P10-M reward ni MVP kay Yulo, Obiena, 3rd place sa Lausanne

ni VA @Sports | August 23, 2024

Photo: Carlos Yulo, Manuel V. Pangilinan, & EJ Obiena / FB

Inanunsiyo ni business tycoon Manuel Pangilinan kahapon na ginawaran niya ng P10-million cash reward si Filipino gymnast Carlos Yulo sa pagkakapanalo ng 2 gold medals sa nagdaang 2024 Paris Olympics.

Makatatanggap naman ang coaching team ni Yulo ng P5-M mula kay Pangilinan. Sa anunsiyo niya sa X (dating Twitter) account, sinabi ni Pangilinan na bibiyayaan din niya ng tig-P2-M reward sina boxers Aira Villegas at Nesthy Petecio na nakapag-uwi ng Olympic bronze medals, plus P2 million sa kanilang coaches. "Like always, they can count on our continued support until LA 2028. Mabuhay ang atletang Pinoy! (Long live Filipino athletes!)" saad ni Pangilinan sa post.

Samantala, tumapos na katabla sa ikatlong puwesto nina Sondre Guttormsen ng Norway at Kurtis Marschall ng Australia ang Filipino pole vaulter na si Ernest John 'EJ' Obiena matapos magtala ng 5.82 meters sa Lausanne leg ng Diamond League na idinaos sa Stade Olympique de la Pontaise sa Switzerland kahapon ng madaling araw (Manila time).

Nakatig-isang attempt lamang ang tatlong pole vaulters sa nasabing taas ng baras upang umabot ng podium at makapag-uwi ng premyong $3,500 bukod pa sa qualification points para sa finals na gaganapin sa Setyembre. Ang panalo ay nagsilbing pagbawi ni Obiena mula sa naging fourth place finish niya noong nakaraang Paris Olympics.

Nagwagi naman ng gold at leg winner prize na $10,000 sa nasabing kompetisyon si 2-time Olympic gold medalist Armand Duplantis ng Sweden na nagtala ng 6.15 meters habang pumangalawa sa kanya si Sam Kendricks ng  US na nagposte ng 5.92 meters para maiuwi ang silver medal at premyong $6,000.  

Yulo di kunteto sa 2 ginto mula sa Paris

ni VA @Sports | August 17, 2024

Photo: Circulations / FB

Sa kabila ng kanyang pagwawagi ng 2 Olympic gold medals na naging dahilan sa pagbuhos sa kanya ng napakarami at naglalakihang mga biyaya, hindi pa rin kuntento ang gymnast na si Carlos Yulo.

Nais ni Yulo na madagdagan pa ang mga events na puwede at gusto niyang magwagi ng gold medals sa susunod na 2028 Los Angeles Olympics.

Ngayon pa lamang ay buo na sa isipan ng 24- anyos na Olympics champion na magwagi rin sa men’s individual at men’s team all-around events na pinagharian ng Japanese gymnast na si individual all-around gold medal winner na si Shinnosuke Oka.

“Tatargetin ko yung individual all-around medal at kung masusunod ang plano pati yung team all-around at sana pati parallel bars makapag-final," ani Yulo sa isang panayam sa TV dalawang araw pagkauwi ng bansa mula Paris. “Isa sa mga pangarap ko na manalo rin ang mga teammates ko ng medal sa Olympics. Ipinagdarasal ko yun."

Ayon kay Gymnastics Association of the Philippines president Cynthia Carrion may posibilidad na magbuo sila ng “Dream Team” na isasabak sa LA Games kung saan makakasama ni Yulo ang nakababatang kapatid na si Eldrew, Miguel Besana at ang Filipino-British na si Jake Jarman, ang nagwagi ng bronze medal sa floor exercise sa Paris.

Samantala, kabi-kabila naman ang mga pabuya at insentibong tinatanggap ni Yulo mula ng dumating sila ng Pilipinas. May dagdag pang P20-M pa mula sa gobyerno gaya ng isinasaad ng Republic Act 10699 at P14-M mula sa Kongreso.

May P6-M bahay at lupa sa Nasugbu, Batangas at P150,000 Mabuhay Miles taun-taon at panghabang buhay mula sa Philippine Airlines bukod pa ang libreng 28 domestic at international flights galing naman sa Cebu Pacific.

Bibigyan din si Yulo ng Sports betting app na Arena Plus ng P5 milyon at gayundin magbibigay si dating Ilocos Sur Governor Luis “Chavit” Singson ng P5-M kung magkakabati ang kanilang pamilya. Pero para kay Yulo ang pinakamahalaga sa lahat ng kanyang mga natanggap ay walang iba kundi ang dalawang gintong medalya na napanalunan niya sa Paris Games.

Closing Paris Games: Pinakamatagumpay na paglahok ng 'Pinas sa Olimpiyada

ni VA @Sports | August 12, 2024

Photo: POC

Naging makasaysayan at makahulugan ang ika-isandaang taong pagkampanya ng Pilipinas sa nakaraang 2024 Paris Olympics dahil dito naitala ng delegasyon ng ating bansa ang itinuturing na pinakamatagumpay na pagtatapos ng partisipasyon ng mga Filipinong atleta sa Summer Games.

Sa closing ceremony, magarbo ang naging palabas partikular na ang pagpapasa ng hosting rights ng France sa USA na magsisilbing host ng 2028 Olympic Games sa Los Angeles, California.

Naroon sa programa si Tom Cruise kung saan isang Hollywood-inspired program ang masisilayan ng buong mundo. Mala-mission impossible na stunt ang ipinakita ni Hollywood superstar Tom Cruise sa 2024 Paris Olympics closing ceremony kung saan siya lumundag mula sa mataas na bahagi ng France National stadium, kinuha ang Olympic flag, isinakay sa motorsiklo patungo sa eroplano pahatid sa Los Angeles, U.S.A. (bilang next host ng Olimpiyada sa 2028) at nag-parachute pababa ng Hollywood para ihatid ng nagbibisikleta sa L.A. Coliseum at tinanggap ni legendary runner Michael Johnson ang bandila.

Sa pangunguna ng gymnast na si Carlos Edriel Yulo at boxer na si Aira Villegas ay nagsilbi silang flag bearer sa 22-kataong Centennial Team kahapon ng madaling araw kasama si Nesthy Petecio. Ang 24-anyos na si Yulo ang unang Olympic double gold medalist at unang multiple medal winner sa isang edisyon ng Olympic Games. Dahil dito ay naitala rin ng bansa ang pinakamataas na pagtatapos sa Olympics bukod pa sa pagiging best performing Southeast Asian nation sa dalawang sunod na edisyon.

Bagamat bigong umabot ng podium, nagtala rin ng kahanga-hangang performances ang iba pang miyembro ng Team Philippines gaya nina pole vaulter EJ Obiena at golfer Bianca Pagdanganan na muntik ng nagwagi ng medalya makaraang tumapos na pang-apat sa kani-kanilang events. Naging unang babaeng kinatawan naman ng Pilipinas sa fencing si Samantha Catantan gayundin si Joanie Delgaco sa rowing.