Exemption sa pagkuha ng marriage license

ni Atty. Persida Rueda-Acosta @Magtanong Kay Attorney | July 28, 2023

Dear Chief Acosta,

Tatlong (3) taon na kaming nagsasama ng aking nobyo subalit hind pa rin kami ikinakasal. Plano na naming magpakasal sa susunod na buwan dahil nagdadalang-tao na ako, kailangan pa ba namin kumuha ng marriage license kahit matagal na kaming nagsasama? — Alma

Dear Alma,

Para sa iyong kaalaman, ayon sa Artikulo 34 ng ating Family Code of the Philippines, ang dalawang tao na nagsasama na parang mag-asawa nang hindi bababa sa limang (5) taon ay maaaring magpakasal kahit na walang marriage license.

Ayon sa nasabing batas: “Art. 34. No license shall be necessary for the marriage of a man and a woman who have lived together as husband and wife for at least five years and without any legal impediment to marry each other. The contracting parties shall state the foregoing facts in an affidavit before any person authorized by law to administer oaths. The solemnizing officer shall also state under oath that he ascertained the qualifications of the contracting parties are found no legal impediment to the marriage.”

(Binigyang-diin)

Sa iyong sitwasyon, dahil sa tatlong (3) taon pa lamang kayong nagsasama ng iyong nobyo, kinakailangan pa rin ninyo na kumuha ng marriage license bago magpakasal.

Kung hindi kayo kukuha ng marriage license, maaaring mawalan ng bisa ang isasagawa ninyong kasal sapagkat ito ay isa sa mga formal requisites ng kasal na hindi maaaring mawala maliban sa ilang sitwasyong itinatakda ng batas alinsunod sa Articles 3 at 4 ng ating Family Code.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa inyong patuloy na pagtitiwala.

Karapatang maabisuhan ng demosyon at mabigyang pagkakataon na magpaliwanag

ni Atty. Persida Rueda-Acosta @Magtanong Kay Attorney | July 27, 2023

Dear Chief Acosta,

Hindi ako nabigyan ng abiso ng demosyon at pagkakataong pabulaanan ito. Nang igiit ko ang aking karapatan na maabisuhan ng demosyon at mabigyan ng pagkakataong ipaliwanag ang aking panig, sinabi sa akin ng aking amo na ang nasabing mga karapatan ay naaangkop lamang sa pagtatanggal ng empleyado. Tama ba ang aking amo na wala ako ng mga nabanggit na karapatan? – Imye

Dear Imye,

Ang sagot sa iyong katanungan ay matatagpuan sa kasong “Jarcia Machine Shop and Auto Supply, Inc. vs. National Labor Relations Commission and Agapito T. Tolentino (G.R. No. 118045, 2 January 1997), na isinulat ni Kagalang-galang na dating Kasamang Mahistrado Teodoro R. Padilla ng ating Kagalang-galang na Korte Suprema, kung saan nakasaad ang mga sumusunod:

“Besides, even assuming arguendo that there was some basis for the demotion, as alleged by petitioner, the case records are bereft of any showing that private respondent was notified in advance of his impending transfer and demotion. Nor was he given an opportunity to refute the employer’s grounds or reasons for said transfer and demotion. In Gaco v. National Labor Relations Commission, it was noted that:

While due process required by law is applied on dismissals, the same is also applicable to demotions as demotions likewise affect the employment of a worker whose right to continue employment, under the same terms and conditions, is also protected by law. Moreover, considering that demotion is, like dismissal, also a punitive action, the employee being demoted should as in cases of dismissals, be given a chance to contest the same.”

Batay sa nabanggit na desisyon, ang angkop na proseso na itinatakda ng batas ay hindi lamang naaangkop sa pagtatanggal sa trabaho, kundi pati na rin sa demosyon. Ang demosyon ay nakaaapekto rin sa trabaho ng isang empleyado na ang karapatang magpatuloy sa trabaho ay protektado rin ng batas. Higit pa rito, kung isasaalang-alang na ang demosyon, tulad ng pagtatanggal sa trabaho, ay isa ring parusa, kaya ang empleyadong pinatawan nito ay dapat ding mabigyan ng pagkakataong pabulaanan ito.

Alinsunod dito, mali ang iyong amo dahil mayroon kang karapatan na maabisuhan ng demosyon at mabigyan ng pagkakataong ipaliwanag ang iyong panig.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa inyong patuloy na pagtitiwala.

Pagbili ng lupa sa subdivision, pasok na sa Homeowner's Association

ni Atty. Persida Rueda-Acosta @Magtanong Kay Attorney | July 26, 2023

Dear Chief Acosta,

Mayroon akong nabiling lupa sa isang subdivision, ngunit, hindi ko pa ito napatatayuan ng bahay. Maaari na ba akong sumali sa homeowner’s association ng aming lugar kahit na lupa pa lamang ang pagmamay-ari ko sa loob ng nasabing subdivision? – Helen

Dear Helen,

Para sa iyong kaalaman, ang batas na nakasasaklaw sa iyong katanungan ay ang Republic Act No. 9904 o mas kilala sa tawag na “The Magna Carta for Homeowners and Homeowners Associations.” Ayon sa Section 3 (j) ng nasabing batas:

“(j) “Homeowner” refers to any of the following:

An owner or purchase of a lot in a subdivision/village;

Dagdag pa ng Section 5 (a) Rule II, The 2021 Revised Implementing Rules and Regulations ng parehong batas:

“Section 5. Commencement of Homeownership. Homeownership begins:

By owning a lot in a subdivision/village and other real estate development for residential purposes;

b. By purchasing a lot and/or unit in a subdivision/village and other similar real estate development project for residential purposes;

c. By being an awardee, usufructuary, or legal occupant of a unit, house and/or lot in a private, non government or government socialized or economic housing or relocation and/or resettlement project and other urban estates;

and

d. By being a prospective beneficiary or awardee of ownership rights under the CMP, LTAP, and other similar programs.”

Samakatuwid, ayon sa batas, ang homeownership ay magsisimula kung ang isang tao ay magiging may-ari ng isang lupa sa isang subdivision o village. Kaya naman, mula sa oras ng pagbili ay maituturing na siyang homeowner. Ibig sabihin, ikaw ay itinuturing na isang homeowner dahil nakabili ka ng lupa sa isang subdivision. Bilang isang homeowner, maaari ka nang maging miyembro ng inyong homeowner’s association, kahit na hindi mo pa napatatayuan ng bahay ang iyong lupa.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa inyong patuloy na pagtitiwala.