Ayuda sa NCR Plus, hanggang May 15 pa — DILG

ni Ronalyn Seminiano Reonico | April 20, 2021

Pinalawig ang distribusyon ng cash aid o ayuda sa NCR Plus hanggang sa Mayo 15, ayon sa Department of the Interior and Local Government (DILG).

Noong March 29 hanggang April 11, isinailalim sa enhanced community quarantine (ECQ) ang NCR Plus na binubuo ng Metro Manila, Bulacan, Cavite, Laguna at Rizal at 15 araw ang orihinal na target upang maipamahagi ang mga ayuda kung saan hanggang 4 na miyembro ng pamilya ang maaaring tumanggap ng P1,000 cash aid bawat isa.

Ayon naman kay DILG Spokesperson Undersecretary Jonathan Malaya, hindi na muling ie-extend pa ang distribusyon ng mga ayuda.

Inaprubahan nina Interior Secretary Eduardo Año, Social Welfare and Development Secretary Rolando Bautista at Defense Secretary Delfin Lorenzana ang pagpapalawig nito sa isinagawang pagpupulong kasama ang lahat ng NCR mayors at si Metropolitan Manila Development Authority Chairperson Benhur Abalos noong Linggo.

Saad ni Malaya, “It is very challenging to do distribution during a pandemic. Our LGUs cannot go full blast given the grave threat of COVID-19 so their request for more time is justified.”

Samantala, ayon sa DILG, ang top 5 LGUs na may highest distribution rate sa NCR ay ang Mandaluyong City na may 74.32% (P270.9 million), San Juan City na may 63.78% (P98.42 million), Caloocan City na may 63.46% (P848 million), Manila na may 60% (P915.7 million) at Quezon City na may 59.77% (P1.483 billion).

Cash ayuda, 15 days lang ipamimigay

ni Mary Gutierrez Almirañez | April 6, 2021

Binalaan ng Department of the Interior and Local Government (DILG) ang mga opisyal na mamimigay ng maling ayuda sa bawat barangay.

Ayon kay DILG Undersecretary Martin Diño ngayong Abril 6, “Hindi lang po namin kayo ipatatanggal, ang gusto ni Presidente ipakulong na kayo, 'yung mga gagawa ng pamimili. 'Yung iba, kokotongan pa ‘yung mga nabigyan. ‘Yung iba, hahati-hatiin. ‘Wag na dahil nasubukan na natin ito nu’ng first tranche.”

Dagdag pa niya, “Nakita n’yo naman na kahit sa social distancing ay nagsususpinde na kami ng mga tao kaya ayusin n’yo, lalo na roon sa mamimigay ng ayuda. Huwag n’yong pakialaman ‘yan. Inuulit namin dahil baka iyan pa ang ikatanggal ninyo sa puwesto o baka ikakulong n’yo na ngayon... Magmula sa mayor hanggang sa mga barangay captain."

Ipinaliwanag niya na mayroon lamang 15 araw ang mga mayor para ipamahagi ang cash na ayuda, habang 30 araw naman kung in-kind goods.

Nilinaw din ni DILG Undersecretary Jonathan Malaya ang ipinagkaiba ng cash at in-kind goods na maaaring matanggap ng mga residente sa NCR Plus Bubble.

Aniya, “Ito pong ipinamigay na relief goods ay mula po iyan sa local government... Ito pong unang wave ng ayuda na mga food items, ito po ay mula sa inyong local government unit. At ‘yun namang paparating na cash ay galing naman po sa national government… May isang ayuda from local, may isang ayuda from the national. 'Yung local ay nagsisimula na at namimigay na. ‘Yung national, magsisimula ngayong linggo. So itong mga ayudang ito, ito ‘yung ipamimigay ng pamahalaan sa panahon ng ECQ, whether may extension o wala.”

P5K-P10K ayuda sa mga nawalan ng trabaho

ni Mary Gutierrez Almirañez | March 28, 2021

Nakahandang maglaan ng financial assistance ang pamahalaan para sa mga empleyadong mawawalan ng trabaho habang ipinapatupad ang isang linggong lockdown sa NCR Plus Bubble, ayon kay Department of Labor and Employment (DOLE) Secretary Silvestre Bello III ngayong araw, Marso 28.

Aniya, "We are prepared anyway to provide cash assistance sa ating displaced workers, especially 'yung nasa formal employment, and of course' yung ating mga OFWs. For the formal workers, we will rely on employers who will submit to us mga pangalan ng workers nila na na-displace. Hopefully, with this one week lockdown, medyo maiwas-iwasan natin ‘yung unemployment result nitong matinding health protocols.”

Paliwanag pa niya, makakatanggap ng P5,000 ang mga displaced formal workers, habang P10,000 naman ang matatanggap ng mga OFWs at para sa mga informal workers na kaka-hire lamang at biglang nawalan ng trabaho dahil nag-lockdown ay makakatanggap din ito ng ayuda na katumbas ng minimum wage salary.

Giit naman ni Employer’s Confederation of the Philippines President Sergio Ortiz Luiz Jr., "Ang nakikita kong mapeperhuwisyo, ‘yung mga no-work, no-pay na mga empleyado... Pinapakiusapan 'yung malalaking miyembro namin, sana kargahin na lang ninyo ‘yung Lunes, Martes, Miyerkules para hindi naman masyadong mahirapan ang mga tao nila." Simula bukas ay ipapatupad na sa Metro Manila, Bulacan, Rizal, Laguna, at Cavite ang mas mahigpit na quarantine restrictions, kasabay ng mas pinaagang curfew mula alas-6 nang gabi hanggang alas-5 nang madaling-araw.

Sa ilalim nito ay maaari pa ring mag-commute ang mga papasok na empleyado sapagkat pinapayagan namang bumiyahe ang pampublikong transportasyon, gayunman limitado lamang ang kapasidad ng mga puwedeng sumakay.

Sa pagtatapos ng enhanced community quarantine (ECQ) sa ika-4 ng Abril ay inaasahang mapapababa nito ang bilang ng mga nagpopositibo sa COVID-19, partikular na sa Metro Manila na sentro ng pandemya.