Gorio, posibleng maging bagyo sa loob ng 12 oras

ni Lolet Abania | August 4, 2021

Posibleng lumakas pa ang Tropical Depression Gorio at maging isang ganap na tropical storm sa susunod na 12 oras subali't hindi direktang makakaapekto ito sa lagay ng panahon sa bansa, ayon sa PAGASA ngayong Miyerkules.

Wala namang inilabas na tropical cyclone wind signal (TCWS) ang PAGASA, base sa ipinakikitang track forecast nito sa mga lugar sa bansa. Sa 11:00AM bulletin ng PAGASA, ang Southwest Monsoon o Habagat ay magdudulot ng bahagya hanggang sa malakas na pagbuhos ng ulan sa buong Ilocos Region, Cordillera Administrative Region, at ibang bahagi ng western section ng Central at Southern Luzon.

Ayon sa PAGASA, ang TD Gorio ay posibleng lumabas sa Philippine Area of Responsibility (PAR) sa Huwebes nang umaga. Nabuo ang TD Gorio mula sa isang Low Pressure Area (LPA) sa bahagi ng Philippine Sea nang alas-8:00 ng umaga ngayong Miyerkules at batay sa forecast track ng PAGASA, patuloy itong kumikilos ng silangan hilagang-silangan sa susunod na 12 oras habang patungong hilaga bahaging hilagang-silangan sa Huwebes nang umaga.

Batay sa datos ng ahensiya, alas-10:00 ng umaga ngayong Miyerkules, ang sentro ng Gorio ay tinatayang nasa 730 km hilagang-silangan ng Itbayat, Batanes, na may maximum sustained winds ng 45 km/h malapit sa sentro, may pabugsu-bugsong hangin na aabot sa 55 km/h, at central pressure ng 998 hPa. Kumikilos si Gorio sa silangan hilagang-silangan ng 20 km/h, na may malakas na bugso ng hangin o mas mataas pa na aabot ng 300 km mula sa sentro nito.

P14.5 M sa agrikultura, P2.4 sa imprastraktura, winasak — NDRRMC.. 3 patay, 5 sugatan sa bagsik

ng Habagat

ni Lolet Abania | July 25, 2021

Tatlo ang nasawi habang lima ang nasugatan mula sa hilagang bahagi ng bansa dulot ng Southwest Monsoon o Habagat dahil sa patuloy na pagbuhos ng malakas na ulan at matinding bugso ng hangin sa malaking bahagi ng Pilipinas.

“Mayroong tatlong casualty, patay, at saka five injured, pero hindi ito related sa landslides at flooding,” ayon sa executive director ng National Disaster Risk Reduction and Management Council (NDRRMC) na si Ricardo Jalad sa interview ngayong Linggo.

Ayon kay Jalad, isa sa mga nasawi ay dahil sa aksidente sa kalsada na matatagpuan sa Kennon Road sa Cordillera Administrative Region. Namatay ang biktima matapos na isang puno ang bumagsak sa kanyang sasakyan habang bumibiyahe at dalawa na nasa loob din ng kanyang sasakyan ang nasugatan.

Mula naman sa Region 1, dalawa ang namatay dahil sa naganap na mga pagkidlat. Samantala, sa report ng NDRRMC ngayong Linggo nang umaga, umabot na sa 87,493 indibidwal o 19,521 pamilya sa 212 barangay ang apektado sanhi ng Habagat na pinalakas pa ng Bagyong Fabian. May kabuuang 24,798 indibidwal ang inilikas, kung saan 22,693 sa kanila ay nananatili sa mga evacuation centers.

Ayon sa NDRRMMC, ang mga apektadong lugar ay ang Region 3, Calabarzon, Mimaropa, Region 6, Cordillera Administrative Region (CAR), at National Capital Region (NCR).

Kahapon, nai-report ng NDRRMC na mahigit sa 14,000 katao ang dinala sa evacuation centers kasabay ng monsoon rains na patuloy na bumubuhos sa Metro Manila at iba pang lugar. Nakaranas naman ng pagkawala ng supply ng kuryente sa 12 munisipalidad at siyudad, habang pito sa nasabing lugar ay naibalik na ang supply ngayong Linggo nang umaga.

Nasa kabuuang 178 barangays naman ang binaha sa bahagi ng Region 3, Mimaropa at NCR. Gayunman, humupa na ang mga baha sa 15 barangays bandang alas-8:00 ng umaga. Pitong mga kalsada at apat na tulay naman ang hindi madaanan ngayon sa Region 3, Mimaropa, Region 6 at CAR, habang nasa 24 rain-induced landslides ang nai-report mula sa Region 1, Calabarzon, Mimaropa, Region 6, at CAR. Gayundin, nagkaroon ng pagguho ng malaking tipak ng bato at mudflow sa CAR.

Ayon pa sa NDRRMC, aabot sa tinatayang P14,593,900 ang halaga ng pinsala sa agrikultura na idinulot ng monsoon rains, kung saan nasa apat na ektarya ng mga pananim at mga palayan ang nawasak dahil sa malakas na pagbuhos ng ulan sa Region 1. Samantala, aabot naman sa P2,418,000 ang napinsalang mga imprastraktura sa Regions 1 at 6, kabilang dito ang 374 mga kabahayan sa Region 3, Calabarzon, Region 6, CAR at NCR. Gayunman, sinabi ng NDRRMC, naglabas na ng assistance ang pamahalaan para sa mga apektadong lugar sa Regions 3, 6 at CAR.

Paliwanag ni Jalad, kalahati ng pondo ng NDRRMC sa ilalim ng 2021 national budget ay nagastos na, subalit aniya, maaari pa silang humingi ng karagdagang pondo mula sa Department of Budget and Management. “Kukuha sa ibang budget but of course mayroong gastusin na masasakripisyo,” sabi ni Jalad.

Matatandaang nagbabala ang PAGASA na ang monsoon rains na pinalakas pa ng Bagyong Fabian at Tropical Storm Nepartak ay makakaapekto nang husto sa Metro Manila, Ilocos Region, Abra, Benguet, Zambales, Bataan, Pampanga, Bulacan, Cavite, Batangas, Occidental Mindoro, at Calamian Islands ngayong Linggo, kahit pa ang Bagyong Fabian ay umalis na sa Philippine Area of Responsibility nitong Sabado.

Ulan, tuloy kahit umalis na si Fabian

ni Ronalyn Seminiano Reonico | July 24, 2021

Nakalabas na sa Philippine Area of Responsibility (PAR) ang Bagyong Fabian bandang alas-11:00 kagabi ngunit ayon sa PAGASA, patuloy na nakararanas ng matinding pag-ulan ang ilang bahagi ng bansa sa nakalipas na 24 oras dahil sa Southwest Monsoon.

Huling namataan ang sentro ng mata ng Bagyong Fabian sa 640 km North-Northeast ng Itbayat, Batanes sa labas ng PAR na may lakas ng hangin na umaabot sa 140 km/h at pagbugsong umaabot sa 170 km/h.

Wala na ring naitalang Tropical Cyclone Wind Signals sa mga lugar sa bansa.

Samantala, patuloy na pinalalakas ng Bagyong Fabian ang Southwest Monsoon kaya makararanas ng pag-ulan ang Ilocos Region, Cordillera Administrative Region, Metro Manila, ilang bahagi ng Central Luzon, CALABARZON, MIMAROPA, at ilang bahagi ng Western Visayas.