Hiwalay na ahensya para sa mas maayos na education assessment

ni Kuya Win Gatchalian @Win Tayong Lahat | October 26, 2023

Pagdating sa datos at pagsasaliksik, mahalaga na magkaroon tayo ng check and balance upang masuri nating maigi ang kalidad ng edukasyon sa bansa.

Kaya naman maghahain ang inyong lingkod ng isang panukalang batas na layong magtatag ng isang hiwalay na ahensya na siyang magsasagawa ng assessment sa performance ng ating mga kabataang mag-aaral pagdating sa edukasyon.

Kung titingnan nating maigi, ito ang kasalukuyang proseso: ang Department of Education (DepEd) ang bumubuo at nagpapatupad ng curriculum, ito rin ang nagsasagawa ng assessment, sumusuri sa datos, at batay sa mga nagiging resulta ng pag-aaral, mismong DepEd din ang nagwawasto sa sarili nito. Bakit kailangan pang iwasto ng DepEd ang sarili nito kung ito rin mismo ang gumagawa at nagpapatupad ng curriculum? Kaya marapat lamang na magkaroon ng isang independent body na siyang magsasagawa ng assessment, susuri ng mga resulta, at magbibigay ng mga rekomendasyon sa DepEd.

Isang halimbawa nito ang Australia. Mayroon silang National Assessment Program-Literacy and Numeracy (NAPLAN) na sumusukat at sumusuri sa literacy at numeracy ng mga batang Australians. Ang NAPLAN ay itinatag ng Australian Curriculum, Assessment and Reporting Authority, isang hiwalay na tanggapan para sa pagbuo ng national curriculum, national assessment program, at national data collection and reporting program.

Sa Finland naman, isinasagawa ng Finnish Education Evaluation Centre (FINEEC) ang mga evaluation mula early childhood education hanggang sa kolehiyo. Isang malayang ahensya ang FINEEC na ginagabayan ng national education evaluation plan ng Finland.

Taong 1991 pa noong magbigay ang unang Congressional Commission on Education (EDCOM I) ng rekomendasyon na lumikha at magkaroon ng isang malayang national testing and evaluation agency na bubuo, magsasagawa, at magsusuri sana ng mga national achievement tests.

Inirekomenda rin ng EDCOM I noon na magsasagawa at susuri rin sana ng pinaplanong independent body ng iba pang mga test o pagsasanay sa kakayahan, talino, personalidad, equivalency, at mga pambansang scholarships. Nakakalungkot lang na hindi naisakatuparan ang pagbuo ng ahensyang ito.

Ang problema sa atin ay wala tayong organisado at sentralisadong data bank sa kabila ng pagsasagawa ng maraming mga test tulad ng Early Language, Literacy and Numeracy Assessment (ELLNA), National Achievement Test (NAT), Comprehensive Rapid Literacy Assessment (CRLA), Philippine Informal Reading Inventory (PHIL-IRI), at iba pa.

Wala tayong regular at sistematikong pagsusuri ng assessment data upang magabayan ang mga kasalukuyang polisiya sa edukasyon. Hindi rin ibinabahagi sa publiko ang mga assessment dataset para sa pagsusuri, bagay na nagdudulot ng kawalan ng malinaw at napapanahong feedback mechanism sa datos ng assessment ng mga mag-aaral, mga guro, mga eksperto, mga policymakers, at iba pang mga katuwang sa edukasyon.

Marami ang kailangang ayusin pagdating sa pagsusuri ng kakayahan at performance ng kabataang Pilipino sa kanilang pag-aaral. Bilang chairman ng Senate Committee on Basic Education, tungkulin kong maiangat ang kalidad ng kanilang pagkatuto. Sa pamamagitan ng angkop na mga panukala at polisiya, sisikapin nating matupad ito.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Training sa mga titser para ready sa bagong kurikulum

ni Kuya Win Gatchalian @Win Tayong Lahat | October 24, 2023

Isang dahilan kung bakit pinaiigting natin ang pagkakaroon ng Teacher Education Council o TEC ay dahil sa kawalan ng koneksyon sa pagitan ng edukasyon ng mga guro noong sila ay nasa kolehiyo pa at kapag nagtuturo na sila sa mga paaralan. Ang nagiging problema, ituturo ng ating mga guro sa kanilang mga mag-aaral ang isang curriculum na hindi naman nila ginamit sa pagsasanay nila sa kolehiyo. Ito ngayon ang isa sa kinakaharap na suliranin ng sistema ng edukasyon sa bansa.

Kaya naman mariing iginigiit ng inyong lingkod ang panawagan sa TEC na siguruhing nakahanay ang pagsasanay at edukasyon ng mga guro sa kalulunsad lamang na K to 10 MATATAG curriculum.

Sa ilalim ng Excellence in Teacher Education (Republic Act No. 11713), ang Kalihim ng Edukasyon ang itinalagang chairperson sa pinaigting na Teacher Education Council na may mandatong iangat ang pagsasanay at edukasyon ng mga guro. Mandato rin ng TEC na magtalaga ng basic requirements para sa mga teacher education programs o kurso sa edukasyon.

Nakasaad din sa batas na tungkulin ng TEC na paigtingin ang ugnayan sa pagitan ng Department of Education (DepEd), Commission on Higher Education (CHED), at Professional Regulation Commission (PRC) upang matiyak ang ugnayan ng pre-service o ‘yung training at edukasyon ng mga guro mula kolehiyo hanggang sa in-service o ‘yung panahon na nagtuturo na sila sa mga paaralan.

