Pulis, binaril sa checkpoint

by Jeff Tumbado @News | September 17, 2026

Isang pulis ang sugatan matapos pagbabarilin ng hindi pa nakikilalang mga suspek ang isang security checkpoint sa Brgy. Kadingilan, Nabalawag, Special Geographic Area ng BARMM nitong Miyerkules.

Kinilala ang sugatang pulis na si Pat. Alfadz Umal ng Regional Mobile Force Battalion 14-A, na tinamaan sa kanang hita.

Ayon sa pulisya, itinatag ang checkpoint sa harap ng Kadingilan Barangay Hall bilang bahagi ng security operations matapos ang naunang engkuwentro sa pagitan ng mga armadong grupo na sinasabing konektado sa 118th at 105th Base Command ng Moro Islamic Liberation Front (MILF).

Alas-11:56 ng umaga, nakarinig ang mga pulis ng sunud-sunod na putok mula sa hindi pa matukoy na armas. Gumanti ng putok ang mga awtoridad bago umatras sa municipal police station nang humupa ang insidente.

Nag-deploy naman ng tropa ang 33rd Infantry Battalion ng Philippine Army upang tumulong sa pagpapanatili ng kapayapaan sa lugar.

4 patay, 19 sugatan sa BARMM Election

by Mervin Reyes/Mai Ancheta @News | September 15, 2026

Photo: Philippine National Police

Apat ang patay at hindi bababa sa 19 ang sugatan sa dalawang magkahiwalay na insidente ng karahasan sa Cotabato City ilang oras bago ang pagbubukas ng unang parliamentary elections ng Bangsamoro Autonomous Region in Muslim Mindanao (BARMM) nitong Lunes.

Sa Brgy. Bagua 2, pinaputukan umano ng mga hinihinalang supporter ng isang hindi pinangalanang kandidato ang isang grupo na kinabibilangan ni Brgy. Chairman Fahad Singh at ilang lokal na opisyal.

Tatlo ang nasawi sa pamamaril, kabilang ang dalawang kasama ni Singh. Sugatan din sa insidente si City Councilor Marouf Ayunan Pasawiran.

Samantala, isang lalaki ang nasawi sa pagsabog ng granada noong Linggo ng gabi sa Amirol Elementary School sa Brgy. Kalanganan Mother.

Ayon sa Cotabato City Police at mga lokal na awtoridad, umabot sa apat ang nasawi at 14 hanggang 19 ang sugatan sa dalawang insidente.

Iniuugnay ng mga residente at opisyal ang karahasan sa matinding tunggalian ng mga grupo sa pulitika bago ang halalan.

Pre-shaded na balota sa BARMM Elections, fake news — Comelec

by Mervin Reyes @News | September 13, 2026

Photo: File / Comelec

Pinabulaanan ng Commission on Elections (Comelec) ang kumakalat sa social media na mga pre-shaded na balota ang gagamitin sa kauna-unahang Bangsamoro Autonomous Region in Muslim Mindanao (BARMM) Parliamentary Elections sa Lunes, Setyembre 14.

Ayon sa poll body, fake news ang post mula sa account na “Mapag Matyag” na nagsasabing may mga balotang inihanda at shaded na umano ng mga kawani ng munisipyo o guro bago ang halalan.

Nilinaw ng Comelec na ang mga balota ay nakatago sa mga Office of the Municipal o City Treasurer sa BARMM, naka-vacuum seal at bubuksan lamang sa araw ng eleksiyon.

Hinimok din ng poll body ang publiko na i-report agad sa Command Center sa Alnor Hotel and Convention Center sa Cotabato City ang anumang problema sa mga na-deliver na balota.

Samantala, tiniyak ng Comelec na handa ang mga Automated Counting Machine (ACM) sakaling magkaroon ng power outage. May baterya umano ang bawat makina na kayang tumagal ng mahigit 14 oras.