Puwede na bang magpakasal agad kahit kamamatay lang ng asawa?

ni Atty. Persida Rueda-Acosta @Magtanong Kay Attorney | October 03, 2023

Dear Chief Acosta,

Namatay ang asawa ng aking pinsang babae noong nakaraang buwan, ngunit, limang taon na rin silang nagkahiwalay nito bilang mag-asawa. Dahil dito ay balak na ng aking pinsan na kaagad na magpakasal sa kanyang bagong kinakasama. Subalit, sinabihan sila ng aming kapitan na maaaring makulong ang aking pinsan kung siya ay magpakasal nang kakamatay pa lamang ng kanyang tunay na asawa. Totoo bang may batas na ganito? - Neneng

Dear Neneng,

Para sa iyong kaalaman, nakasaad sa Section 351 ng Act No. 3815 o mas kilala sa tawag na “Revised Penal Code of the Philippines”, ang mga sumusunod:

“ARTICLE 351. Premature Marriages. — Any widow who shall marry within three hundred and one days from the date of the death of her husband, or before having delivered if she shall have been pregnant at the time of his death, shall be punished by arresto mayor and fine not exceeding 500 pesos.”

Sang-ayon sa nabanggit, ang isang biyuda ay maaaring maparusahan ng pagkakabilanggo at pagmumulta kung siya ay magpapakasal sa ibang lalaki nang hindi pa natatapos ang 301 araw mula sa pagkamatay ng kanyang naunang asawa.

Ito marahil ang tinutukoy ng inyong kapitan. Subalit, ang nasabing batas na ito ay na-repeal o naipawalang-bisa na sang-ayon sa Republic Act No. 10655 kung saan nabanggit na:

“SECTION 1. Without prejudice to the provisions of the Family Code on paternity and filiation, Article 351 of Act No. 3815, otherwise known as the Revised Penal Code, punishing the crime of premature marriage committed by a woman, is hereby repealed.”

Ibig sabihin, ang premature marriages sa ilalim ng Revised Penal Code of the Philippines ay naipawalang-bisa na sa bisa ng Republic Act No. 10655. Kaya naman, hindi na maaari pang kasuhan at ipakulong ang iyong biyudang pinsan kung sakaling siya ay magpapakasal kaagad sa kanyang bagong kinakasama.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.

Pagdeposito ng halaga sa korte bilang bayad sa utang

ni Atty. Persida Rueda-Acosta @Magtanong Kay Attorney | October 02, 2023

Dear Chief Acosta,

Ako ay may pagkakautang sa aking kapitbahay na kanyang pinatutubuan ng interest buwan-buwan. Ako ay nakapagbayad na ng halagang katumbas sa tatlong buwang hulog. Noong nakaraang linggo ay handa na akong magbayad ng aking ikaapat na hulog subalit ang kapitbahay ko ay nasa ibang bansa. Sinubukan ko siyang tawagan at i-text ngunit hindi siya sumasagot. Matapos noon ay nagpunta sa bahay namin ang isa niyang kapatid at naniningil, at makalipas lang ang ilang oras ay nagpunta rin sa bahay namin ang isa pa niyang kapatid, na naniningil din. Ang parehong kapatid ay nagbilin na siya lamang ang awtorisadong tumanggap ng kabayaran, ngunit wala ni isa sa kanila ang handang magbigay ng resibo kaya nalilito ako kung kanino ako dapat magbayad. Ano ang maaari kong gawin upang makonsidera ang aking pagbabayad at hindi na mapatungan pa ng karagdagang interest sa mga susunod na buwan? - Leslie

Dear Leslie,

Ang batas na sasaklaw patungkol sa iyong katanungan ay ang Republic Act No. 386, o mas kilala bilang The Civil Code of the Philippines. Nakasaad sa Article 1256 nito ang sumusunod na mga probisyon:

“Article 1256. If the creditor to whom tender of payment has been made refuses without just cause to accept it, the debtor shall be released from responsibility by the consignation of the thing or sum due.

