P500K multa, 5 Yrs. kulong sa ‘di lisensyadong Agricultural and Biosystems Engineer

ni Atty. Persida Rueda-Acosta @Magtanong Kay Attorney | September 15, 2023

Dear Chief Acosta,

Ako ay isang rehistradong agricultural and biosystems engineer sa ating bansa sa loob ng isang taon na. Ganunpaman, may iilang tao ako na kilala na hindi naman rehistrado o lisensyado ngunit ginagawa ang mga aktibidad na maaaring gawin lamang ng isang rehistradong agricultural and biosystems engineer. May batas ba silang nilalabag? Salamat. - Annie

Dear Annie,

Ang sagot sa iyong katanungan ay matatagpuan sa Seksyon 42 ng Republic Act No. 10915, na mas kilala sa tawag na “Philippine Agricultural and Biosystems Engineering Act of 2016,” kung saan nakasaad na:

“Section 42. Penalties. - In addition to the administrative sanctions imposed under this Act, any person who violates any of the provisions of this Act, or any of the following acts shall, upon conviction, be penalized by a fine of not less than one hundred thousand pesos (P100,000.00) but not more than five hundred thousand pesos (P500,000.00), or imprisonment of not less than six (6) months but not more than five (5) years, or both fine and imprisonment, at the discretion of the court:

a. Engaging in the practice of agricultural and biosystems engineering in the Philippines without being registered or without conforming to the provisions of this Act;

b. Presenting or attempting to use as his/her own the COR and/or professional identification card of another registered agricultural and biosystems engineer or a holder of a TSP.”

Ayon sa nasabing probisyon ng batas, isang paglabag sa batas ang pagganap sa mga aktibidad ng isang agricultural and biosystems engineer kung siya ay hindi naman rehistrado o lisensyado nang naaayon sa batas. Gayundin, ang pagpapanggap sa pamamagitan ng pagpresenta, o kahit pagtatangka na magpresenta ng certificate of registration, identification card o temporary/special permit, ng ibang rehistradong agricultural and biosystems engineer. Sa iyong nabanggit na sitwasyon, isang paglabag sa batas kung ang isang tao na hindi rehistrado nang naaayon sa batas ay gagampanan o gagawin ang aktibidad na isang lisensyadong agricultural and biosystems engineer lamang ang maaaring gumawa. Nais din namin ipaalam na kung ang isang tao ay mapatunayan na nagkasala, siya ay maaaring mapatawan ng karampatang parusa tulad ng pagmumulta o pagkakakulong.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.

Bawal ang non-appearance sa annulment

ni Atty. Persida Rueda-Acosta @Magtanong Kay Attorney | September 14, 2023

Dear Chief Acosta,

Habang ako ay nagba-browse sa social media, nakakita ako ng isang post na nag-aalok ng serbisyo patungkol sa Annulment of Marriage na hindi na dadaan pa sa korte at wala nang appearance rito. Sila na diumano ang mag-aasikaso ng lahat. Legal ba iyon at pagkatapos noon puwede na ba akong magpakasal ulit? - Alodia

Dear Alodia,

Para sa iyong kaalaman, ang batas na nakasasaklaw sa iyong katanungan ay ang Article 1 ng Family Code of the Philippines kung saan nakasaad na:

“Article 1. Marriage is a special contract of permanent union between a man and a woman entered into in accordance with law for the establishment of conjugal and family life. It is the foundation of the family and an inviolable social institution whose nature, consequences, and incidents are governed by law and not subject to stipulation, except that marriage settlements may fix the property relations during the marriage within the limits provided by this Code.”

Sang-ayon sa nabanggit, ang kasal ay isang special na kontrata na napapasok lamang kapag ito ay sumunod sa mga proseso at requirements ng batas. Alinsunod dito, ang isang kasal ay mapapawalang-bisa lamang sa pamamagitan din ng mga proseso at sitwasyon na nakasaad sa batas.

Ayon din sa ating Family Code, tanging ang mga korte lamang ang puwedeng magpawalang-bisa sa isang kasal sa pamamagitan ng pag-file ng petition for annulment of marriage o petition for declaration of absolute nullity of marriage. Ibig sabihin nito, kailangang mag-file muna ng petition sa korte at magpakita sa huwes ang petitioner o ang nag-file ng petition at kailangan niya munang patunayan na may mga rason siya para ipawalang-bisa ang kanyang kasal.

Ang mga sinasabing “no-appearance annulment” ay illegal at hindi totoo, at ang taong nag-aalok nito ay puwedeng masampahan ng kasong kriminal at iba pa. Kaya naman, mahigpit ka naming pinapayuhan na huwag maniwala sa iyong nakitang post sa social media, at sa halip ay sumangguni sa isang abogado para sa iyong mga legal na katanungan.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.

ance sa annulment

Reklamo sa auditorium ng iskul na punumpuno ng tao, kulang sa pintuan

ni Atty. Persida Rueda-Acosta @Magtanong Kay Attorney | September 13, 2023

Dear Chief Acosta,

Sinamahan kong mag-enroll ang aking anak noong isang araw at napansin kong sobrang punumpuno ng mga estudyante, mga magulang, at mga staff ng eskwelahan ang auditorium kung saan ginanap ang pag-e-enroll ng mga bata. Napansin ko ring kulang ang mga pintuan kung saan sila maaaring makalabas sakaling magka-sunog.

Nais kong malaman kung may nalabag bang batas ang nasabing eskwelahan sa kanilang ginawa? - Leo

Dear Leo,

Para sa inyong kaalaman, ang batas na nakasasaklaw sa iyong katanungan ay ang Section 8 (e) ng Republic Act No. 9514, o mas kilala bilang “Fire Code of the Philippines of 2008,” kung saan nakasaad na:

“Section 8. Prohibited Acts. - The following are declared as prohibited act and omission.

e) Overcrowding or admission of persons beyond the authorized capacity in movie houses, theaters, coliseums, auditoriums or other public assembly buildings, except in other assembly areas on the ground floor with open sides or open doors sufficient to provide safe exits.”

Samakatuwid, malinaw na ipinagbabawal ng batas na magpapasok ang mga sinehan, theaters, coliseums, auditoriums, o iba pang mga public assembly buildings, ng bilang ng mga taong hihigit sa kanilang kapasidad o authorized capacity ng kanilang gusali, maliban na lamang sa ibang assembly areas na nasa ground floor at bukas ang mga gilid o may bukas na mga pinto na dapat ay sapat upang ligtas na makalabas ang mga taong nasa loob nito. Ibig sabihin, maaaring nalabag ng eskwelahan ng iyong anak ang nasabing batas na ito. Alinsunod sa Section 11 ng parehong batas, maaaring mapagmulta ng hanggang P50,000.00 o/at mapahinto ang operasyon ng sinumang lalabag sa batas.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.