Bahagi ng responsibilidad at kapangyarihan ng Council na iugnay ang bagong curriculum sa mga polisiya, pamantayan, at mga guidelines sa mga kurso ng edukasyon sa kolehiyo.

Sa ilalim din ng naturang batas, ang Quality Pre-service Teacher Education Office, ay minamandatong makipag-ugnayan sa iba’t ibang Teacher Education Institutions (TEIs) upang magbahagi ng mga pinagkukunang resources, kasanayan, pananaliksik, at iba pang mga pinakamahusay na pamamaraan para mapagbuti ang mga teacher education programs.

Iminamandato rin ang pagsasagawa ng pagsusuri para sa intelligent assessment ng Council sa nilalaman ng pagsusulit para sa licensure exam ng mga guro.

Muli rin nating hinihimok ang DepEd na tiyaking may pormal na dokumentasyon at pag-aaral sa pilot run ng MATATAG K to 10 curriculum, na sinimulan noong Setyembre 25 sa 35 na piling paaralan sa pitong rehiyon. Makakatulong sa polisiya ng DepEd ang magiging mga aral mula sa pilot implementation—kabilang na ang feedback mula sa mga mag-aaral at mga guro. Dapat ding tiyakin nating handa ang mga dekalidad na learning materials hanggang sa maipatupad nang ganap ang bagong curriculum.

Kailangan nating kumilos lalo na’t may bago tayong curriculum. Sa pagsugpo natin sa krisis na bumabalot sa sektor ng edukasyon, mahalagang magarantiya natin na handa at may sapat na kakayahan ang ating mga guro.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Dagdag-pondo sa programa para sa edukasyon ng mga bata

ni Kuya Win Gatchalian @Win Tayong Lahat | October 19, 2023

Dahil mas malapit ang mga local government units (LGUs) sa ating mga kababayan at mas nauunawaan nila ang mga agarang pangangailangan ng mga kabataang Pilipino, mahalaga na patatagin ang papel ng mga LGUs sa paghahatid ng dekalidad na edukasyon.

Kaya naman isinusulong ko bilang chairman ng Senate Committee on Basic Education ang 21st Century School Boards Act (Senate Bill No. 155) na naglalayong palawakin ang responsibilidad ng ating mga local school board, kabilang na ang pag-angat sa kalidad ng edukasyon ng mga mag-aaral.

Ang mungkahi na ito ay inspirasyon mula sa mga adbokasiya ng yumaong lider at lingkod bayan na si Jesse M. Robredo at sa mga pagsisikap at inisyatibo ng Synergeia Foundation. Hangad ni Robredo na baguhin ang lokal na komite ng paaralan upang magkaroon ng “large-scale systemic reforms” sa isang sentralisadong pamamahala ng pampublikong sistema ng edukasyon.

Nais din nating palawakin ang paggamit ng Special Education Fund (SEF). Sa ilalim ng Local Government Code (Republic Act No. 7160), nakalaan ang SEF para sa local school board upang magamit sa pagpapatakbo ng mga pampublikong paaralan, at pagpapatayo at pagkumpuni ng mga school building.

Isinusulong din natin ang paggamit nito bilang pansahod sa mga guro at non-teaching personnel sa mga pampublikong paaralan, sahod ng mga pre-school teacher, at capital outlay para sa mga pre-school. Bahagi rin ng panukalang pagpapalawak sa gamit ng SEF ang pagpapatakbo ng mga programa sa Alternative Learning System (ALS), pati na sahod at mga benepisyo ng mga guro sa mga karagdagang serbisyo sa labas ng regular school hours, at iba pa.

Naalala ko noong nanunungkulan pa ako bilang alkalde ng Lungsod ng Valenzuela ng siyam na taon, isinulong natin ang mga reporma sa edukasyon. Sa aking naging karanasan, masasabi kong talagang mabilis ang mga LGUs sa pagtugon sa mga pangangailangan ng kanilang mga nasasakupan. Kaya kung maisasabatas ang ating panukala, magiging katuwang natin ang bawat LGU sa pag-angat sa kalidad ng edukasyon.

Sa ilalim ng panukala ng inyong lingkod, bibigyan ng mandato ang local school board na magpatupad ng mga programa na susukatin ang tagumpay batay sa participation rate ng mga mag-aaral, bilang ng mga dropouts at mga out-of-school youth, achievement score sa mga national test o assessment tools, pagpapatayo ng mga child development centers, suporta sa special needs education, ALS, at ang parent effectiveness service program.

Naghain din ang inyong lingkod ng iba pang mga panukalang batas na naglalayong mapalawak ang papel ng mga LGU sa edukasyon. Isang halimbawa ang Basic Education and Early Childhood Education Alignment Act (Senate Bill No. 2029) na isinusulong ang pagpapatupad ng mga programa para sa early childhood care and development programs.

Kabilang dito ang panukalang karagdagang pondo upang matiyak natin ang kalidad ng Early Childhood Care and Development (ECCD) services na matatanggap ng mga bata.

Ipinapanukala rin ang pagtatalaga ng mga LGU ng mga plantilla positions para sa mga child development workers at child development teachers at pagsusulong ng kanilang professional development.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com