3 patay, 1 nawawala, 2 nasaktan dahil sa Bagyong Agaton — NDRRMC

ni Lolet Abania | April 11, 2022

Tatlo ang iniulat na nasawi, isa ang nawawala, habang dalawa ang kumpirmadong nasugatan dahil sa Tropical Depression Agaton, ayon sa report ng National Disaster Risk Reduction and Management Council (NDRRMC) ngayong Lunes.

Batay sa 3PM report ng NDRRMC, ang dalawang namatay at isang nawawalang indibidwal ay mula sa Monkayo, Davao de Oro, habang ang isa pang nasawi ay mula sa Cateel, Davao Oriental.

Sa isang mensahe sa mga reporters, sinabi ng NDRRMC na ang nai-report na nawawala at dalawang kumpirmadong nasaktan na mula sa Davao Region ay nananatili pa rin sa validation.

Ayon sa NDRRMC, nasa 136,390 indibidwal o 86,515 pamilya ang naapektuhan dahil sa Bagyong Agaton mula sa 201 barangay sa Western Visayas, Central Visayas, Eastern Visayas, Northern Mindanao, Davao, Soccsksargen, Caraga, at Bangsamoro.

Nasa kabuuang 52 kabahayan ang napinsala, kung saan 49 partially habang tatlo totally nawasak sa Central Visayas, Northern Mindanao, at Caraga. Ini-report pa ng NDRRMC na nasa kabuuang P874,000 halaga ang napinsala sa agrikultura mula rin sa Soccsksargen at Bangsamoro.

Nakapagtala naman ng 195 insidente ng pagbaha, 13 landslides, 6 na flash floods, at umapaw na ilog dahil kay ‘Agaton.’ Nasa tinatayang 16 na mga lansangan at apat na tulay ang hindi na madaanan.

Sinabi rin ng NDRRMC na nasa kabuuang 15 lungsod at munisipalidad ang nakaranas ng power interruption, kung saan apat dito ang nai-restored na. Dalawang lugar naman ang nakaranas ng interruption sa suplay ng tubig. May kabuuang 38 pantalan ang sinuspinde ang mga biyahe at operasyon.

Habang nasa kabuuang 2,362 pasahero, 1,180 rolling cargoes, anim na barko, at isang motor banca ang stranded sa ilang mga apektadong rehiyon. Binanggit din ng NDRRMC na nasa kabuuang 78 klase at 56 work schedules ang isinuspinde dahil sa bagyo.

Ayon naman sa PAGASA, bandang ala-1:00 ng hapon ang sentro ng Bagyong Agaton ay tinatayang nasa layong 11.1°N, 125.2°E sa buong coastal waters ng Marabut, Samar.

May maximum sustained winds itong 45 km/h malapit sa sentro, gustiness na aabot sa 60 km/h, at central pressure na 1002 hPa.

Sinabi pa ng PAGASA na kumikilos ang Bagyong Agaton na halos stationary sa buong San Pablo Bay. Gayunman, ang Tropical Cyclone Wind Signal No. 1 ay nananatili pa rin sa mahigit 11 lugar sa bansa.

Bagyong Agaton, humahataw sa Eastern Samar

ni Lolet Abania | April 10, 2022

Itinaas na sa Tropical Cyclone Wind Signal No. 2 ngayong Linggo ng hapon ang apat na lugar sa bansa dahil sa Tropical Storm Agaton na nag-landfall sa Eastern Samar, ayon sa PAGASA.

Sa kanilang 2PM bulletin na nai-post sa website, ayon sa PAGASA ang mga lugar na isinailalim sa TCWS No. 2 ay ang mga sumusunod:

• Central at southern portions ng Eastern Samar (Can-Avid, Taft, Sulat, San Julian, Borongan City, Maydolong, Balangkayan, Llorente, Balangiga, Lawaan, Hernani, General Macarthur, Quinapondan, Giporlos, Salcedo, Mercedes, Guiuan);

• Central at southern portions ng Samar (Catbalogan City, Jiabong, Motiong, Paranas, Hinabangan, Calbiga, San Sebastian, Villareal, Pinabacdao, Santa Rita, Basey, Talalora, Daram, Zumarraga, Marabut);

• Northeastern portion ng Leyte (Babatngon, San Miguel, Barugo, Tunga, Alangalang, Tacloban City, Santa Fe, Pastrana, Palo, Tanauan, Tolosa, Dulag, Mayorga);

• Northern portion ng Dinagat Islands (Loreto, Tubajon)

Sa ngayon, nakararanas ang mga naturang lugar ng gale-force winds at posibleng asahan ito sa susunod na 24 oras.

Ayon sa PAGASA, ang bugso ng hangin ay maaaring magresulta sa posibleng banta ng panganib sa mga residente at kanilang kabuhayan.

