Kulturang Muslim, ituro rin sa iskul

ni Kuya Win Gatchalian @Win Tayong Lahat | December 29, 2022

Bago matapos ang taon, tiniyak ng inyong lingkod bilang Chairman ng Senate Committee on Basic Education na naihain ang mahahalagang panukalang batas. Kabilang na ang isinusulong natin na layong gawing institutionalized ang Arabic Language and Islamic Values Education o ALIVE sa lahat ng mga pampubliko at pribadong paaralan sa labas ng Bangsamoro Autonomous Region in Muslim Mindanao (BARMM).

Hangad ng Senate Bill No. 382 o ang Arabic Language and Islamic Values Education Act na bigyan ang mga mag-aaral na Muslim ng angkop na edukasyon habang kinikilala ang kanilang kultura. Tinitiyak at kinikilala rin ng naturang panukala ang ambag ng mga Pilipinong Muslim bilang katuwang sa pagkamit ng mga layunin ng bansa. Kapag naisabatas na, ang Arabic Language at Islamic Values Education ay ituturo sa parehong mga kabataang Muslim at hindi Muslim.

Naniniwala tayong naaayon ang panukalang batas sa pagsusulong ng inclusive education upang tugunan ang iba’t ibang pangangailangan ng mga mag-aaral at tiyakin ang kanilang ganap na pakikilahok at pagkamit ng kahusayan nang naaayon sa kanilang kultura at komunidad.

Titiyakin din ng panukala ang pagkakaroon ng sapat na textbook at instructional materials, pati na ang pagsasanay sa asatidz o guro sa komunidad ng mga Pilipinong Muslim. Isinusulong din ng panukalang batas ang pagbibigay ng technical assistance at tulong-pinansyal sa mga DepEd-accredited madaris o pribado at community-based na mga paaralang nakatutok sa Islamic studies at Arabic literacy.

Bilang pagkilala sa kultura at kontribusyon ng ating mga kababayan at mag-aaral na Muslim, ipinaglalaban natin ang mas pinaigting na mga programa sa ilalim ng Arabic Language and Values Education. Higit sa lahat, kasama rin ito sa ating pagsisikap para matiyak na pagdating sa dekalidad na edukasyon ay hindi mapag-iiwanan ang mga mag-aaral na Muslim.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Sex education solusyon sa pagtaas ng teenage pregnancy

ni Kuya Win Gatchalian @Win Tayong Lahat | December 27, 2022

Mahalaga ang pagbibigay-proteksyon sa kabataang mag-aaral. Kaya naman sa Senate Committee on Basic Education, patuloy ang pagpapaigting ng pagpapatupad ng sexuality education para sa patuloy na pagbaba ng bilang ng maagang pagbubuntis ng kabataan. Itong pagbaba ng teenage pregnancy ay isa sa mga naging benepisyo ng Responsible Parenthood and Reproductive Health Act of 2012 o RH Law.

Sa isang forum na isinagawa ng Philippine Legislators’ Committee on Population and Development (PLCPD), United Nations Population Fund (UNFPA), at ng Commission on Population and Development (POPCOM), iniulat ni Department of Health (DOH) officer-in-charge Maria Rosario Vergeire, na ang adolescent birth rate sa bansa ngayong taon ay bumaba na sa 25 kada 1,000 kababaihan, mas mababa sa naunang 2022 target na 37 kada 1,000 kababaihan. Sa kabila nito, sinabi ng opisyal ng DOH na nananatili pa ring mataas ang bilang ng mga teenage pregnancies o maagang pagbubuntis sa bansa.

Kung ating matatandaan sa mga nagdaang kolum, ibinahagi natin ang babala ng UNFPA na mas hirap makatapos ng pag-aaral ang kababaihang nagdalang-tao bago ang edad 18.