Consignation alone shall produce the same effect in the following cases:

1. When the creditor is absent or unknown, or does not appear at the place of payment;

2. When he is incapacitated to receive the payment at the time it is due;

3. When, without just cause, he refuses to give a receipt;

4. When two or more persons claim the same right to collect;

5. When the title of the obligation has been lost.”

Kaugnay nito, inilahad ng Korte Suprema sa kaso ng Soledad Dalton v. FGR Realty and Development Corporation et al., G.R. No. 172577, 19 January 2011, Ponente: Honorable Associate Justice Antonio T. Carpio, na:

“In order that consignation may be effective, the debtor must show that: (1) there was a debt due; (2) the consignation of the obligation had been made because the creditor to whom tender of payment was made refused to accept it, or because he was absent or incapacitated, or because several persons claimed to be entitled to receive the amount due or because the title to the obligation has been lost; (3) previous notice of the consignation had been given to the person interested in the performance of the obligation; (4) the amount due was placed at the disposal of the court; and (5) after the consignation had been made the person interested was notified thereof.

Failure in any of these requirements is enough ground to render a consignation ineffective.”

Alinsunod sa nabanggit na probisyon ng batas, at sa desisyon ng Korte Suprema, upang maituring na ganap na ang iyong kabayaran, maaari mong ideposito sa korte ang halagang katumbas ng iyong utang, kung ang mga rekisitong nabanggit sa itaas ay iyo nang nagawa. Mariing inilahad ng Korte Suprema na ang kakulangan o hindi pagtupad sa mga nasabing rekisito ay maaaring magdulot ng pagkawalang-bisa ng pagdeposito ng bayad sa korte o consignation ng alinmang halaga.

Samakatuwid, kailangan mong patunayan ang pagkakaroon ng utang na kailangan nang bayaran; ang pagtanggi ng pinagkautangan na tanggapin ang kabayaran o dahil wala sa lugar ng bayaran ang iyong pinagkautangan, o may dalawang nagde-demand at nagki-claim na may karapatan silang tumanggap ng halagang dapat bayaran; unang notice o paalam ng consignation sa pinagkautangan; pagdeposito ng bayad sa korte; at pangalawang notice o paalam sa pinagkautangan matapos ang deposito sa korte.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.

Mga dapat gawin ‘pag tinanggihan ng taxi driver

ni Atty. Persida Rueda-Acosta @Magtanong Kay Attorney | September 30, 2023

Dear Chief Acosta,

May mga pagkakataon na napipilitan kaming mag-asawa na sumakay ng taxi. Hindi lingid sa kaalaman ng lahat, maraming taxi drivers ang namimili, tumatanggi sa pasahero. Ang totoo, ilang beses nang nangyari sa amin na tinanggihan kami ng taxi driver sa kadahilanang malayo at/o ma-traffic ang aming destinasyon. Naaayon ba ito sa ating batas? - Jocel

Dear Jocel,

Sang-ayon sa Joint Administrative Order (JAO) No. 2014-01 dated 2 June 2014, na inilabas ng noon ay Department of Transportation and Communication (DOTC), ang “Refusal to render service to the public or convey passenger to destination” o ang pagtanggi sa pagbibigay ng serbisyo sa publiko o paghahatid ng pasahero sa patutunguhan ay magreresulta sa PhpP5,000.00 hanggang Php15,000.00 na multa at/o pagkansela ng Certificate of Public Conveyance (CPC). Ito ay maituturing na violation sa kanilang prangkisa. Ang bahagi ng nasabing Order ay nagsasaad ng mga sumusunod:

“VIOLATIONS IN CONNECTION WITH FRANCHISE

TYPE OF VIOLATION

PENALTIES

2. Refusal to render service to the public or convey passenger to destination *

1st Offense – fine of P5,000.00

2nd Offense – fine of P10,000.00 and impounding of unit for thirty (30) days

3rd and subsequent Offenses – fine of P15,000.00 and cancellation of CPC where the unit is authorized

Except in cases of colorum violation, as provided above, the LTFRB, in the application of these fines and penalties, shall count offenses against operators and not against a particular motor vehicle or CPC. Hence, the second offense committed by a different vehicle of the same operator shall be counted as second (2nd) offense and another offense by a third vehicle of the same operator shall be counted as a third (3rd) offense, provided all apprehended vehicles belong to the same CPC.”

Kung kaya, kung mararanasan muli ito, tandaan lamang ang plate number ng taxi, at agad itong i-report sa Land Transportation Franchising and Regulatory Board (LTFRB).

Kung mapapatunayang may paglabag ang operator ng taxi, maaaring mapatawan ng multa, at/o makansela ang CPC kung paulit-ulit ang paglabag.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.