Taas-sahod sa mga guro, aksyunan na

ni Kuya Win Gatchalian @Win Tayong Lahat | August 24, 2023

Katulad ng mga kabataang mag-aaral, hindi rin dapat napag-iiwanan ang ating mga public school teachers lalo na pagdating sa natatanggap nilang sahod.

Tunay na makabuluhan at malaki ang papel ng mga guro sa ating lipunan, at sa paghubog ng kaalaman at abilidad ng kanilang mga estudyante.

Sila ang nagsisilbing kaibigan ng mga mag-aaral na dumaraan sa mga pagsubok tulad ng pambu-bully, kawalan ng tiwala sa sarili o hirap sa pag-aaral. Sila rin ang nagpapayo sa mga mag-aaral at pumapagitna kung may alitan ang mga ito.

Bilang epektibong guro, tungkulin nila na hubugin ang bawat kabataan upang sila ay maging mas mabuti at responsableng mamamayan. Sa pamamagitan ng karunungang ibinabahagi ng mga guro sa mga estudyante, marami sa kanila ang posibleng maging susunod na lider sa kani-kanyang mga karera.

Dahil sa kanilang huwarang paglilingkod, karapat-dapat na bigyan ng mataas na paggalang at pagkilala ang mga guro, na itinuturing nating mga pangalawang magulang. Isa na rito ay ang pagtaas sa kanilang sahod.

Noong inilunsad ang Brigada Eskwela, iniulat na ipinag-utos ni Pangulong Bongbong Marcos sa Department of Education (DepEd) na pag-aralan kung ano ang maaaring maging long-term approach para madagdagan ang sahod ng mga guro at kawani, bukod pa ito sa itinaas ng sahod nila sa ilalim ng Salary Standardization Law.

Nakakadismaya dahil napag-iwanan na ang mga Pilipinong guro pagdating sa sahod kung ihahambing sa mga guro sa Timog-Silangang Asya. Sa Indonesia, nakakatanggap ang mga guro ng humigit-kumulang P66,099, samantalang P60,419 naman ang natatanggap ng mga guro sa Singapore.

Isa sa mga prayoridad ng inyong lingkod sa ilalim ng 19th Congress ay ang Senate Bill No. 149 o ang Teacher Salary Increase Act. Sa naturang panukala, iminumungkahi nating itaas ang salary grades (SG) ng mga Teacher I mula SG 11 (P27,000) paakyat sa SG 13 (P31,320). Iminungkahi rin natin na itaas ang sahod ng Teacher II mula SG 12 (P29,165) paakyat sa SG 14 (P33,843), pati na rin ang sahod ng Teacher III mula SG 13 (P31,320) paakyat sa SG 15 (P36,619).

Bukod sa teachers’ salary increase, isinusulong din ng inyong lingkod ang pagbabawas sa gawain ng mga guro at ang pagtiyak na meron silang health insurance.

Plano rin nating amyendahan ang Magna Carta for Public School Teachers (Republic Act No. 4670) at gawin itong mas akma sa mga kasalukuyang hamon na kinakaharap ng mga guro.

Bilang chairman ng Senate Committee on Basic Education, patuloy po nating isusulong ang ating adbokasiya na matugunan ang pangangailangan ng mga guro at maitaguyod ang kanilang kapakanan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Nagbabadyang mental health pandemic, agapan

ni Kuya Win Gatchalian @Win Tayong Lahat | August 22, 2023

Bilang inyong Kuya sa Senado na nagsusulong ng dekalidad na edukasyon sa lahat, mahalaga para sa inyong lingkod na matiyak ang mandato ng gobyerno na isulong ang kapakanan ng kabataang Pinoy sa lahat ng aspeto. Kabilang dito ang pang-pisikal, mental, emosyonal, moral, ispirituwal, at pakikipagkapwa-tao.

Naniniwala tayo na ang susi sa tagumpay upang makamit ang adhikaing ito ay sa tulong ng ating mga teaching at non-teaching personnel sa mga paaralan, ang pangalawang tahanan ng mga kabataan. Bukod sa ating mga magulang, sila ang gagabay at aalalay sa mga mag-aaral. Higit itong kinakailangan lalo na’t laganap ang iba’t ibang mental health concerns na nararanasan ng mga mag-aaral bago pa man magsimula ang pandemya ng COVID-19.

Noong 2019, nakatanggap ang National Center for Mental Health (NCMH), isang psychiatric hospital sa ilalim ng Department of Health (DOH) ng 3,125 na tawag na may kaugnayan sa problema sa mental health, kung saan 712 dito ang may kinalaman sa suicide at 2,413 ang may kinalaman sa iba pang usapin ng mental health. Noong taong iyon din ay nakapagtala ang Philippine Statistics Authority (PSA) ng 2,810 na kaso ng pagpapakamatay.

