SC, nagdesisyon na sa agawan sa teritoryo.. Mayor Abby, fake news! — Taguig

ni Mylene Alfonso | June 11, 2023

Nagpahayag ng pagkaalarma ang lokal na pamahalaan ng Taguig kaugnay sa ipinalalabas na pagbubukas muli ng Taguig-Makati territorial dispute bagama't pinal na itong nadesisyunan ng Korte Suprema.

Sa isang pahayag na ipinalabas ng Taguig City, sinabi nito na tinuring lamang nila na “fake news” ang mga unang kumakalat na social media posts na nagsasabing nakausap ni Makati City Mayor Abby Binay sina Pangulong Ferdinand Marcos, Jr., First Lady Liza at Chief Justice Alexander Gesmundo para muling buksan ang kaso ng territorial dispute.

Gayunman nang sundan umano ito ng panayam kay Binay noong Hunyo 7, 2023 at sinabi nitong mayroong natanggap na dokumento mula sa Korte Suprema ang Makati City na nagtatakda ng oral argument ay ito na ang nakakaalarma dahil wala umano itong katotohanan, sa katunayan walang natatanggap na kautusan ang Taguig hinggil dito.

Pinunto pa ng Taguig na mismong si SC Spokesman Atty. Brian Keith Hosaka ang naglinaw na walang itinatakdang oral arguments hinggil sa territorial dispute dahil nagkaroon na ng Entry of Judgement sa kaso.

“Mayor Binay’s statement during her interview is unfortunate. Not only is it factually inaccurate, but it likewise tends to tarnish the integrity and independence of the judiciary. We ask the Honorable Supreme Court to take notice of these claims from Makati and consider appropriate action,” giit pa ng Taguig.

Giit pa na mahaba ang tinakbo ng kaso at anumang naging desisyon sa kaso ay dapat na igalang.

Ang final and executory decision sa Makati-Taguig dispute ay ipinalabas ng SC noong Setyembre 28, 2022 matapos nitong ibasura ang Motion for Reconsideration ng Makati City, sa nasabing desisyon, sinabi ng SC na wala nang anumang pleadings, motions, letters o anumang komunikasyon ang tatanggapin na may kaugnayan sa usapin.

Maging ang apela ng Makati na iakyat sa SC en banc ang kaso ay ibinasura rin sa kawalan ng merito at ang tangka nitong paghahain ng ikalawang Motion for Reconsideration ay hindi pinapayagan sa rules of procedure.

Nilinaw ng Taguig na may kumpiyansa ito sa national leadership subalit ang ikinababahala nila ay ang negatibong epekto sa isip ng mga residente sa mga pahayag ng Makati City ukol sa isyu.

Bumuwelta rin ang Taguig sa pahayag ni Binay na hindi kayang ibigay ng lokal na pamahalaan ang mga naibibigay ng lungsod gaya ng Makati sa mga residente nito.

“We assure Mayor Binay and the residents of the concerned barangays that Taguig has its own programs and projects which deliver efficient and timely public services aimed at attaining our vision for a transformative, lively, and caring community."

'Embo barangay', sakop ng Taguig — SC

ni Mylene Alfonso | June 10, 2023

Inalmahan ang paninindigan ni Makati City Mayor Abby Binay na suwayin ang pinal na desisyon ng Korte Suprema at ituloy pa rin ang laban sa territorial dispute sa pagitan ng Taguig City.

Sa viral video ni Binay na kumalat sa social media, sinabi nito na tuloy pa rin ang laban.

“Ang posisyon namin is tuloy ang laban. Naawa ako sa mga anak ko — 'yung mga students, mga anak ko 'yan. Iba 'yung level of investment, I'm not talking about financial, alam ko kasi na hindi kayang ibigay 'yung kalidad na naibibigay ng isang kagaya ng lungsod ng mga Makati sa mga estudyante,” ani Binay sa panayam sa kanya ng mga mamahayag sa pagdalo nito sa CityNet Disaster Cluster seminar.

