top of page
Search

Tiyakin ang kahandaan ng mga senior high school para makapagtrabaho

  • BULGAR
  • Mar 7, 2024

ni Kuya Win Gatchalian @Win Tayong Lahat | Marso 7, 2024

Ang Batang Magaling Act o Senate Bill No. 2367, na inihain ng inyong lingkod, ay mahalaga upang masiguro ang kahandaan sa trabaho ng ating graduates sa senior high school (SHS). Kapag naisabatas ang ating panukala, titiyakin nito na may sapat na kaalaman, pagsasanay, at kakayahan ang mga senior high school graduate para sa pipiliin nilang tatahaking landas: higher education o kolehiyo, middle-level skills development, trabaho, at pagnenegosyo.


Pero kahit ipinangako ng senior high school program ang kahandaan ng mga graduate na pumasok sa trabaho, lumalabas na may mismatch sa pagitan ng kakayahan o skills ng mga nagsipagtapos at ng pangangailangan ng labor market. Ayon sa isang 2020 discussion paper ng Philippine Institute for Development Studies (PIDS), 20 porsyento lang ng mga SHS graduate ang nakakapasok ng labor force.


Mahalaga na matugunan ang mga hamong kinakaharap ng naturang programa. Kaya nga kasabay ng plano ng Department of Education (DepEd) na simulan ang revised senior high school curriculum para sa School Year (SY) 2025-2026 ay ang ating panawagang paigtingin ang kahandaan ng mga SHS graduate na pumasok sa kolehiyo, at pagkatapos, ay makapagtrabaho.


Lumabas din sa pag-aaral ng PIDS na kung ihahambing sa mga nakatapos ng Grade 10 at second year college, walang pinagkaiba ang mga senior high school graduate pagdating sa basic pay kada araw.


Bukod sa kahandaan sa trabaho, layon din ng ating panukala ang paglikha ng National Batang Magaling Council na bubuuin ng DepEd, Technical Education and Skills Development Authority (TESDA), Department of Labor and Employment (DOLE), tatlong national industry partners, isang national labor group, at ng Union of Local Authorities of the Philippines.


Magiging mekanismo ang Council para iugnay ang mga curricular offering ng mga paaralan at work immersion component ng senior high school sa pangangailangan ng merkado na tinukoy ng industry partners at government agencies. Kasama rin sa magiging mandato na palawakin ang kaalaman ng industry partners at mga ahensya ng gobyerno upang tanggapin ang mga mag-aaral sa iba’t ibang mga work immersion program.


Dapat ding tiyakin ng pribadong sektor at ng gobyerno na angkop ang deployment ng mga senior high school graduate sa kanilang tracks, at makukuha ng mga mag-aaral ang specialized skills at competencies upang magtagumpay sa kanilang mga napiling karera.


Bilang chairman ng Senate Committee on Basic Education, patuloy nating isusulong ito.


Kung maging batas ang Batang Magaling Act, matitiyak natin ang kahandaan ng mga kabataan upang makapaghanapbuhay sila batay sa kanilang galing at kasanayan.


Matitiyak din natin na katuwang natin ang pribadong sektor upang mabigyan ng trabaho ang ating senior high school graduates. 


May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

 
 

Mahihirap na Mag-aaral, tiyaking prayoridad sa Educational Assistance

  • BULGAR
  • Mar 5, 2024

ni Kuya Win Gatchalian @Win Tayong Lahat | Marso 5, 2024

Ayon sa Annual Poverty Indicators Survey (APIS), 68 porsyento ng mga benepisyaryo ng Educational Service Contracting (ESC) program noong school year 2020-2021 ay galing sa mga non-poor household.


Ang ESC ay isang partnership program ng Department of Education (DepEd) na layong solusyunan ang congestion sa mga public junior high school. Dito, binabayaran ng gobyerno ang matrikula at ibang bayarin ng mga mag-aaral na napiling benepisyaryo mula sa mga pampublikong paaralan upang pumasok sa mga pribadong paaralang kinontrata ng DepEd. Noong school year 2019-2020, mas mataas din ang bilang ng mga benepisyaryong tinaguriang non-poor – 59 porsyento. Sinusukat ang isang pamilya na non-poor kung ang kabuuang kita nila ay lagpas o katumbas ng per capita threshold.


Sinasalamin ng mga numerong nabanggit ang naging ulat ng Commission on Audit (COA) noong 2018. Sa isang Performance Audit Report, inirekomenda ng komisyon sa DepEd na tiyaking prayoridad ang mga mahihirap na mag-aaral sa implementasyon ng Expanded Government Assistance to Students and Teachers in Private Education (GASTPE) Act (Republic Act No. 8545) o ang e-GASTPE Law. Ang ESC ay isang programa sa ilalim ng GASTPE.


