VP Leni, naturukan na ng AstraZeneca

ni Lolet Abania | May 19, 2021

Tinanggap na ni Bise-Presidente Leni Robredo ngayong Miyerkules ang kanyang first dose ng AstraZeneca COVID-19 vaccine sa Quezon City.

Sa isang statement, sinabi ni Robredo na nagpabakuna siya kasama ang ibang miyembro ng kanyang staff dahil sila ay nasa ilalim ng A3 category o mga taong mayroong comorbidities.

“Done with my first dose of the vaccine. Now being monitored,” ani Robredo. “Everything has been seamless,” dagdag niya. Matatandaang binanggit ni Robredo na mayroon siyang hypertension.

Ang AstraZeneca ay may efficacy rate na 70% matapos ang first dose, base ito sa evaluation ng Food and Drug Administration (FDA) ng bansa.

Tataas naman ang 70% rating nito kapag ang second dose ay natanggap na matapos ang apat hanggang 12 linggo.

Senior citizens na naturukan ng AstraZeneca sa Spain, babakunahan ng Pfizer sa 2nd dose

ni Mary Gutierrez Almirañez | May 19, 2021

Pfizer COVID-19 vaccines ang pangalawang dose na ituturok sa mga 60-anyos pababang Spaniards na unang nabakunahan ng AstraZeneca, batay sa inaprubahang rekomendasyon ng Spanish Health Ministry.

Ayon sa ulat, mahigit 1.5 milyong Spaniards ang hindi pa nakakakumpleto ng dalawang turok matapos mahinto ang rollout ng AstraZeneca sa Spain nang dahil sa blood clot.

Batay naman sa ginawang clinical trials ng Carlos III Health Institute, mahigit 1.7% participants ang nakaranas ng headaches, muscle pain at general malaise matapos nilang maturukan ng pinaghalong brand ng COVID-19 vaccines.

Sa ngayon ay ilang pag-aaral na rin ang ginawa hinggil sa paghahalo ng dalawang magkaibang brand ng bakuna, kung saan lumalabas na ligtas itong gawin at epektibo rin laban sa COVID-19.

'Wag na raw choosy sa brand... Mahihirap, unahin nang turukan — P-Du30

ni Mary Gutierrez Almirañez | May 18, 2021

Pinaboran ni Pangulong Rodrigo Duterte ang rekomendasyon na gawing prayoridad sa COVID-19 vaccination rollout ang mga mahihirap na mamamayan, batay sa kanyang public briefing ngayong umaga, May 18.

Aniya, "This is really for the poor, because if they get sick, they do not have the money. Let us be real about it… Wala silang pambili. They are at the mercy of their poverty. It is the sacred duty of the government to look after them.”

Matatandaang pang-5 pa sa prayoridad mabakunahan kontra COVID-19 ang mga low income families, kung saan mauuna muna ang mga health workers, senior citizens, persons with comorbidities at economic frontliners.

Tugon naman ni Vaccine Czar Secretary Carlito Galvez, Jr., “Ito po ang gusto naming i-suggest sa inyo dahil marami sa business sector at saka po sa COVAX na dapat buksan na natin ang A4 at A5. Dapat, ang bakuna, unahin ang mahihirap.”

Dagdag nito, “Kung makita natin ang recommendation ng business sector, karamihan ng Gabinete at sa Senate, eh, ibukas na po natin as soon as possible time. Puwede na tayo mag-start sa mahihirap para ang mga bakuna sa COVAX ay mabigyan ang mahihirap.”

Tiniyak din ni Galvez na magiging mas mabilis na ang vaccination rollout sa bansa, kung saan 500,000 katao ang tina-target mabakunahan kada araw, upang tuluyang maabot ang herd immunity sa pagsapit ng Nobyembre.

Iginiit pa nitong sasapat na ang suplay ng COVID-19 vaccines sa pagdating ng milyun-milyong doses ng bakuna sa kalagitnaan ng Mayo.

Kabilang dito ang inaasahang 2.2 million doses ng Pfizer, 1.3 million doses ng Sputnik V at karagdagang 500,000 doses ng Sinovac. Darating din sa Hunyo ang 3.3 million doses ng AstraZeneca (kabilang ang 1.3 million na binili ng private sector), ang 250,000 doses ng Moderna (kabilang ang 50,000 na binili ng private sector), at ang 2 million doses ng Sputnik V.

Sa kasalukuyan nama’y tinatayang 7,779,050 doses ng mga bakuna na ang dumating sa ‘Pinas, kung saan 3,001,875 ang mga nabakunahan.

Nilinaw din ni Pangulong Duterte na hindi dapat mamili ng brand ng COVID-19 vaccines ang mga nais magpabakuna upang mapabilis ang rollout.

“‘Wag n'yo na silipin kung Moderna, Pfizer, or AstraZeneca because I won’t allow it. Mahirap ka man o mayaman, kung gusto mo, pumunta ka sa vaccination sites. If you are there in the community, go there and have yourself vaccinated with any of the vaccines available. They are all potent, they are all effective. So there is no reason to be choosy about it,” aniya.