Mga siklista, sugatan sa ilegal na bike race

ni Ronalyn Seminiano Reonico | June 21, 2021

Sugatan ang ilang siklista matapos magkabanggaan sa isinagawang ilegal na bicycle race sa Olongapo City.

Sa ipinost na video ni Olongapo City Vice-Mayor Aquilino "Jong" Cortez, Jr. sa Facebook, makikitang nagkabanggaan ang mga siklista at sumemplang ang mga ito nang sinubukan nilang mag-overtake sa isang truck.

Saad pa ni Cortez, “Ito ang dahilan na malamang paghihigpitan ang mga bikers na pumasok sa Subic Bay Freeport Zone dahil sa illegal at delikadong gawain.”

Hindi malinaw kung ilan ang mga siklistang sugatan sa insidente ngunit ayon kay Cortez, kabilang dito ang isang 14-anyos na babae.

Saad pa ni Cortez, “Makikita sa video ang delikadong pagba-bike ng grupo na ito kahit kasabay ang malaking truck. Ang mga nanonood naman ay nagtsi-cheer pa. Sabi raw, training. Para saang kompetisyon?”

Aniya pa, “Imagine kung napunta sa ilalim ng truck ‘yung mga riders at nagulungan?”

Ayon sa lokal na pamahalaan, nangyari ang naturang ilegal na race noong Sabado at malinaw na nalabag umano ang mga ipinatutupad na health protocols.

Dahil sa insidente, ipinasara ang San Bernardino Road sa Subic Bay Freeport Zone at kasalukuyan pang nagsasagawa ng imbestigasyon ang awtoridad sa naturang ilegal na racing.

12 patay, 140 sugatan sa gas blast sa China

ni Ronalyn Seminiano Reonico | June 14, 2021

Hindi bababa sa 12 katao ang namatay at 140 ang sugatan matapos sumabog ang gas pipeline sa isang residential compound sa Hubei Province, China noong Linggo.

Naganap ang pagsabog bandang alas-6:30 nang umaga at ayon sa ulat, nagmula ito sa two-storey building ng vehicle frame manufacturer.

Ayon sa Disaster Manangement Bureau ng Shiyan City, patuloy pa ring isinasagawa ang rescue efforts ngunit hindi malinaw kung ilang katao ang na-trap sa mga gumuhong debris.

Kabilang umano sa mga nabiktima ng pagsabog ay ang mga namimili at nagtitinda ng mga gulay sa isang palengke.

Samantala, nagpadala na rin ang Ministry of Emergency Management ng karagdagang rescuers para tumulong sa operasyon.

9 patay sa gumuhong gusali sa South Korea

ni Ronalyn Seminiano Reonico | June 11, 2021

Patay ang siyam na katao matapos matabunan ng gumuhong limang palapag na gusali ang isang bus sa South Korea noong Miyerkules.

Ayon sa ulat, bigla na lamang gumuho ang gusali na dine-demolish nang huminto ang bus sa may tapat nito sa Gwangju City, southwest ng Seoul.

Sa 17 sakay ng bus, siyam ang nasawi at 8 ang seriously injured, ayon sa National Fire Agency.

Nakalikas naman umano ang lahat ng demolition workers bago gumuho ang gusali.

Nagpahayag naman ng pakikiramay ang chairman ng HDC Hyundai Development Company, ang contractor na sangkot umano sa insidente, na si Chung Mong-gyu.

Aniya, "I sincerely apologize to the victims, their families, the injured, and citizens in Gwangju — I feel a heavy sense of responsibility.

"Our company will do its best so that the victims and their families can recover from the damages as soon as possible.”

Samantala, hindi pa malinaw ang dahilan ng insidente at kasalukuyan na ring nagsasagawa ng imbestigasyon ang awtoridad.