Education Summit sagot sa dekalidad na pag-aaral

ni Kuya Win Gatchalian @Win Tayong Lahat | July 4, 2023

Mahalagang magsagawa ng mga lokal na education summit kada taon para upuan at talakayin ang mga isyu, reporma, at mga programa sa sektor ng edukasyon sa buong bansa.

Ang mungkahing ito ay bahagi ng 21st Century School Boards Act (Senate Bill No. 155) na layong patatagin ang papel ng mga lokal na pamahalaan sa paghahatid at pag-angat ng sistema ng edukasyon.

Sa ilalim ng ating ipinapanukalang batas, papalawigin ang papel ng local school board kung saan isa sa mga magiging bagong responsibilidad nito ang pagsasagawa ng mga education summit upang makonsulta ang mga miyembro ng komunidad tungkol sa mga isyu at suliranin, at para gabayan ang mga prayoridad sa paglalaan ng Special Education Fund (SEF).

Mahalaga itong pagsasagawa ng education summit sa ating mga local government units para masuri natin ang mga hamong kinakaharap. Magiging daan din ang mga summit na ito upang matalakay ang mga solusyon at mga repormang kinakailangan upang maabot natin ang bawat estudyante at masiguro na makakatanggap sila ng dekalidad na edukasyon.

Bahagi rin ng mga iminumungkahing tungkulin ng local school board ang pagbabalangkas at pagpapatupad ng mga reporma sa edukasyon na susukatin sa mga batayang tulad ng participation rate ng mga mag-aaral, bilang ng dropouts at mga out-of-school youth, achievement scores sa mga national tests, assessment tools, at iba pang standardized test scores. Gagawin ding sukatan ang paglikha ng mga child development centers at suporta sa special needs education, Alternative Learning System (ALS), at Parent Effectiveness Service Program.

Target din ng nasabing panukala na palawigin ang paggamit ng SEF upang maisama ang budget para sa sahod ng mga guro, non-teaching personnel, at pre-school teachers. Bukod dito, magiging saklaw din ng pinalawig na paggamit ng SEF ang education research, pagbili ng mga aklat, mga gamit sa pagtuturo, information and communications technology (ICT) packages, at ang pagpapatupad ng ALS.

Patuloy nating aantabayanan at tutugunan ang mga hamon sa edukasyon tungo sa pagpapabuti ng kalidad na natatanggap ng mga kabataang mag-aaral.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Aral Program Act, para makabalik ang mga dropout

ni Kuya Win Gatchalian @Win Tayong Lahat | June 29, 2023

Sa gitna ng ating pagrepaso ng K to 12 program sa ilalim ng Second Congressional Commission on Education (EDCOM 2), isa sa mga prayoridad na mahalagang tugunan ay ang bilang ng mga dropouts — kung saan apat sa 10 mga mag-aaral na pumapasok sa Grade 1 ay umaalis ng paaralan pagdating ng Grade 10.

Kung titingnan natin ang datos ng Department of Education (DepEd) at pagsusuri ng tanggapan ng inyong lingkod, sa 100 na mag-aaral na pumasok sa Grade 1 noong School Year (SY) 2010-2011, 60 lamang ang tumuloy hanggang Grade 10 at 58 lamang ang natapos ng junior high school.

Bilang chairman ng Senate Committee on Basic Education, ang hamon para sa atin ay kung paano tutulungan ang 40% ng mga kabataan na nagda-drop out pagdating ng Grade 10. Kailangang mapag-isipan kung paano mananatili ang mga bata mula Grade 1 hanggang Grade 10 at isa itong hamon na kailangan nating tutukan sa EDCOM.

Ang kawalan ng personal na interes sa pag-aaral ng mga kabataang may edad na 12 hanggang 17 ang nangungunang dahilan ng hindi nila pagpasok sa paaralan. Batay sa 2019 Functional Literacy, Education, and Mass Media Survey (FLEMMS) ng Philippine Statistics Authority (PSA), 41.9% ng mga kabataang may edad na 12 hanggang 15 at 28.3% ng mga may edad na 16 hanggang 17 ang nagsabing wala silang interes pumasok.

Pumapangalawa naman sa dahilan ng kanilang hindi pagpasok ang kawalan ng sapat na kita ng pamilya. Ayon sa parehong survey, 14.4 porsyento ng mga kabataang may edad 12 hanggang 15, at 15.4 porsyento ng mga may edad 16 to 17 ang hindi nagpatuloy sa Grade 10 dahil hindi sapat ang kita ng pamilya.

Kaya naman mariin nating isinusulong ang panukalang ARAL Program Act (Senate Bill No. 1604) para sa pagpapatupad ng mass awareness campaign. Sa ganitong paraan, mahihikayat ang pagbabalik ng mga mag-aaral sa paaralan. Layunin ng panukalang ARAL Program ang pagpapatupad ng pambansang programa para sa learning recovery upang tugunan ang pinsalang dulot ng pandemya ng COVID-19.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Sapat na training para sa dekalidad na edukasyon ng mga titser

ni Kuya Win Gatchalian @Win Tayong Lahat | June 27, 2023

Ngayong pirmado na ang Implementing Rules and Regulations (IRR) ng Excellence in Teacher Education Act o ang Republic Act No. 11713, inaasahan natin ang ganap na pagpapatupad ng batas para matiyak ang dekalidad na edukasyon ng mga guro.

Sa naturang batas na iniakda at inisponsor ng inyong lingkod, patatatagin ang Teacher Education Council (TEC) para paigtingin ang ugnayan sa pagitan ng mga ahensyang may kinalaman sa teacher education and training kagaya ng Department of Education (DepEd), Commission on Higher Education (CHED), at Professional Regulation Commission (PRC). Ito ay upang matiyak ang maayos na transition ng mga guro mula kolehiyo hanggang sa magsimula na silang magturo.

Sa TEC, minamandato ang pagtatakda ng mga pamantayan para sa mga teacher education programs. Titiyakin din ng TEC ang malinaw na ugnayan sa pagitan ng mga teacher education programs at professional standards para sa mga guro at school leaders, pananaliksik, at international best practices.

Tungkulin din ng TEC na bumuo ng roadmap para sa teacher education na isusumite sa CHED at gagawing bahagi ng national higher education roadmap. Gagabayan ng roadmap na ito ang pagdisenyo ng mga angkop, makabago, at malikhaing mga programa.

Bukod dito, tungkulin din ng TEC na magtalaga at magtatag ng mga Teacher Education-Centers of Excellence (COE) sa lahat ng mga rehiyon sa bansa. Ang mga Teacher Education-COEs ay mga pampubliko at pribadong mga kolehiyo, paaralan, o ahensya na may mahusay na track record sa teacher education at pinagmumulan ng mga mahuhusay na graduate.

Lumalabas sa pag-aaral ng Philippine Business for Education (PBEd) sa Board Licensure Examination for Professional Teachers (BLEPT) mula 2010 hanggang 2022, umabot lamang sa 37% ang passing rate sa mga kumuha ng LET sa elementary level at 40% para sa secondary level. Talagang nakadidismaya ang mababang passing rates ng mga kumuha ng Licensure Examination for Teachers.

Kaya naman sa pagsugpo natin sa krisis na bumabalot sa sektor ng edukasyon, mahalagang magarantiya natin na handa at may sapat na kakayahan ang ating mga guro, bagay na magagawa natin kung mabibigyan natin sila ng dekalidad na edukasyon at sapat na pagsasanay. Ipinasa natin ang Excellence in Teacher Education Act upang makamit natin ang layuning ito at kailangan nating tiyakin na maayos itong naipapatupad.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com