Travel ban ng US, binawi ng Malacañang

ni Thea Janica Teh | December 31, 2020

Binawi ng Malacañang ang una nitong pahayag na kasama na ang United States sa mga bansang nakapailalim sa travel restriction sa Pilipinas dahil sa natuklasang bagong variant ng COVID-19.

Matatandaang sinabi ni Presidential Spokesperson Harry Roque na epektibo na agad ang travel restriction sa US.

Ngunit, sa ipinadala nitong statement ngayong Miyerkules nang gabi, sinabi nito na sinusuportahan niya ang pahayag ni Health Usec. Maria Rosario Vergeire na nakikipag-usap pa ang Department of Health sa World Health Organization at sa International Health Regulations Focal Point sa US para makakalap ng impormasyon tungkol sa bagong variant ng COVID-19.

Habang hinihintay ang kumpirmasyon, ipinaalala ng Inter-Agency Task Force for the Management of Emerging Infectious Diseases na sumailalim at tapusin ang 14-day quarantine bago pumasok ng bansa kahit pa magnegatibo ito sa RT-PCR test.

Sa ngayon ay nasa 20 bansa na, kabilang ang United Kingdom, ang nakapailalim sa travel restriction sa Pilipinas hanggang Enero 15, 2021.

Novavax na gawang-US at Mexico, isasailalim na sa phase 3 trial

ni Thea Janica Teh | December 29, 2020

Isasailalim na sa clinical trial upang malaman ang safety at efficacy ng COVID-19 vaccine candidate na gawa ng American biotech company na Novavax na gaganapin sa United States at Mexico, ayon sa US National Institutes of Health (NIH).

Sisimulan na rin ang phase 3 trial ng parehong vaccine na ang tawag ay NVX-CoV2373 sa United Kingdom kung saan 15,000 volunteers ang nakilahok. Sa US at Mexico, nasa 30,000 volunteers ang makikilahok sa phase 3 trial ng Novavax.

Ang 2/3 nito ay makatatanggap ng vaccine habang ang 1/3 naman ay placebo. Sa trial na ito, hindi malalaman ng mga volunteers kung vaccine o placebo ang itinurok sa kanila.

"The launch of this study -- the fifth investigational COVID-19 vaccine candidate to be tested in a Phase 3 trial in the United States -- demonstrates our resolve to end the pandemic through development of multiple safe and effective vaccines," sabi ni US immunologist Anthony Fauci, director ng National Institute of Allergy and Infectious Diseases (NIAID) na parte ng NIH.

Inaasahan na 25% ng participants ang mae-expose sa COVID-19 at kabilang dito ang mga African-American at Hispanic o ang mga volunteers na may health condition tulad ng obesity o diabetes.

Dalawang dose ang matatanggap ng mga volunteer na may 3 linggong pagitan. Ang vaccine ay maaaring itago sa pagitan ng 2 at 8 degrees Celsius (35 at 46 degrees Fahrenheit)—mas mainit sa naunang naaprubahang vaccine mula sa Pfizer/BioNTech at Moderna. Ibig sabihin, mas madali itong maipapamahagi.

Ang Pfizer at Moderna vaccine ay base sa bagong technology na messenger RNA, habang ang Novavax vaccine naman ay mula sa recombinant protein vaccine.

Samantala, nakatapos na sa phase 3 trial ang ilan pang COVID-19 vaccine na gawang Johnson & Johnson at Astrazeneca/ Oxford at inaasahang makakukuha na rin ng emergency authorization distribution sa US.

Patay sa US sa COVID-19, 300,000 na

ni Thea Janica Teh | December 15, 2020

Umabot na sa 300,000 katao sa United States ang namatay dahil sa COVID-19, ayon sa Johns Hopkins University tally nitong Lunes habang papalapit nang simulan ang vaccine program.

Sa nakalipas na 2 linggo, nakapagtala ang John Hopkins ng 2,500 namatay kada araw dahil sa COVID-19 . Umabot pa sa 3,000 ang naitala noong Miyerkules at Sabado. Ito na ang pinakamataas na naitalang namatay sa COVID-19 sa buong mundo.

Ito umano ang sanhi ng kawalan ng disiplina ng ilang residente sa pagsunod sa health protocols tulad ng pagsusuot ng face mask at social distancing.

Binalaan din ng awtoridad na maaari pang tumaas ang bilang ng kaso ng COVID-19 sa kanilang bansa dahil marami ang bumiyahe at dumalo sa Thanksgiving holiday noong nakaraang buwan.

Samantala, nasa 2.9 milyong vaccine doses ang inihanda ng US na ide-deliver sa 636 sites para sa halos 20 milyon nitong mamamayan.

Ang bawat tao ay makatatanggap ng two-shot regimen bago matapos ang taon at nakahanda muling magbigay ng vaccine sa Marso para sa 100 milyong mamamayan.