Obiena, sakalam talaga, naka-gold sa Sweden

ni VA / Gerard Peter - @Sports | June 04, 2021

Patuloy sa kanyang masugid na preparasyon para sa nalalapit na Tokyo Olympics sa gitna ng pandemya ang Filipino pole vaulter na si EJ Obiena.

Sa huling kompetisyon na kanyang nilahukan, nakopo ni Obiena ang gold medal sa Folksam Grand Prix-Goteborg 2021 sa bansang Sweden. Nagawang matalon ni Obiena ang baras na may taas na 5.70 meters sa una niyang attempt upang makamit ang gold medal.

Tinalo niya si reigning Olympic gold medalist na si Thiago Braz ng Brazil na nagkasya lamang sa silver sa naitala nitong 5.65 metérs. Pumangatlo sa kanila si Paul Haugen Lillefosse ng Norway na nakapagtala ng 5.60 meters.

Nagtangka pa si Obiena na talunin ang baras na itinaas sa 5.80 meters ngunit bigo siya sa kanyang tatlong attempts habang nangabigo rin sina Braz at Lillefose sa tangka nila na matalon ang taas na 5.75 meters.

Samantala, umaasa pa rin si Philippine Olympic Committee (POC) President Abraham “Bambol” Tolentino na aabot sa 20 national athletes ang maipapadala ng bansa sa 2021 Tokyo Olympics kasunod ng panibagong tagumpay ni taekwondo jin Kurt Barbosa sa Asian Olympic Qualifying Tournament nitong nagdaang weekend.

Tiwala ang kinatawan ng ika-8th district ng Cavite na malalampasan na ng bansa ang 13 national athletes na naipadala sa 2016 Rio Olympics, kung saan nagwagi ang Pilipinas ng silver medal mula kay women’s under-53kgs weightlifter Hidilyn Diaz.

Kabilang sa mga Olympian na nakipaglaban sa Rio Olympics ay sina 6-time Southeast Asian Games gold medalist Eric Shauwn Cray, 2017 SEAG marathoner champion Mary Joy Tabal, Long-jump queen Marestella Torres-Sunang, boxers Rogen ladon at Charly Suarez, golfer Miguel Tabuena, Judoka Kodo Nakano, swimmers Jesse Lacuna at Jasmine Alkhaldi, table tennis Ian Lariba, taekwondo jin Elaine Kirstie Alora, at weightlifter Nestor Colonia. “Ang laki ng nawala dun sa mga atletang kabilang sa 20 na target nabawasan na tayo, pero in spite of that, nagdadasal pa rin ako na maaabot sa 20, but definitely malalagpasan na natin yung 13,” paliwanag ni Tolentino.

Aasahang lalaro sa FIBA Asia Cup qualifiers si Sotto

ni VA - @Sports | June 01, 2021

Ang muling pagbalik sa bansa ng Philippine basketball prodigy na si Kai Sotto ay inaasahan kagabi para makasama siyang lumaro ng Gilas Pilipinas sa FIBA Asia Cup qualifiers na gaganapin sa Clark. Gayunman, may duda kung makakasama si Sotto ng all-cadets Gilas squad sa pagsabak sa Asia Cup qualifiers dahil kailangan pa niyang sumailalim sa quarantine protocols bago makapag-ensayo kasama ng Nationals.

Dahil dito,wala na rin umanong plano ang Samahang Basketbol ng Pilipinas (SBP) na isama pa si Sotto sa Gilas cadets sa bubble training ng mga ito sa Laguna upang hindi na makagulo pa sa ginagawa nilang paghahanda. Gaganapin ang Fiba Asia Cup sa Hunyo 16-20 habang ang mandatory quarantine na ipinatutupad ay 14 na araw kung kaya wala ng panahong makapag-ensayo si Sotto kasama ng Gilas cadets.

Matatandaang nagpahayag si SBP program director Tab Baldwin na kinakailangan ni Sotto ng mahaba-habang panahon para makapaghanda bago siya makalaro kasama ng Gilas sa mga international tournaments.

Kapag hindi nakalaro sa FIBA Asia Cup qualifiers, inaasahang makakasama na siya ng Gilas sa final Olympic Qualifying Tournament sa Serbia simula sa Hunyo 29.Nakatakdang makatunggali ng Gilas sa Olympics qualifier ang Dominican Republic at host Serbia sa Group A.Ang Top 4 finishers sa nabanggit na torneo ang siyang pagkakalooban ng Tokyo Olympic slots.

Gawilan at 3 para-swimmers susubok sa OQT World Series

ni VA - @Sports | May 31, 2021

Apat na Filipino para-swimmer sa pangunguna ni Ernie Gawilan ang magtatangkang gawing pormal ang kanilang Tokyo Paralympics stint sa gaganaping World Para Swimming World Series sa Hunyo 17-20 sa Berlin, Germany.

Ang iba pang para-swimmers na kasama ni Gawilan ayon kay head coach Tony Ong ay sina 2018 Asian Para Games silver medalist Gary Bejino, Roland Sabido at Arnel Aba.Qualified na si Gawilan sa Tokyo Paralympics subalit kailangan pang repasuhin ng Davaoeñong swimmer ang classification para ganap na maging pormal ang ikalawang sunod na Paralympic appearance nito.

Nauna ng nag-qualify si Gawilan para sa Tokyo Games nang lampasan niya ang minimum Paralympic qualifying standard sa kanyang gold-medal finish sa 400-meter S7 freestyle event noong 2018 Asiad.

Base sa International Paralympic Committee, ang S7 ay klasipikasyon para sa mga para-athletes na may "one leg and one arm amputation on opposite sides" o "paralysis of one arm and one leg on the same side." "Si Ernie kung makikita mo 'yung legs niya...meron siyang legs pero buto't balat lang or wala siyang muscle na kasama. 'Yun yung kanyang ire-reclassify...kasi kung may laman or muscle 'yun, definitely nasa S8 sya," paliwanag ni Ong.

Umaasa si Ong na pagkatapos ng review classification race ay mapapabilang si Gawilan sa mas mababang sports class sa S7 dahil sasabak din ito sa 200-meter individual medley event sa Tokyo kung saan kailangang lumangoy ng breaststroke ang swimmer sa isang lap. "For the breaststroke event, because napakaimportante ng kick sa breaststroke...hopefully bumaba 'yung kanyang class doon kasi hindi sya nakaka-kick ng malakas because of the legs niya and the IM (individual medley) will follow," wika pa ni Ong.

Maliban sa 400-meter freestyle at 200-meter individual medley events,sasali rin si Gawilan sa 100-meter backstroke sa Tokyo. Sa backstroke event nagwagi ng gold si Gawilan sa 2018 Asiad katabla ng Japanese swimmer na si Daisuke Ejima.

Magtatangka naman si Bejino na mag-qualify sa 400-meter freestyle at 200-meter individual medley events sa pamamagitan ng bipartite slot.

Ang Bipartite Commission Invitation ay isang qualification method para sa mga para-athletes na hindi nagkaroon ng tsansang mag-qualify sa Paralympics sanhi ng mga tinatawag na "extraordinary circumstances."