Learning loss ng mga kabataan, tiyak nang matutugunan

ni Kuya Win Gatchalian @Win Tayong Lahat | August 15, 2024

Masaya tayong ibalita na niratipikahan na ng Senado ang bicameral conference committee report ng Academic Recovery and Accessible Learning (ARAL) Program Act (Senate Bill No. 1604 at House Bill No. 1802). Malaking hakbang ito tungo sa pagpapatupad ng isang epektibong programa sa learning recovery na tutugon sa learning loss ng mga mag-aaral.

Layon ng panukalang batas na magtatag ng learning intervention na magkakaroon ng mga sistematikong tutorial sessions, pati na rin ng intervention plans at learning resources na may maayos na disenyo. Sa ilalim ng naturang panukala, bubuuin ang mga intervention plans at learning resources sa tulong ng mga curriculum at reading specialists. Ipapatupad din ng panukalang programa ang learner-centered approach na sumusuporta at tumutugon sa mga pangangailangan, motibasyon, at asal ng mga mag-aaral.

Bilang pangunahing may-akda at sponsor ng nasabing bill, iniayon ng inyong lingkod ang panukala para makatulong sa pagtugon sa krisis na kinakaharap ng bansa sa edukasyon, bagay na sinasalamin ng performance ng Pilipinas sa mga international large-scale assessments tulad ng 2022 Programme for International Student Assessment (PISA). Matatandaan na sa ginanap na 2022 PISA, lumabas na isa ang Pilipinas sa 10 bansa na may pinakamababang marka pagdating sa reading, mathematics, at science.

Isinulong natin ang pagkakaroon ng ARAL Program upang matulungan ang ating mga mag-aaral na nangangailangan ng dagdag na suporta. Kung tuluyang maisabatas ang ating panukala, mapipigilan natin ang pag-urong ng kaalaman at matitiyak nating walang batang maiiwan sa kanyang pag-aaral.

Sasaklawin ng ARAL Program ang essential learning competencies sa reading at mathematics para sa Grade 1 hanggang Grade 10, at science para sa Grade 3 hanggang Grade 10. Bibigyan ng prayoridad ng naturang programa ang reading at mathematics upang hasain ang critical at analytical thinking skills ng mga bata. Para naman sa mga estudyante sa Kindergarten, tututukan ang pagpapatatag sa literacy at numeracy competencies.

Saklaw ng ating panukala ang mga magbabalik-paaralan, mga mag-aaral na hindi umabot sa minimum proficiency level sa reading, mathematics at science, at ang mga mag-aaral na hindi pumapasa sa kanilang mga examination o test.

Nag-umpisa ang ideya ng ating panukalang ARAL Program noong kasagsagan ng pandemya sa intensyong mapaigting ang learning recovery kasunod ng epekto ng pandemya. Sa programa, titiyakin na makakatanggap ang mga estudyante ng sapat na oras para sa pag-aaral, sisiguraduhing natututunan nila ang essential learning competencies at maaabot nila ang kanilang mga lesson.

Nagpapasalamat tayo sa ating mga kapwa senador na kasama natin sa pagbuo nitong panukalang batas. Bilang chairman ng Senate Committee on Basic Education ay titiyakin nating makakahabol sa kanilang mga aralin ang mga kabataang mag-aaral.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Learning Recovery Program ng mga kabataan, mas palakasin

ni Kuya Win Gatchalian @Win Tayong Lahat | August 13, 2024

Matatandaang isinulong na natin noon ang malawakang reporma sa National Learning Recovery Program (NLRP) sa ilalim ng Department of Education (DepEd). Pero napag-alaman natin sa pinakahuling pagdinig ng Senate Committee on Basic Education na hindi pala natutugunan ang dapat sana’y target na mga mag-aaral na nangangailangan ng intervention. Bukod dito, lumalabas na hindi rin epektibo ang ipinapatupad na programa upang makasabay ang mga mag-aaral sa kanilang grade level.

Target ng DepEd na isailalim sa pagsusulit ang 1.7 milyong estudyante ng Grade 7 ngunit tanging 53.69 porsyento lamang ang nakalahok. Ayon sa mga datos, nasa 10 porsyento lamang ng mga mag-aaral na nangangailangan ng intervention ang dumalo sa learning camps. Palibhasa, boluntaryo lang kasi ang pagdalo sa mga ganitong learning camp, sabi ng DepEd. 

Bukod dito, hindi nagpapabuti ng mga marka o score ng mga mag-aaral ang National Learning Camp Assessments (NLCA) na isinagawa para sa mga estudyante ng Grade 8. Batay sa pangkalahatang resulta ng 2023 NLCA, habang ang average ng mga Grade 8 sa mga pre-test sa English, Science, at Math ay 37.23, ang average naman ng mga nasa Grade 9 sa post-test ng parehong mga subject ay 35.74 lamang.

