Batanes at Babuyan Island, Signal No. 1

ni Ronalyn Seminiano Reonico | July 22, 2021

Itinaas ang Tropical Cyclone Wind Signal (TCWS) No. 1 sa Batanes at Babuyan Island dahil sa Bagyong Fabian.

Sa Tropical Cyclone Bulletin No. 23, ayon sa PAGASA, huling namataan ang sentro ng mata ng Bagyong Fabian sa 530 km Northeast ng Itbayat, Batanes (23.5°N, 126.1°E) na may Maximum sustained winds na umaabot sa 150 km/h malapit sa sentro nito at pagbugsong aabot sa 185 km/h.

Hindi man umano magdadala ng malakas na pag-ulan ang Bagyong Fabian, pinalalakas naman nito ang Southwest Monsoon kaya ayon sa PAGASA, makararanas ng pag-ulan ang Ilocos Region, Abra, Benguet, Zambales, Bataan, Tarlac, Pampanga, Bulacan, Metro Manila, Cavite, Batangas, Occidental Mindoro, Oriental Mindoro, Romblon, at northern portion ng Palawan kabilang na ang Calamian at Kalayaan Islands “in the next 24 hours.”

Samantala, ayon sa PAGASA, inaasahang lalabas sa Philippine Area of Responsibility ang Bagyong Fabian bukas nang gabi o sa Sabado nang umaga.

Metro Manila, binaha dahil kay Fabian

ni Lolet Abania | July 21, 2021

Lalo pang lumakas ang Bagyong Fabian habang ito ay dahan-dahang kumikilos patungong kanluran, ayon sa PAGASA ngayong Miyerkules. Sa alas-11:00 ng umagang forecast ng PAGASA, si ‘Fabian’ ay magdudulot ng malalakas na pagbuhos ng ulan sa buong bansa, habang wala namang inisyung Tropical Cyclone Wind Signal ang ahensiya.

Gayunman, ang Southwest Monsoon na pinalakas ng Bagyong Fabian at ng Tropical Storm Cempaka ay inaasahang magdadala ng mga pag-ulan sa buong Ilocos Region, Cordillera Administrative Region, Batanes, Babuyan Islands, Zambales, Bataan, Tarlac, Pampanga, Bulacan, Metro Manila, Cavite, Batangas, Occidental Mindoro, at ang hilagang bahagi ng Palawan, kabilang ang Calamian at Kalayaan Islands sa susunod na 24 oras.

Ilang lugar sa Metro Manila ang binaha ngayong Miyerkules nang umaga kasabay ng walang tigil na pagbuhos ng ulan dulot ng Southwest Monsoon. Ayon sa PAGASA, posibleng itaas sa Tropical Cyclone Wind Signal No. 1 ang buong Batanes at Babuyan Islands depende sa magiging galaw ng Bagyong Fabian sa maghapon.

Base naman sa alas-10:00 ng umagang update ng PAGASA, ang sentro ng Typhoon Fabian ay nasa layong 705 km silangan-hilagang-silangan ng Itbayat, Batanes.

Mayroon itong maximum sustained winds na 150 km/h malapit sa sentro, may pabugsu-bugsong hangin na aabot sa 185 km/h, at central pressure na 960 hPa. Kumikilos ito nang dahan-dahan pa-kanluran na may kasamang malakas na hangin o matinding pagbayo ng hangin na aabot sa 650 km mula sa sentro.

Inaasahang maalon hanggang sa malakas na alon ang mararanasan sa karagatan ng Batanes at Babuyan Islands, at ang western seaboard ng Palawan kabilang dito ang Kalayaan at Calamian Islands, at Occidental Mindoro kabilang dito ang Lubang Islands. Samantala, katamtaman hanggang sa maalon ang karagatan sa bahaging silangan at ang natitirang bahagi ng northern at western seaboards ng Luzon.

Ayon sa state weather bureau, kumikilos sa ngayon ang Bagyong Fabian pa-kanluran hanggang Huwebes nang gabi, kanluran hilagang-kanluran ng Biyernes nang umaga, habang patungo naman ng hilagang-kanluran ng Biyernes nang gabi. Lalabas ito ng Philippine Area of Responsibility sa Sabado nang umaga. Iniulat pa ng PAGASA na ang pag-landfall sa buong mainland China ng Bagyong Fabian ay tuluyang pag-alis nito sa bansa sa Linggo.

#FabianPH

Bagyong Fabian, bahagyang lumakas — PAGASA

ni Ronalyn Seminiano Reonico | July 19, 2021

Bahagyang lumakas ang Bagyong Fabian ngayong Lunes nang umaga at malapit nang maging “severe tropical storm category”, ayon sa PAGASA.

Ayon sa 5:00 AM Tropical Cyclone Bulletin No. 11 ng PAGASA, huling namataan ang TS Fabian sa 1,090 km East Northeast ng Extreme Northern Luzon taglay ang hanging may lakas na 85 km/h malapit sa sentro nito at may pagbugsong aabot sa lakas na 105 km/h.

Sa ngayon ay wala pang itinataas na Tropical Cyclone Wind Signals at ayon sa PAGASA, “‘FABIAN’ is unlikely to bring heavy rainfall in the country throughout the forecast period.”

Samantala, dahil sa Southwest Monsoon na pinalalakas ng TS Fabian at isa pang Tropical Depression na namataan sa 900 km West ng Extreme Northern Luzon sa labas ng Philippine Area of Responsibility (PAR), mararanasan ang monsoon rains “in the next 24 hours” sa Ilocos Region, Zambales, Bataan, Occidental Mindoro, at Palawan.

Inaasahang lalabas ang TS Fabian sa PAR bukas nang gabi o sa Miyerkules nang umaga.