'Egay', posibleng maging super bagyo

ni Jeff Tumbado @Weather News | July 22, 2023

Nagbabadyang maging “super bagyo” ang ganap na bagyong si 'Egay' na kasalukuyang nasa rehiyon ng Luzon.

Batay sa huling datos ng Philippine Atmospheric, Geophysical and Astronomical Services Administration (PAGASA), posibleng sa Lunes, Hulyo 24, maging super typhoon si 'Egay' kung saan nakatakda ang mismong State of the Nation Address (SONA) ni Pangulong Ferdinand Marcos, Jr.

“Pagdating sa intensity o lakas nitong bagyo, posible nga rin po itong lumakas into a Tropical Storm category within the next twelve hours at bukas posibleng nasa Severe Tropical Storm category, at pagdating ng Linggo, makikita po natin nasa Typhoon category na itong si Bagyong Egay, and by Monday posible po itong umabot sa Super Typhoon category,” paliwanag ni PAGASA weather specialist Ana Clauren-Jorda sa pulong balitaan kahapon.

“Kaya hindi po basta-basta o hindi dapat natin ipagwalang bahala itong mino-monitor nating si Bagyong Egay dahil malawak po ito at may malakas na hangin na dala,” wika pa nito.

Nabanggit din ng weather bureau na asahang magtataas sila ng wind signals sa ilang bahagi ng bansa simula ngayong araw ng Sabado, Hulyo 25.

“Inaasahan na magtataas po tayo ng Tropical Cyclone Wind Signal sa ilang bahagi ng Bicol Region at Eastern Visayas, partikular na sa Eastern portion simula po bukas ng gabi o early Sunday,” ani Jorda.

Huling namataan si 'Egay' sa Silangan-Timog Silangan ng Luzon na may taglay na lakas na hangin na 55 kilometro bawat oras at bugsong aabot sa 70 kilometro kada oras.

Wala pa umanong epekto sa bansa ang bagyo, ngunit asahan ang mga pag-ulan sa mga darating na araw na dulot din ng Southwest Monsoon o Hanging Habagat.

Sinabi ni Jorda na magsisimula ang mga pag-uulan na dala ni 'Egay' sa Linggo hanggang Lunes sa bahagi ng Luzon kabilang na ang NCR, Catanduanes at Northern Samar.

Bagyong Dodong, hataw

ni Mai Ancheta @News | July 15, 2023

Posibleng lumakas pa ang Bagyong Dodong hanggang ngayong Sabado bago ito tuluyang lumabas ng bansa.

Ayon sa Philippine Atmospheric, Geophysical and Astronomical Services Administration (PAGASA), asahan pa rin ang pag-ulan sa iba't ibang bahagi ng bansa ngayong weekend dahil sa pinalakas nitong habagat.

Nakataas ang signal number 1 sa mga lalawigan ng Cagayan kasama na ang Babuyan Islands, Apayo, Ilocos Norte, Abra, Ilocos Sur, Mountain Province, Kalinga at ilang bahagi ng Isabela.

Magiging maulan ang ilang bahagi ng bansa bunsod ng habagat gaya ng ilang bahagi ng Ilocos Region, MIMAROPA, Zambales at Bataan habang makararanas din ng ulan ang Metro Manila, Cavite, Batangas, Pampanga, Bulacan at Western Visayas.

Nagbabala ang PAGASA ng posibleng flash floods at landslides dahil sa mga pag-ulan na maaaring magpalambot ng lupa

Bagyong Chedeng, palayo na.. Habagat, hataw pa rin

ni BRT | June 12, 2023

Iniulat ng Weather State Bureau na lumalayo na ang Bagyong Chedeng sa kalupaan ng Pilipinas habang patuloy itong humihina.

Batay sa pinakahuling bulletin na inilabas ng PAGASA, as of 5 a.m. kahapon, maaaring umalis si 'Chedeng' sa Philippine area of responsibility (PAR) sa Linggo ng gabi o madaling-araw ng Lunes.

Gayunman, patuloy na palalakasin ni 'Chedeng' ang habagat, na magdadala ng monsoon rain sa kanlurang bahagi ng Luzon at Visayas sa susunod na tatlong araw.

Inaasahang bababa ang hila ng bagyo sa habagat habang lumalayo ito sa bansa, ang pagbuo ng frontal system sa hilaga ng extreme hilagang Luzon ay patuloy na magpapalakas ng habagat mula Martes.

Walang tropical cyclone wind signal ang nakataas sa alinmang bahagi ng bansa, ngunit ang Metro Manila, Calabarzon, Mimaropa, Ilocos Region, at iba pang bahagi ng Luzon at Western Visayas ay makararanas ng pagbugsong ulan dala ng habagat.

Magpapatuloy pa rin ang maalon na kondisyon sa halos buong Luzon mula Martes.