Kasunod ng pahayag ni Binay ay ang pagkalat naman sa social media ng propaganda na “Makatizens, hindi pa tapos ang laban. Kinausap na ni Mayora si Pres. BBM, ma’am Liza at si Chief Justice. Nangako silang tutulong para mabuksan ulit ang kaso. Tuloy ang laban!

Magugulat na lang ang Taguig. Abangan nila.”

Karamihan sa mga reaksyon sa buksan muli ang Makati-Taguig dispute ay panawagan na respetuhin na lang ang desisyon ng Korte Suprema.

Isa umano sa dahilan kung bakit may ilang tumatanggi na mailipat ang “embo barangay” sa Taguig ay dahil sa nakukuhang benepisyo sa Makati subalit ilang residente ng Taguig ang naglabas din ng saloobin sa social media at nagsabing mas maganda ang pamamalakad sa lilipatang siyudad.

Ang 30 taong territorial dispute sa pagitan ng Makati at Taguig ay tinapos na ang SC sa ipinalabas na resolusyon noong Abril, sa pagresolba ng kaso ay pinaniwalaan at binigyang bigat ng mga mahistrado ng Korte Suprema ang mga ebidensya at argumento na naiharap ng Taguig.

Pinagtibay ng SC sa kanilang ipinalabas na desisyon ang injunction na ipinalabas noon pang 1994 ng Pasig City Regional Trial Court na pumipigil noon pa sa Makati City na angkinin ang Inner Fort Bonifacio na kinabibilangan ng mga barangay ng Pembo, Comembo,Cembo, South Cembo, West Rembo, East Rembo at Pitogo.

Agawan sa BGC.. Makati Mayor Abby, sopla sa SC

ni Mylene Alfonso | June 9, 2023

Itinanggi ni Supreme Court Spokesman Atty. Brian Keith Hosaka na may ipinalabas na kautusan ang SC na nagtatakda ng oral argument para sa territorial dispute sa pagitan ng Taguig at Makati City.

Nagkaroon na umano ng final and executory decision kaugnay nito kung saan itinakda na ang pinag-aagawang Bonifacio Global City (BGC) at 9 pang barangay ay nasa legal na hurisdiksyon ng Taguig City.

Ayon kay Hosaka, wala siyang alam na ganitong ipinalabas na kautusan.

Kung mayroon man umanong ganitong kautusan ang SC, ipalalabas ito sa website at social media account ng kataas-taasang hukuman.

Ang paglilinaw ni Hosaka ay bilang reaksyon sa pahayag ni Makati City Mayor Abby Binay na nakatanggap ang Makati City Legal Office ng dokumento na nagtatakda ng oral argument para sa territorial dispute.

“As far as the document that we received, they actually even set it for hearing, that means its not yet final. Kasi sa Omnibus Motion namin wala pang aksyon so as far the city is concerned there is still pending motion,” pahayag ni Binay.

Nang tanungin si Binay kung kailan ang petsa ng hearing base sa natanggap nilang dokumento ay hindi pa niya alam.

“Hindi namin alam kasi di ba naka-break ang Supreme Court, hopefully by this month we will get some idea,” ani Binay.

Dugtong pa ng alkalde na oral argument ang itinakda ng SC alinsunod sa natanggap nilang dokumento.

Samantala, sa panig ng Taguig City, wala umano silang natatanggap na dokumento.

Taliwas umano ang pahayag ni Binay sa resolusyon na ipinalabas ng Korte Suprema noong Abril na nagsasabi na ibinasura na ang Omnibus Motion ng Makati City na humihiling na iakyat ang territorial dispute case sa SC en banc at magkaroon ng oral argument sa kaso. Una nang ipinaliwanag ni Hosaka na pinal na ang ipinalabas na desisyon ng SC hinggil sa Makati-Taguig territorial dispute at kasamang ibinasura ang mosyon na humihiling na magtakda ng oral arguments.

Idinadag pa nito na nagkaroon na rin ng Entry of Judgement sa kaso na nangangahulugan na ang desisyon ay final and executory.

Sa pagresolba sa territorial dispute ay mas pinaniwalaan at binigyang bigat ng mga mahistrado ang mga ebidensya at argumento na naiharap ng Taguig.