#WalangPasok: Klase at gov’t offices, Setyembre 8

ni Lolet Abania | September 8, 2021

Suspendido ang klase sa ilang lugar sa bansa ngayong Miyerkules, Setyembre 8 dahil sa Severe Tropical Storm Jolina (Conson). Tinatayang nasa pitong beses nag-landfall si Jolina -- kung saan anim na beses bilang ganap na bagyo at isang severe tropical storm.

Narito ang ilan sa mga local government units (LGUs) na nagdeklarang walang pasok (online o face-to-face classes) sa kanilang lugar:

• San Juan City, Metro Manila – lahat ng levels (public at private)

• Batangas province – lahat ng levels (public at private)

• Cavite province – lahat ng levels (public at private)

• Laguna – lahat ng levels (public and private)

• Quezon province – lahat ng levels (public and private)

• Antipolo City, Rizal – lahat ng levels (public at private). Gayundin, ilang LGUs ang nag-anunsiyong suspendido ang kanilang government offices gaya ng Batangas, Laguna, Quezon Province.

Gayunman, ayon sa mga nabanggit na LGUs mananatiling operational ang kanilang health services, disaster response at iba pang kinakailangan serbisyo.

Samantala, nag-anunsiyo na rin ng kanselasyon ng kanilang klase sa Ateneo de Manila- pre-school, elementary, secondary levels at University of Santo Tomas - junior high school, Education high school, senior high school.

Patuloy naman na nagbibigay ng update ang iba pang LGUs hinggil sa suspensiyon ng klase at trabaho sa kanilang lugar dahil sa Severe Tropical Storm Jolina.

Gorio, posibleng maging bagyo sa loob ng 12 oras

ni Lolet Abania | August 4, 2021

Posibleng lumakas pa ang Tropical Depression Gorio at maging isang ganap na tropical storm sa susunod na 12 oras subali't hindi direktang makakaapekto ito sa lagay ng panahon sa bansa, ayon sa PAGASA ngayong Miyerkules.

Wala namang inilabas na tropical cyclone wind signal (TCWS) ang PAGASA, base sa ipinakikitang track forecast nito sa mga lugar sa bansa. Sa 11:00AM bulletin ng PAGASA, ang Southwest Monsoon o Habagat ay magdudulot ng bahagya hanggang sa malakas na pagbuhos ng ulan sa buong Ilocos Region, Cordillera Administrative Region, at ibang bahagi ng western section ng Central at Southern Luzon.

Ayon sa PAGASA, ang TD Gorio ay posibleng lumabas sa Philippine Area of Responsibility (PAR) sa Huwebes nang umaga. Nabuo ang TD Gorio mula sa isang Low Pressure Area (LPA) sa bahagi ng Philippine Sea nang alas-8:00 ng umaga ngayong Miyerkules at batay sa forecast track ng PAGASA, patuloy itong kumikilos ng silangan hilagang-silangan sa susunod na 12 oras habang patungong hilaga bahaging hilagang-silangan sa Huwebes nang umaga.

Batay sa datos ng ahensiya, alas-10:00 ng umaga ngayong Miyerkules, ang sentro ng Gorio ay tinatayang nasa 730 km hilagang-silangan ng Itbayat, Batanes, na may maximum sustained winds ng 45 km/h malapit sa sentro, may pabugsu-bugsong hangin na aabot sa 55 km/h, at central pressure ng 998 hPa. Kumikilos si Gorio sa silangan hilagang-silangan ng 20 km/h, na may malakas na bugso ng hangin o mas mataas pa na aabot ng 300 km mula sa sentro nito.

Metro Manila, binaha dahil kay Fabian

ni Lolet Abania | July 21, 2021

Lalo pang lumakas ang Bagyong Fabian habang ito ay dahan-dahang kumikilos patungong kanluran, ayon sa PAGASA ngayong Miyerkules. Sa alas-11:00 ng umagang forecast ng PAGASA, si ‘Fabian’ ay magdudulot ng malalakas na pagbuhos ng ulan sa buong bansa, habang wala namang inisyung Tropical Cyclone Wind Signal ang ahensiya.

Gayunman, ang Southwest Monsoon na pinalakas ng Bagyong Fabian at ng Tropical Storm Cempaka ay inaasahang magdadala ng mga pag-ulan sa buong Ilocos Region, Cordillera Administrative Region, Batanes, Babuyan Islands, Zambales, Bataan, Tarlac, Pampanga, Bulacan, Metro Manila, Cavite, Batangas, Occidental Mindoro, at ang hilagang bahagi ng Palawan, kabilang ang Calamian at Kalayaan Islands sa susunod na 24 oras.

Ilang lugar sa Metro Manila ang binaha ngayong Miyerkules nang umaga kasabay ng walang tigil na pagbuhos ng ulan dulot ng Southwest Monsoon. Ayon sa PAGASA, posibleng itaas sa Tropical Cyclone Wind Signal No. 1 ang buong Batanes at Babuyan Islands depende sa magiging galaw ng Bagyong Fabian sa maghapon.

Base naman sa alas-10:00 ng umagang update ng PAGASA, ang sentro ng Typhoon Fabian ay nasa layong 705 km silangan-hilagang-silangan ng Itbayat, Batanes.

Mayroon itong maximum sustained winds na 150 km/h malapit sa sentro, may pabugsu-bugsong hangin na aabot sa 185 km/h, at central pressure na 960 hPa. Kumikilos ito nang dahan-dahan pa-kanluran na may kasamang malakas na hangin o matinding pagbayo ng hangin na aabot sa 650 km mula sa sentro.

Inaasahang maalon hanggang sa malakas na alon ang mararanasan sa karagatan ng Batanes at Babuyan Islands, at ang western seaboard ng Palawan kabilang dito ang Kalayaan at Calamian Islands, at Occidental Mindoro kabilang dito ang Lubang Islands. Samantala, katamtaman hanggang sa maalon ang karagatan sa bahaging silangan at ang natitirang bahagi ng northern at western seaboards ng Luzon.

Ayon sa state weather bureau, kumikilos sa ngayon ang Bagyong Fabian pa-kanluran hanggang Huwebes nang gabi, kanluran hilagang-kanluran ng Biyernes nang umaga, habang patungo naman ng hilagang-kanluran ng Biyernes nang gabi. Lalabas ito ng Philippine Area of Responsibility sa Sabado nang umaga. Iniulat pa ng PAGASA na ang pag-landfall sa buong mainland China ng Bagyong Fabian ay tuluyang pag-alis nito sa bansa sa Linggo.

#FabianPH