Samantala, inilagay naman sa TCWS No. 1 ang buong southern portion ng Masbate (Dimasalang, Palanas, Cataingan, Pio V. Corpuz, Esperanza, Placer, Cawayan); natitirang bahagi ng Eastern Samar; natitirang bahagi ng Samar; Northern Samar; Biliran; natitirang bahagi ng Leyte; Southern Leyte; northern portion ng Cebu (Borbon, Tabogon, San Remigio, Bogo City, Medellin, Daanbantayan, Bantayan Islands) kabilang na ang Camotes Islands; Surigao del Norte at natitirang bahagi ng Dinagat Islands.

Asahan na makararanas ng malalakas na bugso ng hangin sa mga nasabing lugar sa loob ng mga susunod na 36 oras.

Bandang alas-7:30 ng umaga, nag-landfall ang Bagyong Agaton sa buong Calicoan Island, sa Guiuan.

Habang ala-1 ng hapon, ang sentro ni Agaton ay tinatayang nasa layong 10.9°N, 125.6°E sa buong coastal waters ng Balangiga, Eastern Samar, batay sa PAGASA.

May maximum sustained winds ito na 75 km/h malapit sa sentro, gustiness na aabot sa 105 km/h, at central pressure na 998 hPa.

Ayon pa sa PAGASA, ang Bagyong Agaton ay dahan-dahang kumikilos pakanluran.

Taglay din nito ang lakas ng hangin o higit pa na lumalawig palabas na aabot sa 220 km mula sa sentro.

Katamtaman hanggang sa malakas at paminsang matinding pag-ulan ang asahan sa buong Eastern Visayas, Cebu, Bohol, Dinagat Island, Surigao del Norte, at Agusan del Norte.

Samantala, nasa kabuuang 3,347 indibidwal ang inilikas sa Cagayan de Oro at lalawigan ng Bukidnon dahil sa tinatawag na rain-induced landslides, at pagbaha dulot ng Tropical Storm Agaton, ayon sa National Disaster Risk Reduction and Management Council (NDRRMC).

Sa isang interview ngayong Linggo kay NDRRMC spokesperson Mark Timbal, sinabi nitong bago pa pumasok ang Bagyong Agaton sa Philippine Area of Responsibility (PAR), may mga pagbaha at landslides na ang nai-report sa maraming lugar sa Mindanao dahil sa malalakas na pagbuhos ng ulan.

“Sa natanggap nating ulat, umabot po ng 3,347 na katao ang nagsilikas mula sa iba’t ibang lokasyon diyan sa Cagayan de Oro City at sa Bukidnon province. Tuloy-tuloy din naman ang pagtulong ng local government units sa kanila,” pahayag ni Timbal.

Pope Francis, nagbigay ng 100,000 euros para sa Odette relief operation — Vatican

ni Lolet Abania | January 19, 2022

Ipinahayag ng Vatican nitong Martes na nag-pledge si Pope Francis ng halagang 100,000 ($114,000) euros para sa relief efforts na isinasagawa ng Pilipinas, matapos ang hagupit ng Bagyong Odette noong Disyembre 2021.

Batay sa situation report ng National Disaster Risk Reduction and Management Council (NDRRMC), umabot na sa 406 ang nasawi dahil kay ‘Odette’ habang 65 na mga indibidwal ang nananatiling nawawala at 1,265 naman ang mga nasaktan.

Nagdulot ang Bagyong Odette ng malawakang pinsala sa mga probinsiyang dinaanan nito, gaya ng Surigao del Norte, Dinagat Islands, Cebu, at Palawan.

Ayon din sa NDRRMC, 2,335,757 pamilya ang apektado ng bagyo mula sa 11 rehiyon at 38 na lalawigan.

Matatandaan noong Disyembre, nagpahayag ng pagkabahala si Pope Francis sa mga Pilipino matapos bayuhin ng Bagyong Odette.

Isang mensahe ang ibinigay ng Santo Papa sa Twitter para sa mga apektado ng bagyo, na may nakalagay pang hashtag #PrayTogether.

“I express my closeness to the population of the Philippines, struck by a strong typhoon that has caused many deaths and destroyed so many homes,” post ni Pope Francis.

“May the ‘Santo Niño’ bring consolation and hope to the families of those most affected,” sabi pa niya.

Ayon pa anunsiyo ng Vatican, si Pope Francis ay nag-pledge rin ng 100,000 euros upang makatulong naman sa mga migrante na naharang sa mga border sa pagitan ng Poland at Belarus.

Kasama sa naipagkaloob na pera ang suporta para sa Catholic charity Caritas Poland, anila, “to deal with the migration emergency on the border between the two countries.”