9 na unggoy tinurukan ng COVID-19 vaccines

ni Lolet Abania | March 8, 2021

Siyam na unggoy mula sa San Diego Zoo, kabilang ang apat na orangutan at limang bonobos ang naitala sa history ng veterinary na kauna-unahan sa buong mundong non-human primates na nabakunahan kontra COVID-19, ayon sa mga opisyal ng zoo sa Los Angeles.

Isa sa mga naturukan ng COVID-19 vaccine ay ang 28-anyos na babaeng Sumatran orangutan na si Karen na nabalita rin sa nasabing zoo na unang unggoy na sumailalim sa open-heart surgery noong 1994.

Ayon sa email ng zoo spokeswoman na si Darla Davis sa Reuters, bawat isa sa siyam na apes ay nakatanggap ng dalawang doses ng experimental vaccine na orihinal na ituturok dapat sa mga aso at mga pusa, gayunman, hindi naman nakitaan ang mga unggoy ng adverse reactions matapos maturukan habang nasa maayos silang kondisyon.

Nabahala ang maraming zoo officials sa mga hayop kung saan agad nilang tinurukan ang mga ito ng vaccine, matapos na walong gorilla na mula sa affiliated na San Diego Zoo Safari Park ay tinamaan ng COVID-19 noong Enero, na naitalang unang naiulat na transmission ng coronavirus sa mga unggoy.

Sinabi pa ni Davis na ang walong gorillas, kabilang ang isang 48-anyos na lalaking "silverback" na pinangalanang Winston ay nakaranas ng pneumonia at sakit sa puso, subalit unti-unti nang gumaganda ang kondisyon nito at nakakarekober na sa sakit.

Iba’t ibang medications ang ibinibigay kay Winston, kabilang na ang isang coronavirus antibody therapy para sa mga non-human. Gayunman, ang mga gorillas ay hindi binakunahan dahil ayon sa mga veterinarians, ang kanilang immune systems ay naka-develop na ng antibodies laban sa virus. Anila pa, maaaring nakuha ng mga ito ang sakit mula sa isang asymptomatic staff member.

Samantala, ang mga orangutan at bonobos na napili para sa immunization ay ilan lamang sa mga great apes sa nasabing zoo na may mataas na tiyansa na makuha ang virus at pinakamadaling maturukan ng vaccine. Nilitu-lito sa mga karayom ng mga staff na nagbakuna ang mga hayop para hindi sila matakot.

Ayon pa kay Devis, sinimulan ng mga zoo staff ang pag-administer ng shots sa mga unggoy noong Enero at ipinagpatuloy ito ng Pebrero, habang ang ilan ay isasagawa naman ngayong Marso.

Ang vaccine na na-develop ng veterinary pharmaceutical company na Zoetis ay hindi na naisubok sa mga apes, subalit ang cross-species na paggamit ng vaccines ay hindi naman pangkaraniwan.

Ang mga apes sa zoo ay nabibigyan ng human flu at measles vaccines, ayon kay Nadine Lamberski, ang chief conservation at wildlife officer ng San Diego Wildlife Alliance. Aniya, ang siyam na unggoy ang unang non-human primates na naiulat na nakatanggap ng COVID-19 vaccine.

20K sundalo, bantay sa inagurasyon ni President-elect Biden

ni Lolet Abania | January 14, 2021

Tinatayang 20,000 tropa ang itatalaga ng National Guard sa Enero 20 sa Washington para sa nakatakdang panunumpa ni President-elect Joe Biden ng United States.

Ito ang inanunsiyo ni acting Police Chief Robert Contee isang linggo matapos ang libong supporters ni dating Presidente Donald Trump ay magsagawa ng marahas na kilos-protesta sa Congress sa pagnanais nilang mapigilan ang election victory ni Democrat Biden kung saan isang police officer at apat na protesters ang namatay.

Matatandaang 8,000 National Guard troops ang itinalaga para sa 2016 inauguration ni Trump, ayon sa report noon ng Reuters.

