'Fabian,’ ganap nang bagyo — PAGASA

ni Ronalyn Seminiano Reonico | July 18, 2021

Ganap nang bagyo o tropical storm ang tropical depression Fabian, ngayong Linggo, ayon sa PAGASA. Huling namataan ang Bagyong Fabian sa 1,090 kilometers east northeast ng Extreme Northern Luzon at kumikilos sa north northwest na taglay ang lakas ng hanging umaabot sa 65 kilometers per hour at may bugsong umaabot sa 80 kph, ayon sa 5 AM bulletin ng PAGASA.

Sa ngayon ay wala pang itinataas na tropical cyclone wind signals at posible rin umanong hindi magdadala ng malakas ng pag-ulan ang bagyo, ayon sa PAGASA ngunit paiigtingin ng TS Fabian at ng isa pang low pressure area na namataan sa 630 km West ng Calayan, Cagayan na nasa labas ng Philippine area of responsibility (PAR) ang Southwest Monsoon.

Dahil dito, makararanas ng pag-ulan ang Western Visayas, Palawan, at Occidental Mindoro “in the next 24 hours.” Samantala, inaasahang lalabas ng PAR ang TS Fabian sa Lunes nang gabi.

2 patay, 20 nawawala sa landslide sa Japan

ni Ronalyn Seminiano Reonico | July 5, 2021

Dalawa na ang kumpirmadong nasawi sa landslide sa Atami, Japan noong Sabado na dulot ng malakas na pag-ulan.

Ayon sa lokal na pamahalaan, sampu ang na-rescue na at aabot naman sa 20 ang bilang ng mga nawawala pa.

Sa tala ng disaster management officials ng Shizuoka Prefecture, naganap ang landslide bandang alas-10:30 nang umaga kung saan maraming kabahayan ang nasira kaya aabot sa 1,000 rescuers ang ipinadala kabilang na ang 140 military personnel.

Saad naman ni Prime Minister Yoshihide Suga sa isinagawang emergency meeting, “It’s possible that the number of damaged houses and buildings is as many as 130. I mourn the loss of life.

“This rainy-season front is expected to keep causing heavy rain in many areas. There is a fear that land disasters could occur even when the rain stops.”

Nagbabala naman si Takeo Moriwaki, professor ng geotechnical engineering sa Hiroshima Institute of Technology na posibleng magkaroon ulit ng landslide.

Aniya, “Landslides can occur again and again at the same place even if the rain stops. Residents and rescuers should remain on alert.”

Samantala, pinalikas na rin ang mga residente ng iba pang lungsod sa Shizuoka Prefecture dahil sa banta ng landslides.

Batanes at Cagayan, Signal No. 1 dahil sa Bagyong Emong

ni Lolet Abania | July 4, 2021

Inilagay ang dalawang lugar sa bahaging Luzon sa Tropical Cyclone Wind Signal No. 1 dahil sa Bagyong Emong ngayong Linggo.

Sa alas-5:00 ng hapon na severe weather bulletin ng PAGASA, isinailalim sa TCWS No. 1 ang Batanes at ang northeastern portion ng Cagayan (Santa Ana, Gonzaga) kabilang na ang Babuyan Islands.

Ayon sa PAGASA, ang sentro ng Tropical Depression Emong ay nasa layong 780 kilometro silangan ng Virac, Catanduanes nang alas-4:00 ng hapon na may maximum sustained winds na 55 kilometro kada oras malapit sa sentro at pabugsong hangin na aabot sa 70 kph. Kumikilos ito hilaga-hilagang-kanluran ng 25 kph.

Sinabi pa ng PAGASA, asahan na si ‘Emong’ ay lalakas at magiging tropical storm sa susunod na 24 oras na maaaring makaapekto sa buong Batanes-Babuyan Islands.

Gayunman, hihina na ito pagdating ng Martes nang hapon hanggang sa Miyerkules. Pinapayuhan ng PAGASA ang publiko sa posibleng mga flash floods at landslides dahil sa malalakas na pagbuhos ng ulan.

“Adjacent or nearby areas may also experience flooding in the absence of such rainfall occurrence due to surface runoff or swelling of river channels,” ani PAGASA. Makararanas naman ang mga nasa ilalim ng TCWS No. 1 ng malalakas na pagbugso ng hangin at ulan dahil sa Bagyong Emong.

#EmongPH