng 35 si MVP Shai Gilgeous-Alexander.  Malaking bagay ang pagliban ni Jalen Williams dahil sa pilay at kinapos ang 17 ni Cason Wallace habang tig-12 ang mga reserba Alex Caruso at Jared McCain.

Uuwi na ang Spurs para salubungin ang Eastern Conference kampeon New York Knicks sa seryeng best-of-seven.  Sa Frost Bank Center gaganapin ang unang dalawang laro sa Hunyo 4 at 6 at lilipat sa Madison Square Garden sa 9 at 11.

Huling pumasok ang Knicks sa finals noong 1999 kung saan nanaig ang Spurs, 4-1.  Aabangan ngayon ang tapatan nina Gilas Pilipinas Jordan Clarkson at Harper para maging unang Filipino na may singsing ng kampeon sa NBA.

Finals na ang target ng Tropa at Gin Kings

ni Anthony E. Servinio @Sports | May 31, 2026

Photo: PBA PH

Laro ngayong Linggo - Ynares Antipolo

5:15 PM ROS vs. Ginebra

7:30 PM TNT vs. Meralco

Puntirya ng defending champion TNT Tropang 5G at Barangay Ginebra na makamit ang mga upuan sa finals ng 2026 PBA Commissioner's Cup ngayong Linggo sa Ynares Center Antipolo. Subalit gagawin ng Meralco Bolts at Rain Or Shine Elasto Painters ang lahat para ipilit ang Game 7.

Sumandal ang Gin Kings sa husay ng buong laro nina Best Player RJ Abarrientos at Justin Brownlee upang ipitin ang ROS, 111-104, noong Biyernes sa Araneta Coliseum. Bago noon ay nanaig ang Tropa sa Bolts, 103-95.

Nagtapos si Brownlee na may 32 habang 31 si Abarrientos. Sumuporta si Troy Rosario na may 16.

Pumuntos sina Abarrientos at Ralph Cu upang itayo ang pinakamalaking lamang ng Ginebra, 101-83, at 4 na minuto sa orasan. Sinubukang humabol ang E-Painters sa pangunguna ni Jhonard Clarito pero kinapos sila at napigil ito ng mga napapanahong tira nina Abarrientos, Cu at Rosario.

Kahit hawak ang 3-2 bentahe, pinaalala ni Coach Tim Cone na hindi sila nakatitiyak. Ginamit niyang isang halimbawa ang huling Commissioner's Cup finals laban sa TNT kung saan yumuko sila sa Game 6 at 7.

Nanguna sa ROS si Adrian Nocum na may 25 subalit hindi na siya pumuntos sa huling quarter. Sumunod sina Jaylen Johnson na may 22 at Clarito na nagpasok ng 12 ng kanyang 20 sa huling quarter.

Dela Rosa, Bernardino, Cacho at Clarin buo na sa World Cup

ni Anthony E. Servinio @Sports | May 31, 2026

Photo: Ang apat na bumubuo ng Gilas Pilipinas women sa pagsabak sa FIBA3x3 World Cup Warsaw 2026 mula bukas Hunyo 1 hanggang 7 sa Warsaw, Poland. (fibapix)

Napili na ang apat na magbubuo sa Gilas Pilipinas sa makasaysayang paglahok sa FIBA3x3 World Cup Warsaw 2026 mula Hunyo 1 to 7 sa Poland. Bitbit nina Kacey dela Rosa, Afril Bernardino, Mikka Cacho at Camille Clarin ang pag-asa ng bansa na lumapit sa Los Angeles 2028 Olympics.

Ito ang unang World Cup kung saan nakapasok ang mga Pinay sa pagdaan sa qualifier sa Singapore noong Abril. Nakalaro ang bansa sa 2018 edisyon bilang host sa Philippine Arena.

Nabunot sa Pool C, bubuksan ng Gilas ang torneo laban sa Latvia at Alemanya sa Hunyo 1. Susundan ito ng Tsina at Italya sa Hunyo 3.

Kailangang magtapos sa unang 3 puwesto upang tumuloy sa playoffs simula Hunyo 6. Noong 2018, nagtapos ang Pilipinas sa ika-17 sa 20 kalahok.

Mabigat ang nakasalalay sa balikat ni dela Rosa na numero unong manlalaro ng bansa. Malaking tulong si Bernardino na natatanging beterana mula 2018. Si Cacho ang kasalukuyang pangalawa kay dela Rosa habang ika-9 si Bernardino. Naghilom na ang tuhod ni Clarin at sumalang na siya sa dalawang yugto ng Women's Series ngayong Mayo.

Maliban sa World Cup ay pinaghahandaan ng Samahang Basketbol ng Pilipinas ang paglahok sa Aichi Nagoya Asian Games para sa mga edad 23 pababa. Nariyan din ang Youth Nations League kung saan nakataya ang tiket sa Under-23 World Cup.