ni Ador V. Saluta @Adore Me! | September 2, 2023
Kinumpirma ng isang malapit na talent manager na totoong may sigalot ngayon sa pagitan ni Sharon Cuneta at ng panganay na anak nitong si KC Concepcion.
Ayon sa source, hindi lang daw ang mag-ina ang kasali sa hidwaan at sa pagkakataong ito ay involved din ang stepfather ni KC na si former Senator Francis “Kiko” Pangilinan.
Ang nasabing hidwaan ay agad ding kinumpirma ni KC sa isang panayam na in-unfollow niya sa Instagram si Kiko at kapatid na si Frankie Pangilinan, ngunit hindi nito tinukoy ang tunay na dahilan.
Kahapon (September 1), sa isang panayam kay PEP.ph Editor-In-Chief Jo-Ann Maglipon, aniya, sinabi sa kanya ng isang talent manager na sa mahabang panahon ay nakilalang malapit kay Sharon at sa pamilya nito, ang naging dahilan ng sigalot.
Unang nilinaw ng talent manager na hindi ito nagsasalita sa ngalan ni Sharon, ngunit alam daw niya ang tunay na kuwento at dahilan ng sigalot sa pamilya involving Sharon, Kiko at KC.
Bago pa raw kumalat at magsanga-sanga ang haka-haka o espekulasyon, minarapat nitong ibahagi ang kanyang nalalaman para tuldukan na rin ang mga espekulasyong peke ang sigalot at publicity lamang para sa hiwalay na upcoming projects ng mag-ina.
“This is a family matter,” pananaw ng talent manager sa lumabas na pahayag ni KC sa interbyu sa kanya ni Ogie Diaz sa YouTube vlog nito.
Pero aayusin din daw ito ng mga Pangilinan bilang isang pamilya, hindi lang sa harap ng publiko at ng media kapag dumating na ang tamang panahon.
Binigyang-diin din ng talent manager na si Sharon ay isang “mother first and last.”
Maliban daw sa pagiging public figure ni Sharon, higit pa ang obligasyon nito sa mga masugid at matagal na niyang tagahanga, at higit sa anupamang roles nitong ginagampanan sa buhay — si Sharon ay ina ng kanyang mga anak.
May apat na anak si Sharon — si KC, ang tanging anak sa kanyang first marriage; at sina Frankie, Miel, at Miguel, mga anak niya sa second marriage.
Sabi ng talent manager tungkol sa pagiging ina ni Sharon, “No situation, no challenge, and no provocation will change that. A mother will never knowingly put any of her children in a bad light.”
Umaasa rin ang talent manager na hayaan na sana ng entertainment press sina Sharon at KC na mag-promote ng kani-kanyang mga bagong proyekto “with grace”, at 'wag nang isama ang sigalot o hidwaan ng pamilya.
Masanay na rin sana ang mga netizens na kapag may ipino-promote na project ang kahit sinong celebrity, kailangan nilang mag-ingay para mapag-usapan.
Si KC ay kasalukuyang nagpo-promote ng kanyang international movie na Asian Persuasion, habang si Sharon naman ay magkakaroon ng concert kasama ang ama ni KC na si Gabby Concepcion, ang Dear Heart, na gaganapin sa SM MOA Arena sa October 27, 2023.
Bukod dito, mapapanood din si Sharon sa 2023 Metro Manila Film Festival entry na A Mother And Son's Story kasama si Alden Richards.
Sa bandang huli, sinabi ng talent manager (na hindi muna pinangalanan) na katulad ni Sharon, inirerespeto at sinusubukang intindihin ni Kiko at ng mga kapatid ni KC ang kanyang mga pinagdaraanan sa mga panahong ito.
Matagal na raw ang history ng tampuhan ng mag-ina, na kalimitan umano'y nagsisimula sa paghihimutok ni KC at nagtatapos sa pagbibigay-daan ni Sharon.
Sa panibagong kabanata ng sigalot, lumalabas na noong Agosto 24, mismong araw ng kaarawan ni Kiko, may mga mapanuring netizens ang nakapansing nag-unfollow si KC sa kanyang stepdad.
Usap-usapan, ngunit hindi kumpirmado ng PEP.ph kung may kinalaman ito sa napapabalitang relasyon ni KC sa negosyanteng si Mike Wuethrich.
Base sa nakalap ng PEP.ph mula sa dalawang sources, hindi lubusang tanggap nina Sharon, Kiko, at Frankie ang relasyon ni KC sa Filipino-Swiss boyfriend nito. Ngunit tila kailangan ang malalim pang anggulo rito bago mapaniwalaan.
