Pagtatalaga ng mga pulis sa quarantine hotels, order ni P-Du30

ni Lolet Abania | January 5, 2022

Ang direktiba ni Pangulong Rodrigo Duterte na pagtatalaga ng mga pulis sa mga COVID-19 quarantine hotels ay hindi nangangahulugan na binibigyan ang pamunuan ng mga establisimyento ng free pass sakaling ang mga guests nito ay lumabag sa quarantine rules, ayon sa Malacañang.

Ito ang naging komento ni acting presidential spokesperson Karlo Nograles matapos na dalawang Pinay na mula sa United States ay dumating sa Pilipinas para sa Christmas holidays na tumakas at nakalusot sa kanilang quarantine at kalaunan ay tinamaan ng COVID-19, habang nahawaan naman ang ilan sa kanilang naging close contacts ng coronavirus.

“The President was just emphasizing the limitations on the part of the hotel, especially if the violators become aggressive. You would need law enforcement [personnel to be there]. But it does not absolve them of their negligence,” ani Nograles sa Palace briefing ngayong Miyerkules.

“The omission, non-reporting of violation... cases will be filed over that. They will be prosecuted, and it is up for the judge to decide,” sabi pa ni Nograles.

Nitong Martes, ipinag-utos ni Pangulong Duterte sa mga law enforcers na guwardiyahan ang mga hotels na nagsisilbing quarantine facilities para sa mga returning Filipinos, matapos ang viral report ng isang babaeng tumakas sa kanyang quarantine nang dumating sa bansa mula sa US.

Una nang sinabi ni Department of Justice (DOJ) Secretary Menardo Guevarra na ang mga indibidwal na lalabag sa mandatory COVID-19 quarantine protocols ay papatawan ng criminal charges sa ilalim ng Mandatory Reporting of Notifiable Diseases and Health Events of Public Health Concern Act (Republic Act 1132), bukod sa iba pang civil cases.

Nakasaad sa ipinagbabawal sa ilalim ng RA 11332 ay:

• unauthorized disclosure of private and confidential information pertaining to a patient’s medical condition or treatment;

• tampering of records or intentionally providing misinformation;

• non-operation of the disease surveillance and response systems;

• non-cooperation of persons and entities that should report and/or respond to notifiable diseases or health events of public concern; and

• non-cooperation of the person or entities identified as having the notifiable disease, or affected by the health event of public concern.

Sa pareho ring batas, nakasaad na ang mga violators ay pagmumultahin ng hindi bababa sa P20,000 hanggang P50,000 o pagkabilanggo ng hindi bababa ng isang buwan hanggang anim na buwan, o parehong pagmumulta at pagkakulong, batay sa deskrisyon ng korte.

Dahil sa 8.2 magnitude lindol sa Alaska… Tsunami sa ‘Pinas, posible — PHIVOLCS

ni Lolet Abania | July 29, 2021

Itinaas ng Philippine Institute of Volcanology and Seismology (PHIVOLCS) ngayong Huwebes ang alarma sa posibleng tsunami sa 'Pinas matapos ang magnitude 8.2 lindol na tumama sa Chignik, Alaska.

“An earthquake of this size has the potential to generate a destructive tsunami that can strike coastlines in the region near the epicenter within minutes to hours,” pahayag ng PHIVOLCS.

Ayon sa PHIVOLCS, sa ngayon, wala pang isinasagawang paglikas sa mga lugar sa bansa. Gayunman, pinayuhan ng ahensiya na patuloy na mag-monitor ang mga probinsiya gaya ng Batanes Group of Islands, Albay, Surigao del Sur, Cagayan, Catanduanes, Davao Oriental, Ilocos Norte, Sorsogon, Davao De Oro, Isabela, Eastern Samar, Davao del Norte, Quezon, Northern Samar, Davao del Sur, Aurora, Leyte, Davao Occidental, Camarines Norte, Southern Leyte, Camarines Sur, Surigao del Norte.

Samantala, naitala ng U.S. Geological Survey (USGS) ang lindol sa Alaska na nasa magnitude 8.2, na may lalim na 35 km.

Ang U.S. Tsunami Warning System ay nakapagtala naman ng pagyanig ng magnitude 8.1, at ang European-Mediterranean Seismological Centre (EMSC), naitala ang lindol na magnitude 8.0 na may lalim na 10 km.

Sumabog, nasa Alert Level 3 na... Mga residente ng Taal, pinalilikas na

ni Lolet Abania | July 1, 2021

Isinailalim ng Philippine Institute of Volcanology and Seismology ang Taal Volcano sa Alert Level 3 matapos ang eruption o pagsabog nito na umabot ng isang kilometrong taas ng phreatomagmatic plume ngayong Huwebes nang hapon.

Ayon sa PHIVOLCS, ang main crater ay bahagyang sumabog na nagbuga ng 1 kilometer-high phreatomagmatic plume ng alas-3:16 ng hapon subalit wala namang kasamang pagyanig.

Sinabi ng PHIVOLCS na ang naganap na phreatomagmatic eruption ay tumagal lamang ng hanggang alas-3:21 ng hapon o limang minuto. Ayon kay PHIVOLCS Director Renato Solidum, inilagay sa Alert Level 3 ang Taal na ang ibig sabihin ay nakapagtala ang bulkan ng "magmatic unrest".

“’Yung pagsabog po kanina, short-lived lang naman siya, mga limang minuto pero maitim po ‘yung pinaka-eruption column,” ani Solidum. “Ibig sabihin, may laman bago ‘yan pero hindi ganu’n kataas, isang kilometro lang ang inabot,” dagdag niya.

Inirekomenda na rin ng PHIVOLCS sa mga residente ng Taal Volcano Island at iba pang high-risk barangay gaya ng Agoncillo at Laurel na magsilikas dahil posibleng magkaroon ng pyroclastic density currents at volcanic tsunami.

“The public is reminded that the entire Volcano Island is a Permanent Danger Zone, and entry into the island as well as high-risk barangays of Agoncillo and Laurel is prohibited,” pahayag ng PHIVOLCS.

Pinapayuhan din ng ahensiya ang mga nasa komunidad sa paligid ng Taal na maging maingat at magbantay sa posibleng aktibidad naman ng lakewater.

Subalit ayon kay Solidum, stable pa ang bulkan. “Sa aming pagbabantay, tinitingnan namin kung titindi pa ang pamamaga niya. Hindi ganu’n ang ano, ang nakikita natin. Steady lang. So, may kaunting pressure na naipon at ‘yun ang pagbuga,” sabi ni Solidum.

Binanggit din ni Solidum na ang bulkan ay nakapaglabas ng tinatayang 13,000 tons ng sulfur dioxide o SO2 mula Huwebes nang umaga hanggang hapon, mas kaunti kumpara sa 14,326 tons na ibinuga nito noong Lunes.

“Nonetheless, kailangan nating pag-ingatan ang Taal. Kasi nagkakaroon na ng explosion. Puwede naman na talagang mangyari ito na after one year, may sumunod na activity,” ayon sa opisyal. Gayundin, noong Martes, ang Taal Volcano ay naglabas ng sulfur dioxide na umabot sa National Capital Region at karatig-lalawigan ng Miyerkules.