Kaya naman “the height of injustice” ang tawag ko rito. Hindi makatarungan ang alokasyon ng slots sa ilalim ng programang ESC.


Base sa pag-aanalisa ng aking tanggapan, umaabot sa 8.6 bilyong piso ang leakage ng programa dahil ang inilaan nating pondo para rito ay hindi rin naman napupunta sa mas nangangailangang mga mag-aaral.


Intensyon ng batas na bigyang prayoridad ang mga mahihirap. Kaya nakakadismaya na malaman na sa ilalim ng ESC guidelines mula pa noong 2017 ay hindi nakamandatong bigyan ng prayoridad ang mga mahihirap na mag-aaral. Ang naturang guidelines ay nagbibigay lamang ng ‘preference’ sa mga tinaguriang poor students.


Bagama’t sinabi na ng Government Assistance and Subsidies Office (GASO), isang sangay ng DepEd, na inaayos na nila ngayong taon ang guidelines para sa ESC. Patuloy nating isusulong ang paglalaan ng malaking pondo para sa mga mas nangangailangan sa sektor ng edukasyon. Kaugnay nito, pinag-iisipan din ng inyong lingkod na amyendahan ang e-GASTPE law.

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

 
 

Batang Magaling Act, sagot sa job skills mismatch

  • BULGAR
  • Feb 29, 2024

ni Kuya Win Gatchalian @Win Tayong Lahat | Pebrero 29, 2024

Natalakay natin sa mga nagdaang kolum na mababa ang certification rates ng mga senior high school (SHS) graduate sa technical-vocational-livelihood (TVL) track.


Naitala na 25.7 porsyento lamang noong School Year (SY) 2019-2020 habang 6.8 porsyento naman noong SY 2020-2021 ang nakakuha ng certificate.


Maraming trainees ng Technical Vocational and Education Training o TVET ang sumailalim sa mga programang National Certificate I at National Certificate II pero, kakaunti na lang sa kanila ang dumadaan sa NC III, NC IV, at sa mga programang may mas matataas na lebel na nakatutok sa mas kumplikadong skills na hinahanap ng mga kumpanya.


Bakit? Dahil hindi kayang tustusan ng karamihan sa kanila ang NC assessment na umaabot sa humigit-kumulang P1,009.29 kada estudyante.


Sa pamamagitan ng certification, maaaring tumaas ang tsansa ng ating mga TVL graduate ng SHS na makakuha ng maayos at magandang trabaho. Kaya naman sa mga naging deliberasyon para sa 2024 national budget, mariing isinulong ng inyong lingkod ang paglalaan ng pondo para sa assessment at certification ng mga mag-aaral.


Sa ilalim ng 2024 General Appropriations Act (GAA), P438.16 milyon ang inilaan sa pondo ng TESDA Regulatory Program para sa assessment at paggawad ng National Certification (NC) sa mag-aaral ng TVL sa senior high school. Tinatayang 420,900 Grade 12 TVL graduates ang sasaklawin ng naturang pondo.


Ayon sa isang pag-aaral ng Philippine Institute for Development Studies noong 2020, ang average daily basic pay ng senior high school graduates ay P316 — ito ay mas mataas lang ng P14 sa mga nakatapos ng junior high school.


Bilang chairman ng Senate Committee on Basic Education, nais tiyakin ng inyong lingkod na magagamit nang tama ang inilaan nating pondo upang matulungan ang mga Grade 12 TVL graduate. Sa ating inihaing Proposed Senate Resolution No. 935, susuriin natin ang kahandaan ng Department of Education (DepEd) at ng Technical Education and Skills Development Authority (TESDA) na ipatupad ang libreng Senior High School Assessment and Certification Support Program. Umaasa tayo na makakatulong ang kanilang certification para tugunan ang kawalan nila ng labor market advantage.


Sa patuloy nating pagtugon sa isyu ng job skills mismatch, isinusulong din ng inyong lingkod ang panukalang Batang Magaling Act (Senate Bill No. 2022) upang matulungan ang mga K to 12 graduate na makamit ang angkop at sapat na kaalaman, kahusayan at kasanayan na required sa mga kumpanya. Isinusulong natin ang paglikha ng National at mga Local Batang Magaling Councils upang paigtingin ang ugnayan sa pagitan ng DepEd, local government units, ang akademya, at pribadong sektor para tugunan ang mismatch sa skills ng mga K to 12 graduate at sa mga pangangailangan ng labor market.


May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

 
 
RECOMMENDED
bottom of page