Ang mas nakakalungkot ay higit na tumaas ang iba’t ibang mga kaso ng mental health problems na humantong sa suicide na naitala noong nagsimula ang COVID-19 pandemic taong 2020. Noong School Year (SY) 2020-2021 at SY 2021-2022, lumalabas sa datos ng Department of Education (DepEd) na may mahigit 400 na mga mag-aaral ang nag-suicide.

Malaking bahagi ng ating tulong ang maibibigay sa mga kabataang nangangailangan ng social at emotional support kung susuportahan natin ang ating mga mental health professionals sa mga paaralan. Sa ilalim ng ating iminumungkahi na Senate Bill No. 379 o ang Education Mental Health and Well-Being Promotion Act, ipinaglalaban natin ang pagtaas ng sahod ng mga guidance counselors upang makahikayat tayo ng mas maraming professionals sa larangang ito.

Nagbabadya na ang pagkakaroon ng mental health pandemic. Kaya naman mahalaga na matiyak ng pamahalaan ang pagkakaroon ng sapat na mental health services kasabay ng paghahatid ng serbisyong pang-edukasyon, kalusugan, at proteksyon ng mga mag-aaral.

Sa hangaring matugunan ito, inihain ng inyong lingkod ang Proposed Senate Resolution No. 671 upang palawakin pa ang sakop at pagandahin ang pagpapatupad ng Mental Health Act (Republic Act No. 11036).

Magsilbi sanang aral ang mga naging karanasan natin noong kasagsagan ng COVID-19 pandemic at bigyan natin ng sapat na prayoridad ang mga pampublikong mental health services sa bansa.

Nais din nating paalalahanan ang lahat na hindi biro ang mga isyu sa mental health.

Palagi nating kumustahin ang ating mga anak, kapatid, pamangkin, apo, at iba pang mahal sa buhay. Ipaabot natin ang naaangkop na tulong para sa kanilang kondisyon at iparamdam natin na may karamay sila at hindi sila nag-iisa.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Ihanda ang mga mag-aaral at guro sa bagong K to 10 curriculum

ni Kuya Win Gatchalian @Win Tayong Lahat | August 17, 2023

Panahon na upang maibalik ang matatag na pundasyon para sa pag-aaral ng mga kabataan at tiyakin na naihahatid sa kanila ang dekalidad na edukasyon.

Noong nakaraang linggo, matagumpay na inilunsad ng Department of Education, na pinangunahan ni Vice President at DepEd Secretary Sara Duterte, ang revised K to 10 curriculum na binansagang MATATAG Curriculum. Ito ang MAkabagong kurikulum na napapanahon. TAlino na mula sa isip at puso. TApang na humarap sa ano man ang hamon sa buhay. Galing ng Pilipino, nangingibabaw sa mundo.

Sa opisyal na pagsusulong ng adhikaing ito, umaasa tayo na hudyat na ito ng pagbangon ng sektor ng edukasyon mula sa pandemya — sa pamamagitan ng pag-angat sa kakayahan o performance ng mga mag-aaral, lalo na pagdating sa foundational skills tulad ng literacy at numeracy.

Sa bagong K to 10 curriculum, tiniyak ng DepEd na maglalaan na ng mas maraming oras sa pagtuturo ng mga basic subjects tulad ng mathematics, science, pagbasa at values formation.

Nakatakdang ipatupad ang bagong curriculum simula School Year 2024-2025.

Mahalagang maihanda rin natin ang kasanayan ng ating mga guro upang masiguro ang kalidad sa pagtuturo ng mga aralin. Bagama’t alam nating propesyonal ang ating mga guro, mahalaga na matiyak na sila ay nabibigyan ng sapat na panahon sa paghahanda nila sa bagong curriculum.

Samantala, patuloy nating sinusuri bilang chairman ng Senate Committee on Basic Education ang pagpapatupad ng K to 12 Law, lalo na’t nananatili ang mga hamon dito na kailangang maresolba.

Kasalukuyan ding pinag-aaralan ng DepEd ang senior high school (SHS) program. Sa Mayo 2024, nakatakda na ang kagawaran na magbigay ng kanilang rekomendasyon ukol dito. Sa Senado naman, inihain ng inyong lingkod ang Batang Magaling Act (Senate Bill No. 2367) upang solusyonan ang mismatch sa pagitan ng mga SHS graduates at pangangailangan ng labor sector.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com