Habang ang House of Representatives ay nagdedebate sa pormal na pagsasampa ng kaso ng "incitement of insurrection," nanawagan si Trump at ang Republican National Committee sa publiko at sa lahat na dapat nang tapusin ang karahasan bago ang inagurasyon ni Biden.

Sa isang White House statement, sinabi ni Trump, "In light of reports of more demonstrations, I urge that there must be NO violence, NO lawbreaking and NO vandalism of any kind. That is not what I stand for, and it is not what America stands for. I call on ALL Americans to help ease tensions and calm tempers."

Kinansela na ng Airbnb at ang subsidiary nitong HotelTonight ang lahat ng reservations ng kanilang hotel at house-sharing sa Greater Washington para sa darating na inauguration week.

Ang mga kalsada malapit sa Capitol na pinasok ng mga violent protesters noong January 6 ay isinara na. Ipinasara rin ng National Park Service ang Washington Monument para sa mga nagtu-tour habang si Mayor Muriel Bowser ay nakiusap sa mga visitors na huwag munang pumunta sa lugar.

Ang mga darating na tropa ng militar ang inatasang mag-secure sa lugar bago ang inagurasyon ni Biden, kung saan naglagay din ng mga barikada sa paligid ng Capitol.

Ayon pa sa dalawang opisyal, magkatuwang ang National Guard at Capitol Police officers sa pagpapatupad ng batas sakaling may magtatangkang lumabag dito.

Mga tagasuporta ni Trump, nag-rally sa US Capitol vs. Biden

ni Ronalyn Seminiano Reonico | January 7, 2021

Nagtipun-tipon at nagsagawa ng kilos-protesta sa US Capitol ang mga tagasuporta ni US President Donald Trump noong Miyerkules kaugnay ng pagkapanalo ni President-elect Joe Biden noong November, 2020 elections.

Nanawagan si Trump sa kanyang mga supporters na panatilihing payapa ang naturang kilos-protesta at aniya, "Please support our capitol police and law enforcement. They are truly on the side of our country. Stay peaceful!"

Samantala, naging bayolente ang pagra-rally ng mga tagasuporta ni Trump matapos sirain ng mga ito ang barricades at nakipag-engkuwentro sa mga pulis kaya napilitang gumamit ng tear gas ang mga ito. Muli namang nag-post si Trump sa Twitter dahil sa insidente at aniya, "I am asking for everyone at the US capitol to remain peaceful. No violence! "Remember, WE are the Party of Law & Order — respect the law and our great men and women in blue."

Pansamantala namang inihinto ng House of Representatives at Senate ang pagsesertipika kay Biden dahil sa naturang gulo.

Samantala, nagpahayag ng pagkadismaya ang mga leaders ng iba’t ibang bansa dahil sa bayolenteng pagpoprotesta ng mga tagasuporta ni Trump.

Pahayag ni Swedish Prime Minister Stefan Lofven, ang insidente ay maituturing na "an attack on democracy". Aniya, "President Trump and many members of Congress bear significant responsibility for what's now taking place. The democratic process of electing a president must be respected."

Panawagan naman ni German Foreign Minister Heiko Maas, dapat tanggapin ng mga tagasuporta ni Trump ang naging resulta ng eleksiyon. Aniya, "Trump and his supporters must accept the decision of American voters at last and stop trampling on democracy."

Saad naman ni Spanish Prime Minister Pedro Sanchez, "I am following with concern the news that are coming from Capitol Hill in Washington. I trust in the strength of America's democracy. "The new presidency of @JoeBiden will overcome this time of tension, uniting the American people."

Maging si Canadian Prime Minister Justin Trudeau ay nabahala rin sa insidente at aniya, "Obviously, we're concerned and we're following the situation minute by minute. "I think the American democratic institutions are strong, and hopefully everything will return to normal shortly."

Maging sina Finnish Prime Minister Sanna Marin, French Foreign Minister Jean-Yves Le Drian, Chairman of EU Leaders Charles Michel, European Commission President Ursula von der Leyen, at Venezuelan Foreign Minister Jorge Arreaza ay nagpahayag din ng kani-kanyang saloobin sa insidente at iisa ang panawagan — ang tanggapin ang resulta ng boto ng mga mamamayan.