Nang dahil sa kakulangan ng sapat na datos ay hindi mabisang nata-target at naaabot ng DepEd ang mga mag-aaral na nangangailangan ng interbensyon. At dahil hindi natutukoy ng programa ang mga estudyante na dapat na suportahan, hindi rin epektibo ang paggamit ng pondong inilalaan para rito.

Sa madaling salita, kailangan nating ayusin ang intervention program dahil maraming mag-aaral ang nangangailangan ng tulong sa kanilang pag-aaral. Kailangan nila ng government resources. Kaya naman hinihimok ng inyong lingkod na gamitin ang lahat ng mga pondo para rito.

Bilang chairman ng Senate Committee on Basic Education, patuloy ang pagsulong ng mga panukala na makatutulong sa pag-angat ng kalidad ng edukasyon, kabilang na ang Academic Recovery and Accessible Learning (ARAL) Program Act (Senate Bill No. 1604).

Inaasahan nating raratipikahan na ito ng Kongreso. Layon ng naturang panukalang batas na magtaguyod ng intervention programs para sa mga bata at magkaroon ng mga sistematikong tutorial session at dinisenyong intervention plans sa pag-aaral.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Pagbabawal ng cellphone sa iskul, suportado ng taumbayan

ni Kuya Win Gatchalian @Win Tayong Lahat | August 8, 2024

Pagdating sa paggamit ng mga gadget sa loob ng paaralan, hindi maiwasang mapag-diskusyunan kung dapat o hindi ba dapat pahintulutan. Ano ba talaga ang tama?

Lumabas sa isang Pulse Asia survey na kinomisyon ng tanggapan ng inyong lingkod na halos walo sa 10 mga Pilipino ang sumasang-ayon sa pagbabawal sa paggamit ng cellphone sa mga paaralan. Batay sa survey na isinagawa noong Hunyo 17 hanggang 24, 2024, 76 porsyento ng mga 1,200 adult respondents sa buong bansa ang sumasang-ayon sa pagkakaroon ng cellphone ban sa mga paaralan. Nasa 13 porsyento ang hindi sumasang-ayon, samantalang 11 porsyento naman ang nagsasabing hindi nila matukoy kung sumasang-ayon sila o hindi.

Suportado ang panukala ng karamihan ng mga Pilipino anumang socioeconomic class ang pinagmulan nila. Pinakamalakas ang suporta sa Class ABC (80 porsyento), kasunod ng Class D (76 porsyento), at Class E (71 porsyento). 

Kung susuriin naman ang iba’t ibang lokasyon sa bansa, lumalabas na suportado pa rin ng mayorya ng mga Pilipino ang panukalang ipagbawal ang paggamit ng cellphones sa mga paaralan. Lumalabas na halos 8 sa 10 kalahok sa National Capital Region (80 porsyento), Balance Luzon (79 porsyento), at Mindanao (81 porsyento) ang sumasang-ayon sa naturang panukala. Samantala, 6 sa 10 (61 porsyento) na kalahok naman mula sa Visayas ang sumasang-ayon dito. 

Ipinapakita ng survey na nababatid ng mga Pilipino ang maaaring maging benepisyo sa pagbabawal ng paggamit ng mga cellphone sa paaralan, lalo na’t nakakaapekto sa performance ng mga mag-aaral ang abalang idinudulot ng mobile phones. Batay sa pagsusuring ginawa ng Senate Committee on Basic Education sa 2022 Programme for International Student Assessment (PISA), walo sa 10 mag-aaral na may edad 15 ang iniulat na naabala sila sa klase dahil sa paggamit nila ng smartphones, at 8 rin sa 10 ang nag-ulat na naabala sila sa paggamit ng ibang mga mag-aaral ng kanilang mga smartphone.

Noong nakaraang Hunyo, inihain na ng inyong lingkod ang Electronic Gadget-Free Schools Act (Senate Bill No. 2706) na layong ipagbawal ang paggamit ng mga mobile devices at electronic gadgets mula Kindergarten hanggang Senior High School sa loob ng mga paaralan habang may klase.

Malinaw na suportado ng ating mga kababayan ang ating panukala na ipagbawal ang paggamit ng mga cellphone sa mga paaralan, lalo na kapag oras ng klase ay maaaring makapinsala sa kanilang pag-aaral. Kaya naman patuloy nating isinusulong ang panukalang batas na pag-ban sa paggamit ng cellphone sa oras ng klase.

Bilang chairman ng Senate Committee on Basic Education, nais nating paalalahanan ang ating mga kabataang mag-aaral at magulang: may pakinabang ang gadget sa bawat isa, ngunit dapat ay may limitasyon, lalo na sa loob ng klasrum. Laging tandaan, nasa ating disiplina ang susi ng tagumpay!

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com