Dagdag-lane, mas bibilis ang serbisyo ng mga ‘kagulong’

ni Atty. Rodge Gutierrez @Mr. 1-Rider | April 23, 2024

PINAG-IISIPAN na ng Department of Transportation (DOTr) at iba pang ahensya ng gobyerno ang posibilidad na magdagdag ng motorcycle lane para maibsan ang problema sa trapiko sa kahabaan ng EDSA.

Base sa pahayag ni DOTr Secretary Jaime Bautista, nasa 170,000 motorsiklo ang dumaraan sa EDSA kada araw na malaking sanhi din ng pagsisikip ng daloy ng trapiko.

Sinabi ni Bautista na mayroon nang inisyal na talakayan ang DOTr sa Metropolitan Manila Development Authority (MMDA) sa pagkakaroon ng dedicated lane para sa mga motorsiklo sa EDSA.

Nabatid na ang EDSA ay four lanes lamang. Ang isang lane ay inilaan pa sa busway. Sa kanang bahagi naman ay itinalaga sa bicycle lane. Pinaplano na umano ng DOTr na ‘yung katabi ng bicycle lane ang gagawing motorcycle lane.

Upang maiwasan umano na lahat ng lane ay ginagamit ng motorsiklo, kaya nais ng DOTr na magdagdag ng panibagong lane.

Abala ngayon ang DOTr sa pakikipag-ugnayan sa MMDA, kung paano sisimulan ang paglalagay ng panibagong lane na ilalaan para sa motorsiklo.

Layon umano ng DOTr na sa pamamagitan ng motorcycle lane sa EDSA, na tugunan ang economic cost ng traffic.

Inihayag din ng DOTr ang pag-aaral noong 2012 ng Japan International Cooperation Agency (JICA) na nagsasaad na ang economic cost ng traffic ay P2.4 bilyon kada araw sa Metro Manila.

Noong 2017, ang gastos umano sa ekonomiya ay umabot sa P3.5 bilyon sa isang araw habang ang pinakahuling pag-aaral noong 2022 ay nagpapahiwatig na ang pagkalugi sa ekonomiya mula sa sobrang traffic ay P4.9 bilyon sa isang araw lamang at inaasahang tataas pa umano ito ng P9 bilyon kada araw sa 2030.

Sa paliwanag ng DOTr, ang economic cost (of traffic), ito umano ‘yung additional fuel, additional cost, nawawalang opportunity for growth, at pagkawala pa ng panahon sa pamilya.

Kung maisasakatuparan sa lalong madaling panahon ang karagdagang lane sa EDSA para sa motorsiklo ay napakalaking ginhawa nito para sa ating mga ‘kagulong’ at bibilis na ang mga serbisyo na ginagamitan ng motorsiklo.

Higit sa lahat ay malalayo na rin sa aksidente ang mga nagmomotorsiklo sa kahabaan ng EDSA kung magkakaroon ng karagdagang lane at maiiwasan na rin ang pagtawid-tawid sa kahabaan ng busway dahil sa walang ibang madaanan.

Sana ay hindi na magkaroon ng pagbabago ang planong ito ng DOTr dahil ngayon pa lamang ay marami na ang natutuwa sa napakagandang planong ito na matagal nang minimithi ng ating mga ‘kagulong’.

Maging ang mga motorista na matagal nang nagrereklamo na nagsasalimbayan sa kanilang pagmamaneho ang mga rider dahil kasama nila sa iisang lane ay buung-buo ang pasasalamat dahil maaaksyunan na rin sa wakas ang matagal na nilang kahilingan.

Ngayon pa lamang ay inaasahang magiging matagumpay ang karagdagang lane na ito para sa motorsiklo sa EDSA dahil kailangang-kailangan na talaga ito.

Kaya hindi pa man ay binabati na natin ang pamunuan ng DOTr dahil sa magandang hakbangin na ito. Sana ay masimulan na ang proyektong ito.

Sa DOTr, umaasa ang marami nating kababayan na magiging maganda na ang daloy ng trapiko sa EDSA kapag naisaayos ang karagdagang lane para sa motorsiklo.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Driver na biktima ng aksidente, ‘di dapat ikulong

ni Atty. Rodge Gutierrez @Mr. 1-Rider | Abril 4, 2024

Hindi pa matiyak kung ano ang kahihinatnan ng panukalang inihain sa Kongreso upang maging patas umano ang mga umiiral na batas-trapiko at hindi na umano makukulong ang driver na wala namang kasalanan sa aksidente.

Layunin ng naturang panukala na desisyunan na agad kung sinuman ang mag-iimbestiga sa isang aksidente at kung sino ang may kasalanan o wala, hindi tulad dati na korte lamang ang magdedetermina nito.

