Mga may awtoridad para mag-solemnize ng kasal

ni Atty. Persida Rueda-Acosta @Magtanong Kay Attorney | Pebrero 7, 2024

Dear Chief Acosta,

Kami ng aking nobyo na parehong Katoliko ay nag-aayos ng mga requirement para sa aming nalalapit na pagpapakasal. Maliban dito ay sinasama rin namin sa plano kung sino ang magkakasal sa amin dito sa ating bansa. Maaari bang malaman kung sa batas ba natin ay may nakasaad na kung sino ang may awtoridad na mag-officiate ng isang kasal? Salamat sa inyong kasagutan. - Janneth

Dear Janneth,

Ang sagot sa iyong katanungan ay matatagpuan sa Artikulo 7 ng Executive Order No. 209 o mas kilala sa tawag na “Family Code of the Philippines,” kung saan nakasaad na:

Art. 7. Marriage may be solemnized by:

1. Any incumbent member of the judiciary within the court’s jurisdiction;

2. Any priest, rabbi, imam, or minister of any church or religious sect duly authorized by his church or religious sect and registered with the civil registrar general, acting within the limits of the written authority granted by his church or religious sect and provided that at least one of the contracting parties belongs to the solemnizing officer's church or religious sect;

3. Any ship captain or airplane chief only in the case mentioned in Article 31;

4. Any military commander of a unit to which a chaplain is assigned, in the absence of the latter, during a military operation, likewise only in the cases mentioned in Article 32;

5. Any consul-general, consul or vice-consul in the case provided in Article 10.”

Sa nasabing probisyon ng batas, inilista ang mga tao na maaaring mag-solemnize o magsagawa ng kasal at ang mga ito ay: a.) isang kasalukuyang miyembro ng Hudikatura sa loob ng lugar na nasasakupan ng kanyang korte; b.) ang mga pari, rabbi, imam, o ministro ng kahit anong simbahan o religious sect na binigyang awtoridad ng kanilang kinabibilangan na simbahan o religious sect at rehistrado sa civil registrar general, ngunit kinakailangan na ang kanilang aksyon ay nasasakop sa isang written authority na ipinagkaloob ng kanilang simbahan o religious sect at ang isa sa mga magpapakasal ay kasapi ng relihiyon nila; c.) ang ship captain or airplane chief, sa sitwasyon na ang isa o parehong partido sa kasal ay nag-aagaw-buhay (point of death); d.) military commander sa loob ng lugar na nasa ilalim ng military operation kapag wala ang nakatalagang chaplain at ang isa o parehong partido sa kasal ay nag-aagaw-buhay (point of death); at e.) sinumang consul-general, consul or vice-consul kapag ang kasal ay gaganapin sa ibang bansa. Kung kaya, ang mga nasabing tao ang mga itinalaga ng batas na may awtoridad lamang upang mag-officiate ng isang kasal sa ilalim ng mga kondisyong inilahad din sa batas.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.

Pagpapanotaryo ng Affidavit, kailangang personal na manumpa sa abogado

ni Atty. Persida Rueda-Acosta @Magtanong Kay Attorney | Pebrero 6, 2024

Dear Chief Acosta,

Noong nakaraan ay nawala ng aking nanay ang kanyang senior citizen’s ID. Pumunta ako sa isang abogado para magpagawa ng Affidavit of Loss, subalit, tumanggi siyang gumawa dahil hindi ko kasama ang aking nanay. Tama ba ang kanyang ginawa? – Danilo

Dear Danilo, 

Para sa iyong kaalaman, ang probisyon ng batas na nakasasaklaw sa iyong katanungan ay ang Section 2, Rule IV ng 2004 Rules on Notarial Practice kung saan nakasaad na:

SEC. 2. Prohibitions. - xxx

(b) A person shall not perform a notarial act if the person involved as signatory to the instrument or document – 

 (1) is not in the notary’s presence personally at the time of the notarization; and

(2) is not personally known to the notary public or otherwise identified by the notary, public through competent evidence of identity as defined by these Rules.

Ayon sa batas, hindi maaaring magnotaryo ang abogado kung ang sumusumpa o ang affiant ay hindi humarap sa kanya ng personal. Dahil hindi mo kasama ang iyong nanay noong ikaw ay nagpagawa ng salaysay o affidavit, tama lamang na hindi pumayag na gawin ng abogado ito, sapagkat ang presensya ng susumpa o affiant ay mahalaga at kailangan sa paggawa ng isang affidavit. Upang magawan ng affidavit of loss ang iyong nanay dahil sa pagkawala ng kanyang senior citizen’s ID, kinakailangang personal siyang magtungo sa isang notary public para personal siyang makita at makapanumpa sa harap ng abogadong gagawa nito.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.

Nanganak na misis, may maternity benefits kahit tanggal na sa trabaho

ni Atty. Persida Rueda-Acosta @Magtanong Kay Attorney | Pebrero 5, 2024

Dear Chief Acosta,

Ako ay natanggal sa trabaho sapagkat palagi akong absent at late, dala na rin ng aking pagdadalang-tao at pag-aalaga sa aking maliliit na anak. Tatlong araw pagkatapos na ma-terminate ako sa aking trabaho ay ipinanganak ko ang aking pangatlong anak. Maaari pa rin ba akong makakuha ng maternity benefits kahit na nanganak ako nang wala na ako sa aking pinagtatrabahuhan? - Hana

Dear Hana, 

Para sa iyong kaalaman, ang probisyon ng batas na nakasasaklaw sa iyong katanungan ay ang Section 8 ng Republic Act No. 11210 o mas kilala sa tawag na “105-Day Expanded Maternity Leave Law”, kung saan nakasaad na:

“Section 8. Maternity Leave With Pay in Case of Childbirth, Miscarriage, or Emergency Termination of Pregnancy After the Termination of an Employee’s Service. — Maternity leave with full pay shall be granted even if the childbirth, miscarriage, or emergency termination of pregnancy occurs not more than fifteen (15) calendar days after the termination of an employee’s service, as her right thereto has already accrued: Provided, That such period is not applicable when the employment of the pregnant woman worker has been terminated without just cause, in which case the employer will pay her the full amount equivalent to her salary for one hundred five (105) days for childbirth and sixty (60) days for miscarriage or emergency termination of pregnancy based on her full pay, in addition to the other applicable daily cash maternity benefits that she should have received had her employment not been illegally terminated.” 

Malinaw sa nakasaad sa nasabing batas na ang mga babaeng manggagawa ay mabibigyan pa rin ng maternity leave benefits sa ilalim ng “105-Day Expanded Maternity Leave Law” kung sila ay manganganak, magkakaroon ng miscarriage, o emergency termination ng kanilang pregnancy, nang hindi hihigit sa 15 araw pagkatapos ng pag-terminate ng serbisyo ng nasabing manggagawa. 

Sapagkat ikaw ay nanganak tatlong araw matapos kang matanggal sa iyong trabaho, maaari ka pa ring makakuha ng maternity leave benefits ayon sa batas.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.