19 nawawala sa landslide sa Japan

ni Ronalyn Seminiano Reonico | July 3, 2021

Labingsiyam na katao ang nawawala sa Japan dahil sa landslide na dulot ng malakas na pag-ulan ngayong Sabado, ayon sa lokal na opisyal.

Saad ng disaster management officials ng Shizuoka Prefecture, tinatayang nagsimula ang landslide bandang alas-10:30 nang umaga sa Atami.

Ayon kay Prefectural Disaster Management Official Takamichi Sugiyama, pinalilikas na rin ang mga residente sa mga apektadong lugar.

Samantala, humiling na rin ang lokal na pamahalaan ng military assistance para sa pagsasagawa ng rescue mission at nawalan din ng suplay ng kuryente ang aabot sa 200 tahanan.

Dahil sa ulan at malakas na hangin… Ashfall ng Taal, aabutin ang iba pang lugar

ni Ronalyn Seminiano Reonico | July 3, 2021

Namataan ang dalawang low pressure areas (LPA) sa labas ng Philippine Area of Responsibility (PAR) at ayon sa National Disaster Risk Reduction and Management Council (NDRRMC), posible nitong maapektuhan ang direksiyon ng ashfall na ibinubuga ng Bulkang Taal.

Ayon naman kay NDRRMC Executive Director Ricardo Jalad, malabong maging tropical storms ang mga LPA.

Saad ni Jalad, “But ‘yung low pressure area na ‘yan ay magdudulot ng pag-ulan at paglakas ng hangin. At ‘yung hangin na ‘yun ay posibleng magtulak ng ashfall doon sa iba’t ibang lugar.”

Nagkaroon na rin umano ng pagpupulong ang PAGASA at NDRRMC ukol sa posibleng maging direksiyon ng hangin at sa maaaring maging epekto nito sa aktibidad ng Bulkang Taal.

Aniya, “So titingnan natin sa advisory na ibibigay sa atin… but for the purpose of forecasting, ipapakita namin ‘yung ibinigay na possible wind direction na pagdala nitong LPA at para sa knowledge ng ating mga kababayan.”

Samantala, nananatiling nakataas sa Alert Level 3 ang Bulkang Taal.

9 patay, 1 nawawala kay Bagyong Dante

ni Mary Gutierrez Almirañez | June 5, 2021

Siyam ang patay at 1 ang nawawala sa pag-alis ni Bagyong Dante sa Philippine Area of Responsibility (PAR), batay sa tala ng National Disaster Risk Reduction and Management Council (NDRRMC) ngayong araw, June 5.

Kabilang sa casualties ang mga nakatira sa MIMAROPA, Regions VI, VII, VIII, XI at XII.

Ayon pa sa ulat, halos 93,683 indibidwal na binubuo ng mahigit 22,839 pamilya ang naapektuhan ng bagyo. Kabilang dito ang 732 pamilya o 2,753 indibidwal na pansamantalang nagpapahupa ng baha sa 50 evacuation centers sa iba’t ibang rehiyon.

Dagdag pa ng NDRRMC, 81 kabahayan ang nasira sa Regions VI, VIII at XI, kung saan umabot sa P86,110,147.60 ang halaga ng mga napinsala. Nagkakahalaga naman ng P53,730,000 ang mga napinsalang imprastraktura sa MIMAROPA, Regions VII, XII at CARAGA.

Samantala, 691 rolling cargoes, 46 vessels at 2,085 pasahero naman ang na-stranded dahil sa nakanselang 40 sea trips sa CALABARZON, MIMAROPA, Regions V, VI, VIII at CARAGA nu’ng kasagsagan ng bagyo.

Nagpaabot naman ng P1,925,967.26 na tulong ang lokal na pamahalaan at Department of Social Welfare and Development (DSWD) sa mga pamilyang naapektuhan.

Sa ngayon ay papunta na ang Bagyong Dante sa Ryukyu Islands, Japan.