LPA, namataan sa Davao City — PAGASA

ni Lolet Abania | December 6, 2021

Namataan ang isang low pressure area (LPA) na malapit sa Davao City ngayong Lunes, ayon sa PAGASA.

Sa daily weather bulletin ng PAGASA, ang LPA ay natagpuan sa layong 735 kilometro silangan ng Davao City bandang alas-3:00 ng hapon ngayong Lunes.

Magdudulot ang LPA at ang tinatawag na shear line ng maulap na papawirin na may kalat-kalat na pag-ulan at thunderstorms sa buong Eastern Visayas, Northern Mindanao, Caraga, Davao Region, at Bohol.

Pinayuhan naman ng PAGASA ang mga apektadong residente na maghanda sa posibleng mga pagbaha o landslides mula sa katamtaman, at minsang malakas na pagbuhos ng ulan.

Samantala, ang Cagayan Valley, Cordillera Administrative Region, Aurora, at ang northern portion ng Quezon kabilang na ang Polillo Islands ay makararanas ng maulap na papawirin na may mahinang pag-ulan dahil sa Northeast Monsoon.

Ang Northeast Monsoon ay magdudulot naman ng bahagyang maulap hanggang sa maulap na papawirin na may kasamang isolated light rains sa buong Metro Manila, natitirang bahagi ng Luzon, at natitirang bahagi ng Visayas.

Makararanas naman ang natitirang bahagi ng Mindanao ng bahagyang maulap hanggang sa maulap na papawirin na may kasamang isolated rain showers dahil sa localized thunderstorms.

Posible ring magkaroon ng flash floods o landslides na idudulot ang matinding thunderstorms.

Gayundin, makararanas ng katamtaman hanggang sa malakas na bugso ng hangin at katamtaman hanggang sa maalon ang kondisyon ng coastal water sa buong Luzon, Visayas, at ang eastern section ng Mindanao.

Habang ang natitirang bahagi ng Mindanao ay makararanas ng mahina hanggang sa katamtamang bugso ng hangin at bahagya hanggang sa katamtamang kondisyon ng katubigan.

LPA, namataan sa Surigao del Norte — PAGASA

ni Lolet Abania | October 21, 2021

Namataan ang isang low pressure area (LPA) sa bahagi ng Surigao del Norte kasabay ng nararanasang intertropical convergence zone (ITCZ) na nakakaapekto naman sa Palawan, Visayas, at Mindanao, ayon sa PAGASA ngayong Huwebes.

Sa daily weather bulletin ng PAGASA, bandang alas-3:00 ng hapon ngayong Huwebes namataan ang LPA na nasa layong 825 kilometro silangan ng Surigao City, Surigao del Norte. “It is embedded along ITCZ affecting Palawan, Visayas and Mindanao,” pahayag pa ng weather bureau.

Ayon sa PAGASA, makararanas ng maulap na papawirin na may kalat-kalat na mga pag-ulan at thunderstorms sa buong Caraga dahil ito sa ITCZ at LPA.

Pinapayuhan ng PAGASA ang mga residente sa naturang lugar na maghanda sa posibleng flash floods o landslides dahil sa severe thunderstorms.

Ang Metro Manila at ang natitirang bahagi ng bansa ay makararanas naman ng bahagyang maulap hanggang sa maulap na papawirin na may pulo-pulong pagbuhos ng ulan o thunderstorms dahil sa ITCZ at localized thunderstorms.

Ayon pa sa PAGASA, posibleng magdulot ito ng mga pagbaha o landslides dahil na rin sa severe thunderstorms.

Samantala, ang Batanes at ang Babuyan Islands ay makararanas ng bahagyang maulap hanggang sa maulap na papawirin na may kasamang pulo-pulo at mahinang pagbuhos ng ulan dahil sa tinatawag na northeasterly surface windflow.

Gayundin, katamtaman hanggang sa malakas na bugso ng hangin at katamtaman hanggang sa matinding coastal water conditions ang mararanasan sa buong Northern Luzon, habang mahina hanggang sa katamtamang bugso ng hangin at mahina hanggang sa moderate waters ang mararanasan naman sa natitirang bahagi ng bansa.

La Niña, start na – PAGASA

ni Lolet Abania | October 15, 2021

Inanunsiyo ng Philippine Atmospheric, Geophysical and Astronomical Services Administration (PAGASA) ngayong Biyernes ang opisyal na pagsisimula ng La Niña at katapusan ng Habagat season.

Paliwanag ni PAGASA deputy administrator Esperanza Cayanan sa isang intreview, ang La Niña ay inilalarawan bilang mas malakas na ulan kumpara sa pangkaraniwang ulan.

Ayon sa bureau, ang La Niña ay posibleng tumagal ng hanggang unang quarter ng 2022.

“Rainfall forecast from October 2021 to March 2022 suggests that most parts of the country will likely receive near to above normal rainfall conditions,” pahayag ng PAGASA.

Sinabi pa ng PAGASA na tinatayang apat hanggang anim na tropical cyclones ang inaasahang pumasok o ma-develop sa Philippine Area of Responsibility (PAR) sa panahong ito.

“These tropical cyclones may further enhance the northeast monsoon and could trigger floods, flashfloods, and rain-induced landslides, over susceptible areas, particularly in the eastern sections of the country, which normally receive greater amount of rainfall at this time of the year,” dagdag pa ng PAGASA.

“Adverse impacts are likely over the vulnerable areas and sectors of the country.”

Idineklara na rin ng PAGASA, ang pagtatapos ng Habagat o ang southwest monsoon season, at pagsisimula ng Amihan o ang northeast monsoon season.