Kung lulusot ang panukalang Philippines Responsible Driving and Accountability Act (House Bill 10128) ay layunin din nitong gawing responsable ang mga nagmamaneho ng sasakyan.

Marami nga namang kaso ng aksidente na karaniwang isinisisi sa driver, kahit na wala talaga siyang kasalanan sa pangyayari, na minsan ay ang mga pedestrian o ibang motorista ang dahilan, pero dahil siya ang may lulan sa mga nasawi at nasugatan ay awtomatiko silang ikinukulong.

Umusad ang panukulang ito matapos na mag-viral sa social media ang video ng isang motorcycle rider na ilegal na pumasok sa Skyway — nag-counter flow at bumangga sa kasalubong na Asian Utility Vehicle (AUV) kamakailan. Kahit malinaw sa video na walang kasalanan ang driver ng AUV ay sinampahan pa rin ito ng reklamo.

Kumbaga, naperhuwisyo na naasunto pa na karaniwang nangyayari sa bansa, kaya marahil ay may punto rin ang nabanggit na panukala upang hindi na makulong pa ang mga driver na binangga na nga, pero dahil namatay ang nagmamaneho ng bumanggang sasakyan, ay siya pa ang ikinulong.

Sabagay, kung makikita naman ng mga kasama natin sa Kongreso ang punto ng naturang panukala ay imposibleng hindi ito katigan para sa kapakanan ng nakararami nating kababayan.

Kaya lamang dahil sa usapin ng legalidad at pagbabago sa batas ay hindi malayong dumaan ito sa maraming katanungan upang matiyak na hindi magdudulot ng anumang komplikasyon sa darating na panahon.

Pansamantala ay relax muna tayo at hayaan nating magtrabaho ang mga kongresista hinggil dito at sana naman ay manaig ang tama tungo sa kapakinabangan ng ating mga kababayan.

Kung hindi palarin dahil sa usaping legal ay huwag naman tayong malungkot, ang mahalaga ay ginagawa ng Kongreso ang kanilang trabaho para sa kapakanan ng taumbayan.

Bilang Unang Representante ng 1-Rider Partylist, positibo ako sa panukalang ito ngunit bilang abogado ay kailangang pagtuunan ng masusing pag-aaral kung makakaapekto ba ito sa kasalukuyang batas na umiiral.

Ang importante ay may pagtutulungan ng bawat isa sa Kongreso, kung magaganda ang panukala at kapaki-pakinabang ay marapat lang na suportahan para sa mamamayan. Isa-isantabi muna ang pulitika at pagtuunan ng pansin ang mga mahahalagang bagay. 

Hindi naman pagalingan sa Kongreso, pagpapakita rito ng pagkakaisa para sa ikagagaan ng buhay ng bawat Pilipino.

Kumbaga, lahat ng anggulo ay tinitingnan at dapat na masusing pag-aralan bago maaprubahan ang nabanggit na batas at ito ay para sa ikabubuti ng lahat.

Sayang kung ang isang napakagandang panukala ay mababasura lang dahil sa pulitika, pero tulad ng sinabi ko, kung hindi naman papalarin ay huwag namang malungkot ang mga nakasuporta sa panukalang ito dahil may proseso tayong sinusunod na dapat manaig.

Basta kung may batas kayong naiisip at sa tingin ninyo ay makatutulong sa ating bansa, huwag kayong magdalawang-isip na makipag-ugnayan sa aming tanggapan at makakaasa kayong pagsisikapan naming makarating ito sa Kongreso.

Kalakip nito ang lahat ng paraan para kayo ay makipag-ugnayan sa aming tanggapan at malaking karangalan na kayo ay aming paglingkuran.

Para sa ikabubuti ng bayan, kasama n’yo ang inyong lingkod.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.

Pag-amyenda sa Motorcycle Crime Prevention Act, para sa kapakanan ng mga rider

ni Atty. Rodge Gutierrez @Mr. 1-Rider | Pebrero 22, 2024

Nanawagan si Senador Ronald “Bato” Dela Rosa sa mga kapwa mambabatas para sa agarang pagpasa ng isang panukala upang amyendahan ang Republic Act No. 12235 o “Motorcycle Crime Prevention Act”.

Sabi ni Dela Rosa, kailangang balansehin ang kapakanan ng riding community at ang layunin na tugunan ang problema sa “riding-in-tandem”.

Manipis umano ang linyang tinutulay ng batas na ito sa pagitan ng crime prevention at diskriminasyon. Wala naman umanong problema na parusahan ang mga nakagawa ng krimen ngunit ayon kay Sen. Bato ay tiyakin lamang kung sino ang tunay na salarin, inihayag niya ito sa gitna ng kanyang co-sponsorship sa Senate Bill No. 2555.

