Pagbomba sa MSU, maaaring simula ng pagsalakay — AFP

ni Angela Fernando - Trainee @News | December 3, 2023

Nagpahayag ang namumuno sa Philippine military nitong Linggo, Disyembre 3, na maaaring simula ng pagsalakay ang pambobombang nangyari sa gitna ng misa sa gymnasium ng Mindanao State University sa Marawi City bilang ganti sa mga serye ng operasyong militar laban sa tatlong grupo ng mga terorista.

Ayon kay Armed Forces of the Philippines (AFP) Chief of Staff General Romeo Brawner Jr., ang naganap na insidente ay nangyari 2 araw matapos tapusin ng mga puwersang Western Mindanao Command ang 11 miyembro ng teroristang grupong Dawlah Islamiyah, kasama ang kinikilalang emir na si Abdullah Sapal, sa Datu Hoffer Ampatuan, Maguindanao del Sur.

Sa ikalawa at hiwalay na operasyong militar ng Joint Task Force Orion, kanilang napatay ang namumuno sa Abu Sayyaf na si Mundi Sawadjaan, ang sinasabing utak ng pagbombang nangyari nu'ng taong 2020 sa bandang Jolo.

Isang ikatlong operasyon naman ang isinagawa ng 103rd Infantry Brigade sa Piyagapo, Lanao del Sur nu'ng Linggo na nagresulta rin sa pagkakapatay sa isa pang lider ng teroristang grupo.

Saad ni Brawner, maaaring 'retaliatory attack' ang nangyari sa MSU resulta ng mga nasabing operasyon sa Western Mindanao dito sa Maguindanao, sa Lanao at sa Basilan.

Samantala, patuloy ang mga awtoridad sa pagiimbestiga sa insidente upang mabigyang hustisya ang mga naging biktima ng pagsabog.

Pagbomba sa MSU Gym, kaduwagan - BARMM

ni Angela Fernando - Trainee @News | December 3, 2023

Inilarawan ng Bangsamoro Autonomous Region in Muslim Mindanao (BARMM) nitong Linggo, Disyembre 3, ang ginawang pagbomba sa gymnasium ng Mindanao State University (MSU) sa Marawi City na isang malinaw na kaduwagan. Nagpaabot din sila ng panawagan sa pamahalaan para sa mabilisang pag-abot ng katarungan at pagkakasakdal ng mga may sala.

Nagpahayag si BARMM Chief Minister Ahod B. Ebrahim ng labis na kalungkutan at pagkabahala sa naganap na pagbomba sa MSU na nagresulta sa pagkamatay ng maraming buhay.

Nagpaabot din si Ebrahim ng pakikiramay sa mga pamilya at kaibigan ng mga nasawi at sinabing inaalala niya ang mga biktimang naapektuhan at sugatan sa nangyari.

Umabot sa 11 tao ang namatay at marami ang sugatan matapos ang naganap na karumal-dumal na pambobomba sa Dimaporo Gymnasium.

Mariin ding kinondena ni Ebrahim ang nangyaring masahol at duwag na gawain at hiniritan naman ng BARMM ang mga awtoridad para sa mas malalim na imbestigasyon upang agarang panagutin ang mga may sala.

Peace-keeping volunteer, 1 pa pinagbabaril, todas

ni Angela Fernando - Trainee @News | October 24, 2023

Patay ang isang lalaki at isang peace-keeping volunteer matapos pagbabarilin ng grupo ng kalalakihan sa Sultan Mastura, Maguindanao del Norte, kahapon.

Kinilala ang mga biktima na sina Abdul Nor Benasing Palog at ang volunteer na si Tahiran Succor.

Ayon kay Sultan Mastura police chief Captain Elmar Elarcosa, bandang tanghali nang makita ng mga witness na pinagbabaril ng tatlong lalaki ang dalawa malapit sa bahay ni Palog.

Narekober ng pulisya ang 30 basyo ng bala mula sa iba't ibang kalibre ng baril.

Sa parehas na araw, dumating ang karagdagang pulis at sundalo sa Bangsamoro Autonomous Region in Muslim Mindanao (BARMM) upang paigtingin ang seguridad laban sa karahasan.

Nagmobilisa ng aabot sa 8,190 kawani ng Philippine National Police (PNP) sa iba't ibang lalawigan ng Muslim Mindanao.