Sa kabila ng pagkakaroon ng Department Order (D.O.) No. 31 s. 2018 para gabayan ang pagpapatupad ng Comprehensive Sexual Education o CSE, pinuna ng UNFPA ang matagal na integration nito sa K to 12 curriculum. Lumabas din sa pag-aaral ng Philippine Institute for Development Studies (PIDS) ang ilan sa mga kakulangan sa pagpapatupad ng RH education, kabilang ang hindi sapat na manpower, pasilidad, pagsasanay, instructional materials at iba pa.

Kaya kahit bumababa ang bilang kabataang nabubuntis, kailangang masuri pa rin natin kung paano natin tinuturuan ang kabataang kababaihan na iwasang malagay sa sitwasyon ng pagiging mga batang ina.

Kailangan ng mariing pagsusuri ng pamahalaan kung nakakapagpatupad nga ba ito ng epektibong sexuality education sa mga paaralan. Ang inyong lingkod ay naghain ng Proposed Senate Resolution No. 13 na layong repasuhin ang saklaw at pagiging epektibo ng kasalukuyang polisiya ng Department of Education (DepEd) sa CSE.

Mahalagang mapigilan natin ang paglobo ng bilang ng teenage pregnancies, lalo na’t ang mga batang ina ay madalas hindi nakakatapos ng kanilang edukasyon at napagkakaitan ng magandang kinabukasan. Tulungan at suportahan natin sila.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

2 years mandatory ROTC sa kolehiyo

ni Kuya Win Gatchalian @Win Tayong Lahat | December 22, 2022

Inihain natin kamakailan ang panukalang batas na layong ibalik ang dalawang taong mandatory Basic Reserve Officers’ Training Corps (ROTC) Program at ang two-year voluntary Advance ROTC Program sa kolehiyo.

Saklaw ng Senate Bill No. 1551 o Mandatory Basic Reserve Officers’ Training Corps (ROTC) Act ang lahat ng mga mag-aaral na kumuha ng undergraduate degree, diploma o certificate program sa lahat ng pampubliko at pribadong mga pamantasan, kolehiyo, vocational schools at iba pang tertiary educational institutions.

Sa ilalim ng Basic ROTC program, ang mga mag-aaral sa kolehiyo ay dadaan sa basic military at leadership training. Ito ay upang paigtingin ang kakayahan ng bansa na rumesponde sa panahon ng digmaan, sakuna at kalamidad. Maliban sa military training, magiging bahagi rin ng Basic ROTC ang civic training at mas maigting na paghahanda sa pagresponde sa kalamidad.

Naniniwala tayong mas mainam na ibalik ang Basic ROTC sa kolehiyo imbes na ipatupad ito sa Senior High School. Mas kailangan kasing tutukan ang learning recovery sa basic education, lalo na’t nakaranas ang mga mag-aaral ng learning loss dahil sa COVID-19 pandemic. Bukod dito, ang pagdagdag ng Basic ROTC sa Senior High School ay salungat sa ginagawang pagrepaso sa K to 12 curriculum, kaya ating binawi ang naunang panukalang ROTC sa high school.

Bukod dito ay kapuna-puna rin ang magiging gastos sa pagpapatupad ng Basic ROTC sa Senior High School. Tinataya ng Department of Education (DepEd) at Department of National Defense (DND) na kakailanganin ang mahigit siyam na bilyong piso para sa pagpapatupad ng programa sa buong bansa, isang napakalaking halaga sa gitna ng paahon pa lamang na ekonomiya mula sa pandemic COVID-19.

Pero hindi nangangahulugang absuwelto na ang mga nasa Senior High School dahil kung ipatutupad ang Basic ROTC sa kolehiyo, sasalang din sa programa ang malaking porsyento ng Senior High School graduates upang maging bahagi ng Reserve Force. Nitong nakaraang apat na taon, 81 porsyento ang average ng mga Senior High School graduates na nagpatuloy sa kolehiyo.

Bilang Chairman ng Senate Committee on Basic Education, isinusulong ng inyong lingkod ang pagbabalik ng Basic ROTC upang ituro sa ating mga kabataan ang disiplina at pagmamahal sa ating bansa, lalo na’t sila ang susunod na mamumuno sa bansa.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com