Earth Run series ng Takbo Para sa Kalikasan malapit na

ni Anthony E. Servinio @Sports | Oct. 23, 2024

Pagtulong para sa pagpapasigla muli ng mga kagubatan sa mga karatig lalawigan ng Metro Manila ang ikinasa ni Ms. Jenny Lumba (gitna) ng Green Media Events bago idaos ang Earth Run sa huling yugto ng Takbo Para Sa Kalikasan sa Nobyembre 17 sa CCP kung saan una na silang nakapagtanim ng 1,000 puno sa Tanay, Rizal ng Haribon Foundation at nasundan ng P50,000 na donasyon sa Million Trees Foundation sa La Mesa Watershed sa Lagro, Quezon City. Official media partner ang BULGAR sa TPSK. (TPSKfbpix)

Kasado na ang Earth Run, ang huling yugto ng seryeng Takbo Para Sa Kalikasan ngayong Nobyembre 17 sa Cultural Center of the Philippines. Matapos ang unang tatlong yugto, ito na rin ang selebrasyon ng isang buong taong pagpapakita ng malasakit para sa Inang Kalikasan.

Tampok ngayon ang karera sa 25 kilometro. Ang mga nakatapos ng 16 sa Fire Run, 18 sa Water Run at 21 sa Air Run ay tiyak na mag-uunahan para mabuo ang malaking medalya gamit ang apat na medalya.

Pangunahing layunin ng Earth Run ang makapagtanim ng 1,000 puno sa Tanay, Rizal. Napili muling tulungan ang Haribon Foundation na isa sa kanilang proyekto ang pagbuhay muli ng mga kagubatan.

Maliban sa 25 ay may mga karera din sa 10, 5 at 1 kilometro. Ginaganap na ang pagpapalista sa mga piling sangay ng Chris Sports at maaaring dumalaw sa opisyal na Facebook ng Takbo Para Sa Kalikasan para magpalista online. Magkakaroon pa rin ng Virtual Run para sa mga hindi makakapunta sa CCP sa araw mismo ng fun run.

Ang mga magtatapos sa Virtual Run ay makakatanggap ng parehong medalya at t-shirt sa mga tumakbo sa karera mismo. Ang BULGAR ay opisyal na media partner ng Earth Run at ng buong serye. Abangan muli ang makulit pero cute na si Bulgarito na magbibigay ng regalo sa mga masuwerteng mga ka-BULGAR.

Samantala, ipinakilala ng Green Media Events na pinangangasiwaan ang Takbo Para Sa Kalikasan ang kanilang unang patakbo sa bagong taon na pagbabalik ng APO Half Marathon sa Pebrero 23, 2025 sa Mall of Asia.

May pamagat ngayon na “Race To Reforest”, ang pangunahing tutulungan ay ang Million Trees Foundation. Ang mga kategorya ay 21, 10 at limang kilometro. Maaaring bumisita sa Facebook ng Green Media Events o APO Half Marathon para sa karagdagang detalye, katanungan at pagpapalista.

Bantiloc, 28th sa women's individual ng Paralympics

ni Anthony E. Servinio @Sports | August 31, 2024

Hindi nakisama ang lipad ng mga palaso ni Agustina Bantiloc at nagtapos na ang kanyang kampanya nang manaig sa kanya ang Brazilian para archer sa women's individual compound open elimination-round-of-16 kahapon at nagtapos din siya na ika-28 at huli sa Women’s Individual Compound Ranking Round ng 2024 Paris Paralympics Archery Huwebes ng gabi sa Les Invalides.  

Nanaig ang bigatin na si #5 Jane Karla Gogel ng Brazil sa knockout round. Nakapagtala lang ng 51 sa perpektong 60 puntos si Bantiloc sa kanyang unang anim na palaso na katabla ni Jeong Jinyoung ng Timog Korea.  Kung nakabawi si Jeong at umakyat sa ika-18, hindi na nakaahon ang Pinay at nanatili sa pinakailalim at nagtapos na may 618 mula sa 72 palaso na kanyang pinakamataas na iskor ngayong taon. 

Si Gogel ay nagtapos na may iskor na 691.  Ang papalarin ay haharapin ang magwawagi sa pagitan nina #12 Zhou Jiamin ng Tsina (676) at #21 Kerrie Leonard ng Ireland (653) sa Round of 16 sa Agosto 31. 

Numero uno si Oznur Cure Girdi ng Turkiye na nagtala ng bagong World at Paralympic Record na 704.  Inabot ng huling tira kung saan tinamaan niya ang 10 at siyam lang si Sheetal Devi ng India para magtapos sa 703 na hinigitan din ang dating World Record na 698 ni Phoebe Patterson Pine ng Gran Britanya at Paralympic Record na 694 ni Jessica Stretton ng Gran Britanya noong Tokyo 2020. 

Sa lakas ng mga kalahok, linampasan din ng 696 ng pangatlong si Fatemeh Hemmati ng Iran ang Paralympic Record.  Sina Girdi, Devi, Hemmati ang #4 Jodie Grinham ng Gran Britanya (693) ay pasok na sa Round of 16 at maghihintay ng makakalaban mula sa Round of 32.

3x3 Training Camp at torneo palalakasin

ni Anthony E. Servinio @Sports | August 31, 2024

Magbabalik ang malakasang 3x3 sa Half Court 3x3 Basketball Training Camp and Tournament na tatakbo ng tatlong linggo sa Okada Manila ngayong Setyembre.  Bubuhayin muli ang laro na ang malaking layunin ang makapasok ang Pilipinas sa Los Angeles 2028 Olympics. 

Binubuo ang organizer Half Court Group nina Coach Mau Belen at kanyang mga dating manlalaro sa TNT Triple Giga Samboy de Leon, Matthew Salem at Chester Saldua. Matapos mahinto ang PBA 3x3, nakahanap ng pagkakataon ang grupo na ipagpatuloy ang pagpapalaganap ng laro na napatunayang angkop sa panlasang Filipino dahil ito ay mabilis at puno ng aksyon. 

Magkakaroon ng mga torneo para sa lalake at babae sa Set. 7 at 8 at 14 at 15 at tutuldukan ng Grand Finals sa Set. 21 at 22. Kasabay nito ay magkakaroon ng 3x3 kampo sa umaga para sa mga kabataan na hahatiin sa edad 7 hanggang 11 at 12 hanggang 18. 

Ang magiging kampeon sa lalake ay ipadadala sa Pocheon Challenger sa Timog Korea mula Okt. 12 at 13. Qualifier ito para sa World Tour Shenzhen Masters sa Tsina sa Nob. 16 at 17. Ayon kay Coach Belen, maganda ang maagang tugon at malapit na mabuo ang inaasam na 16 koponan.  Asahan na mapapanood muli ang ilang mga beterano ng Chooks 3x3 at PBA 3x3. 

Sa panig ng kababaihan, napipisil na makabuo ng mga koponan para sa 2025 FIBA 3x3 Women's Series. Ngayon pa lang ay nagpahiwatig ng paglahok ang Gilas Pilipinas, Uratex Dream at ilang mga dating manlalaro ng UAAP. 

Sa pagwakas, nangako ang Half Court Group na itataas ang bansa sa World Ranking. Kasalukuyang nasa ika-37 ang mga lalake habang ika-23 ang mga babae.