Postponement ng BARMM Elections, urgent — PBBM

ni Mylene Alfonso @News | Jan. 30, 2025

File Photo: PBBM - BARMM - PCO

Kinumpirma ng Malacañang na sinertipikahang urgent ni Pangulong Ferdinand Marcos, Jr. ang panukalang nagpapaliban ng kauna-unahang BARMM Parliamentary Elections na nakatakda sa Oktubre 2025. 

Ito ay kasunod ng naging pahayag ni Senate President Francis 'Chiz' Escudero na sinertipikahang urgent ng Pangulo ang naturang panukala.

“This is confirmed,” wika ni Presidential Communications Office Acting Secretary Cesar Chavez. 

Ayon kay Chavez, lumiham ang Pangulo kay Escudero na sertipikahang urgent ang Senate Bill No. 2942 o "An Act Resetting the First Regular Elections in the Bangsamoro Autonomous Region in Muslim Mindanao, Amending for the Purpose Article XVI, Section 13 of Republic Act No. 11054, Otherwise known as the Organic Law for the Bangsamoro Autonomous Region in Muslim Mindanao, as amended".

Sinabi rin ni Escudero na target na maipasa ng Senado ang panukalang batas sa ikatlong pagbasa sa susunod na linggo.

Simbang Gabi, bantay-sarado sa PNP

ni Angela Fernando - Trainee @News | December 4, 2023

Nagpahayag ang Philippine National Police (PNP) nitong Lunes, na magpapalakas ng mga hakbangin para sa seguridad sa mga simbahan para sa dadating na Simbang Gabi sa Disyembre 16.

Sinigurado ito ng PNP matapos ang insidente ng pambobomba sa isang misa sa Dimaporo Gymnasium sa Mindanao State University (MSU) sa Marawi City na ikinasawi ng ilang tao.

Kinumpirma rin ni PNP spokesperson Jean Fajardo na iyon ang naging dahilan kung bakit nila paiigtingin ang seguridad sa mga simbahan.

Dagdag ni Fajardo, hihigpitan din nila ang kanilang pagbabantay sa mga kilalang establisyimento at mga tourist spots upang masiguro ang kaligtasan ng madla,

Matatandaang kamakailan ay may naganap na pagsabog sa gitna ng isang misa na dinaluhan ng mga estudyante at guro sa MSU Gym nu'ng umaga ng Linggo.

Bomb threat messages, kumalat bago ang pagpapasabog sa MSU — BARMM

ni Angela Fernando - Trainee @News | December 4, 2023

Kinumpirna ng pamahalaang Bangsamoro na may mga kumalat na mensaheng may banta ng pambobomba nu'ng gabi bago maganap ang mapaminsalang pagsabog sa Dimaporo Gymnasium ng Mindanao State University (MSU) sa Marawi City.

Ayon kay Bangsamoro Autonomous Region in Muslim Mindanao (BARMM) spokesperson Naguib Sinarimbo, may mga kumakalat nang mga mensahe nu'ng Sabado ngunit hindi nililinaw sa mensahe kung saan ito gagawin.

Aniya, kailangan talaga itong tingnan nang maigi para makita ang tunay na ugat ng pambobombang naganap.

Saad naman ni Sinarimbo, may mga ulat na nagsasabing ang Islamic State ang nasa likod ng pagsabog.

Agaran itong iniimbestigahan ng Armed Forces of the Philippines (AFP) kasabay ng pagtingin sa posibleng pagkakasangkot ng Dawlah Islamiyah-Maute Group sa atake na ikinasawi ng marami.

"Ang AFP ay nagba-validate ng mga pahayag ng ISIS sa mga kamakailang ulat pati na rin ang pagkakasangkot ng DI-Maute Group sa karumaldumal na gawang terorismo na ito," ani Colonel Xerxes Trinidad, pinuno ng tanggapan ng public affairs ng AFP.

Nagpahayag ang mga otoridad na nakilala na ang higit sa dalawang "persons of interest" sa likod ng pagsabog bukod sa dalawang grupong nabanggit.

“Meron kaming persons of interest and one of our persons of interest pointed on 'yung local terrorist,” ayon kay Bangsamoro Police Regional Office chief Police Brigadier General Allan Nobleza.

Dagdag ni Nobleza, kasalukuyan pang iniimbestigahan ang mga persons of interest at tumangging pangalanan ang mga ito upang hindi makaapekto sa imbestigasyon.