Argumento ni Dela Rosa, na isa ring motorcycle enthusiast, nasi-single out umano ang motorcycle riding sector nang isabatas na RA 12235. Nabago umano ang perspektibo sa sektor na ito nang matulungan ng motorcycle riders ang mga ordinaryong Pilipino noong COVID-19 pandemic sa paghahatid ng mga mahahalagang mga pangangailangan tulad ng test kits, food items, gamot at iba pa. 

Sa ilalim ng Senate Bill 2555, magkakabit na lang ng RFID stickers sa harap ng motorsiklo sa halip na plate number. Kaya kung lulusot ang panukalang ito ay hindi na dalawa ang plaka ng motorsiklo. RFID sa harap at sa likod na lamang ang plaka.

Mukhang magugustuhan ito ng motorcycle riding community na noon pa man ay tutol na sa doble plaka na ang lalaki pa. Sabagay, masagwa naman talaga tingnan.

Kaya ngayon pa lang ay marami na sa ating mga ‘kagulong’ ang excited sa panukalang ito na sana ay maisakatuparan sa lalong madaling panahon.

Masyado kasing napanggigigilan noong nakaraang Kongreso ang kalagayan ng mga kababayan nating gumagamit ng motorsiklo dahil sa biglang sumikat ang riding-in-tandem at parang lahat ng nakamotor ay masamang tao.

Dapat nating isipin na lumaganap lamang ang motorsiklo sa panahon ng pandemya na silang nagsalba sa taumbayan sa maraming bagay, partikular sa serbisyo na nagsasakripisyo sa pagbili ng mga pagkain at gamot dahil maraming takot lumabas ng bahay habang sila ay buwis-buhay.

At noong panahong matindi ang bakbakan sa Senado hinggil sa doble plaka ay tila nadamay ang mga matitinong rider sa riding-in-tandem na madalas na laman ng balita dahil sa kung anu-anong krimen na kinasasangkutan.

Pero dahil sa bagong panukalang ito, tiyak na magiging kapaki-pakinabang dahil bukod sa madali ang pagkakakilanlan ng rider ay makikita rin sa RFID ang iba pang detalye na kailangang-kailangan ng ating mga traffic enforcer.

Maiiwasan pa ang nakawan ng motorsiklo dahil sakaling nahuli ang rider at hindi tugma sa kanya ang detalye sa RFID ay may dahilan na para pigilin ang rider kung bakit siya nagmamaneho ng hindi akmang motorsiklo.

Nakakatuwang isipin na matapos ang mga pahirap na panuntunang inilabas laban sa mga rider — tulad ng paghuli sa mga sumisilong sa mga flyover sa tuwing umuulan ay may ilan pa rin namang mambabatas na inaalala ang kalagayan ng mga nagmomotorsiklo.

Huwag kayong mag-alala dahil hindi nakakalimot ang ating mga ‘kagulong’ sa mga kumakalinga sa kapakanan ng aming hanay.

Hindi na natin maitatanggi na panahon na ito ng motorsiklo, hindi lang sa ‘Pinas kundi sa iba’t ibang bahagi ng mundo, at malaking tulong sa pagsulong ng ating ekonomiya ang motorsiklo. Hindi naman tayo humihingi ng special treatment, pero sana lang huwag namang alisan ng dignidad ang ating mga ‘kagulong’ na sumusunod naman sa batas.

Madalas inaabala kasi sa checkpoint ang mga motorsiklo kahit walang kasalanan basta motorsiklo dapat awtomatikong hihinto ‘pag may checkpoint. Pagkatapos, pinabubuksan pa ‘yung lalagyan baka raw may baril, pero ‘pag kotse tuluy-tuloy lang samantalang posibleng mas malalaking baril ang kasya sa likod ng sasakyan. 

Sana naman mabago na ang pagtrato ng Philippine National Police (PNP) sa mga nakamotor ‘pag may RFID na dahil babasahin na ito ng RFID reader, at wala ng dahilan para pigilin pa ang mga motorcycle rider.

---

SA MGA NAIS MAKIPAG-UGNAYAN, MAG-KOMENTO, MAGSUMBONG O MAGSAMPA NG REKLAMO AY MAAARING TUMAWAG SA SMART-09603043012 , GLOBE -09567289931 O MAG-EMAIL SA Mr1Rider@1riderpartylist.com O SUMULAT SA MR. 1-RIDER, BULGAR Bldg., 538 Quezon Ave., Quezon City, AT ASAHAN NINYONG AGAD KAMING TUTUGON.