LGUs, may malaking papel sa pagbangon ng sektor ng edukasyon

ni Kuya Win Gatchalian @Win Tayong Lahat | March 2, 2023

Malaki ang kontribusyon ng mga lokal na pamahalaan para sa pagpapayabong ng sektor ng edukasyon. Ito ang dahilan kaya muling isinusulong ng inyong lingkod ang pagpapalawak sa tungkulin ng local school board.

Kung ating matatandaan, inihain ng inyong lingkod noong nakaraang taon ang Senate Bill No. 155 o ang 21st Century School Boards Act na layong nagpapatatag pa sa mga local school board at nagpapalawak ng pakikilahok ng iba pang mga miyembro ng komunidad. Sa ilalim ng nasabing panukala, mandato ng mga local school board na magpanukala at magpatupad ng mga polisiyang mag-aangat sa kalidad ng edukasyon.

Bahagi rin ng ating mungkahi na maging responsibilidad ng mga local school board ang pagpapatupad ng mga hakbang upang maipagpatuloy ang edukasyon sa gitna ng mga kalamidad, sakuna, at iba pang emergency situation na nagdudulot ng paghinto ng mga klase.

Pinapalawak din ng panukalang-batas ang mga maaaring paggamitan ng Special Education Fund (SEF) na nalilikom mula sa isang porsyentong tax sa real property. Sa ilalim ng Local Government Code of 1991 (Republic Act No. 7160), nakalaan ang SEF sa local school board para sa pagpapatakbo at maintenance ng mga pampublikong paaralan, pati na rin sa pagkukumpuni at pagpapatayo ng mga school buildings.

Nakasaad sa ating panukala na maaaring gamitin ang SEF para sa sahod ng mga guro at non-teaching personnel ng mga pampublikong paaralan sa elementarya at high school, sahod ng mga preschool teachers, maging ang honoraria at allowances ng mga guro at non-teaching personnel para sa karagdagang trabaho. Sa ilalim ng panukalang-batas, maaari na ring gamitin ang SEF sa capital outlay ng preschools, pagpapatakbo ng mga programa sa ALS atbp.

Sa pagbangon ng sektor ng edukasyon mula sa krisis na ating hinaharap, mahalaga ang papel ng ating mga local government unit, lalo na’t mas malapit sila sa ating mga kababayan. Kaya bilang Chairman ng Senate Committee on Basic Education, titiyakin natin ang pagpapatatag sa ating mga local school board upang mapalawak natin ang papel ng mga komunidad sa paghahatid ng dekalidad na edukasyon.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Mababang passing rate sa LET, nakakabahala; edukasyon ng mga guro, dapat dekalidad

ni Kuya Win Gatchalian @Win Tayong Lahat | February 28, 2023

Ngayong nababahala ang isang advocacy group sa nananatiling mababang passing rates sa mga kumukuha ng Licensure Examination for Teachers (LET), iginiit naman ng inyong lingkod ang pangangailangan para ganap na pagpapatupad ng Excellence in Teacher Education Act (Republic Act No. 11713).

Base sa pag-aaral ng Philippine Business for Education hinggil sa mga resulta ng Board Licensure Examination for Professional Teachers (BLEPT) mula 2010 hanggang 2022, 37 porsyento lamang ang passing rate sa mga overall takers sa elementary level at 40 porsyento naman sa secondary level.

Lumabas din sa naturang pag-aaral na batay sa overall passing rates ng mga Teacher Education Institutions (TEIs) na mayroong takers na hindi bababa sa 300, 2.2 porsyento lamang ang mga maituturing na high-performing TEIs sa elementary level at 2.0 porsyento lamang sa secondary level. Saklaw ng resultang ito ang pito sa 12 taong bahagi ng pag-aaral. May overall passing rate na 75 porsyento ang mga high-performing TEIs sa loob ng pitong taon mula 2010 hanggang 2022.

Aabot naman sa 34.8 porsyento ang bilang ng mga low-performing TEIs sa elementary level at 24.4 porsyento naman sa secondary level. Maituturing na low-performing ang isang TEI kung umabot lamang sa 25 porsyento ang overall passing rate nito sa mga taong saklaw ng pag-aaral.

Kinakailangan ang ganap na pagpapatupad ng Excellence in Teacher Education Act upang tugunan ang mababang passing rate sa LET at upang paramihin ang bilang ng mga high-performing TEIs.

Sa ilalim ng batas, iaangat ang kalidad ng pagsasanay at edukasyon sa mga guro sa pamamagitan ng pinatatag na Teacher Education Council (TEC) na magpapaigting sa ugnayan ng Department of Education (DepEd), Commission on Higher Education (CHED), at Professional Regulation Commission (PRC). Titiyakin ng TEC ang ugnayan sa iba’t ibang yugto ng teacher education mula pre-service hanggang in-service.

Sa kanyang presentasyon ng 2023 Basic Education Report (BER), inanunsyo ni Vice President at Secretary of Education Sara Duterte na titiyakin ng DepEd ang paglulunsad ng bagong TEC at Secretariat. Aniya, sisimulan na ng TEC ang pagtupad sa mga mandato nito, kabilang ang pagtatatalaga ng mga minimum requirements para sa pre-service teacher education programs sa bansa.

Sa pagsisikap nating iangat ang kalidad ng edukasyong natatanggap ng ating mga kabataan, mahalagang tiyakin din natin bilang Chairman ng Senate Committee on Basic Education na nakakatanggap din ang ating mga guro ng dekalidad na edukasyon, lalo na’t sila ang may pinakamahalagang papel sa pagkatuto ng ating mga mag-aaral.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Mga magulang, dapat katuwang sa pagsugpo ng bullying sa kabataan

ni Kuya Win Gatchalian @Win Tayong Lahat | February 23, 2023

Upang mapaigting ang pakikilahok ng mga magulang para sa proteksyon ng kanilang mga anak at masugpo ang bullying, iminumungkahi ng inyong lingkod sa Department of Social Welfare and Development (DSWD) na makipagtulungan sa mga Parent-Teacher Associations (PTA) para sa mas epektibong pagpapatupad ng Parent Effectiveness Service Program Act (Republic Act No. 11908).

Ipinaliwanag ng ilang mga eksperto na madalas ay biktima rin ng karahasan sa kanilang tahanan ang mga batang nambu-bully sa paaralan. Sa datos ng Child Protection Network Foundation, ang maraming kaso ng bullying sa kabataan ay nagsisimula sa kanilang mga tahanan.

Base naman sa National Baseline Study on Violence Against Children in the Philippines na isinagawa noong 2015, tatlo sa lima o 66.5 porsyento ng mga kalahok sa naturang pag-aaral ang nakaranas ng pisikal na karahasan noong kabataan nila. Ayon pa sa pag-aaral, sa tahanan nangyari ang 60 porsyento ng mga kasong ito.

May datos din ang international study na Programme for International Student Assessment (PISA) noong 2018 tungkol sa bullying. Higit kalahati o 65 porsyento ng mga mag-aaral na 15 taong gulang ang nag-ulat na nakaranas sila ng bullying ilang beses sa loob ng isang buwan. Kung ihahambing sa 78 pang bansa na sumali rin sa PISA, ang Pilipinas ang may pinakamataas na bilang ng mga insidente ng bullying sa paaralan.

Dahil sa mahalagang papel ng mga magulang sa pagsugpo ng bullying, hinihikayat ng inyong lingkod ang pagpapatupad sa ating naisabatas na Parent Effectiveness Service Program (PES) Act upang palawakin ang kaalaman ng mga magulang at mga parent-substitutes sa pagganap ng kanilang tungkulin na tugunan ang kapakanan at seguridad ng mga kabataan.

Bago pa maipasa ang batas, ipinapatupad na ng DSWD ang PES para sa mga magulang ng mga mag-aaral ng mga child development centers. Dumadaan ang mga magulang na ito sa orientation ng parent effectiveness service. Pinamumunuan din naman ngayon ng DSWD ang pagbuo ng implementing rules and regulations ng batas kaya kumpiyansa tayo na mapapaigting pa ang ating adhikain laban sa bullying. Ang koordinasyon at pakikipagtulungan ng DSWD sa mga PTA at Department of Education (DepEd) ang pinakamabilis na paraan para maabot natin ang lahat ng mga magulang dahil mayroon sa silang database o listahan ng mga magulang.

Malaking hamon ang pag-abot sa may 20 milyong mga magulang sa bansa, pero kung sisimulan na natin ngayon, mas malayo pa ang mararating.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com