Taiwan at Japan sa 6-team semis round ng PVL, abangan

ni Gerard Arce / VA - @Sports | August 2, 2022

Solong tapatan ng mga koponang PLDT Home Fibr at ng Army Black Mamba ang magbubukas ng 6-team semifinal round ng 2022 Premier Volleyball League Invitational Conference.

Siguradong dikdikan ang labang mamamagitan sa High Speed Hittérs at Lady Troopers dahil importante bawat laro sa single round robin semis kung saan may dalawang dayuhang guest squads na papasok at makikipag-agawan sa top 2 slots para sa winner-take-all championship.

Ang dalawang guest teams ay ang Kobe Shinwa ng Japan at Kingwhale 6 ng Taiwan.

Tatangkain ng High Speed Hitters na maulit ang naitalang 3-1(17-25, 25-11, 25-20, 25-18) panalo kontra sa Lady Troopers noong elimination round.

Dahil dito, tiyak na magsisikap na makabawi ng Lady Troopers sa High Speed Hitters. Gayunman siguradong pinaghandaan sila ng husto ng tropa ni Coach George Pascua na pinangungunahan nina Mika Reyes, Fiola Ceballos, Jules Samonte, Chin Basas at Dell Palomata.

Sasandig naman ang Lady Troopers sa mga beteranong sina Jovelyn Gonzaga, Honey Royse Tubino, Jeanette Villareal, Mary Anne Esguerra, Joanne Bunag, Jem Gonzales, Angela Nunag at setter Ivy Perez para patunayang karapat-dapat silang mapabilang sa mga title contenders.

Magpapatuloy ang aksiyon sa semifinals sa Huwebes kung saan sasabak sa ikalawang sunod nilang laro ang Army kontra Creamline ganap na alas-2:30 ng hapon na susundan ng sagupaan ng Cignal HD at ng PLDT ganap na 5:30 ng hapon sa Ynares Center sa Antipolo City.

Nakatakda namang sumabak sa unang laro nila ang Kobe Shinwa at KingWhale sa Agosto 8 kung saan sila mismo ang magtutuos sa unang laro ganap na 2:30 p.m. na susundan ng salpukang Creamline at Cignal ng 5:30 p.m. sa SM MOA Arena.

Laro ngayon: FilOil EcoOil Center: 4:00 pm PLDT Home Fibr vs. Army Black Mamba

Robles at Bidaure, 2 ginto sa Phl Archery Cup Leg 3

ni VA / MC - @Sports | July 28, 2022

Dalawang gold medal ang pinalaso ni Andrea Robles sa women's compound ng 16th Philippine Archery Cup Leg 3 na idinaos sa Mandaue City sa Cebu nitong Hulyo 22-24.

Nanguna si Robles, 24, sa qualifying round, tinalo sina 2019 Southeast Asian Games (SEA Games) mixed team gold medalist Rachelle dela Cruz at three-time SEAG gold winner Jennifer Chan.

Nanaig siya kina Dela Cruz at five-time SEAG champion Joann Tabañag sa Olympic round.

"I’m happy with my results this tournament. I’ve been working really hard these past couple of months and I’m glad that it paid off. There is, of course, still a lot of room for improvement and like every tournament, there are things I learned that I can use to work on getting better.

It's back to training for me to get ready for the next leg," ani Robles, ang unang Filipino gold medalist sa 2019 Indoor Archery World Series sa China.

Pinagharian ni Vietnam SEA Games mixed team silver medalist Paul Marton Dela Cruz ang men's division sa qualifying round. Tumapos sa 2nd place si Johann Olaño habang 3rd si Flor Matan.

Nakaresbak si Matan, ang Vietnam SEAG bronze medalist sa Olympic round, nagwagi ng ginto laban kay Dela Cruz. Pumangatlo si Olaño.

Samantala, dalawang gold medal naman ang natarget ni Gabrielle Monica Bidaure sa women's Open recurve category. Tinalo ang ate niya na si Pia Elizabeth Angela at Phoebe Nicole Amistoso sa qualifying round.

Naibulsa naman ng Bidaure siblings at ni Amistoso women's team gold medal sa Vietnam SEAG.

Sa men's Open recurve category, tinalo ni Jason Emmanuel Feliciano si Girvin Cullen Nigel Garcia at Renian Keith Nawew para sa gold medal. Nagbalik ang porma ni Nawew sa Olympic round para sa gold medal kontra Rogelio Miguel Tremedal at Feliciano.

Ayon kay World Archery Philippines secretary general Rosendo Sombrio, ang fourth at final leg ay idaraos sa Oktubre.

Sa mga resulta ng four-leg Philippine Archery Cup ang dedetermina kung sino ang sasagupa sa Cambodia SEA Games at Hangzhou Asian Games sa 2023 at 2024 Paris Olympics qualifier.

EAC, host ng NCAA Season '98, Ateneo, sa World U Basketball

ni VA - @Sports | July 27, 2022

Matapos angkinin ng De La Salle-College of Saint Benilde ang titulo ng women's volleyball, pormal na rin nilang isinalin ang "hosting chores" ng National Collegiate Athletic Association (NCAA) sa Emilio Aguinaldo College.

Ang EAC ang magsisilbing host ng NCAA Season 98. Sa kanyang mensahe sa nangyaring turnover rites, nagpasalamat si CSB president and NCAA Season 97 policy board head Br.Edmundo Fernandez, FSC ang NCAA Management Committee na pinamunuan ni Dax Castellano, at ang kanilang media partner na GMA Network.

"I am sure Season 98 will be more exciting as we open up with more sports," ani Fernandez.

Tinanggap ni EAC Vice President for Administration Dr. Lorenzo Lorenzo ang hosting rights.

"With the leadership of Br. Dodo and Dax Castellano, we were able to experience a Stronger Together NCAA Season 97," wika ni Lorenzo.

Samantala, nakatakdang sumabak ang Ateneo sa World University Basketball Series sa Agosto bilang preparasyon sa UAAP Season.

"It looks like it's gonna be a strong tournament with high-level university teams," pahayag ni Blue Eagles coach Tab Baldwin hinggil sa kadahilanan kung bakit hindi lumahok ang kanyang koponan sa mga pre-season tournaments na 2022 PBA D-League Aspirants' Cup at Filoil EcoOil Preseason Cup.

Inaasahang mamumuno sa kampanya ng Blue Eagles sa torneo sa Agosto 9-11 sa Yoyogi National Stadium Second Gymnasium sina Dave Ildefonso, Josh Lazaro at Forthsky Padrigao.

Makakatunggali nila ang top collegiate teams mula Taiwan, Indonesia at host Japan kasama ang perennial contender Tokai University Seagulls, back-to-back University Basketball Association champion National Chengchi University Griffins, at Liga Mahasiswa titlist Universitas Pelita Harapa Eagles.

Ang kanilang overseas campaign ang simula ng tangkang pagbawi ng Blue Eagles at makopo ang kampeonato ng UAAP Season 85 matapos silang mabigo sa tangka nilang 4-peat noong Season 84 sa kamay ng UP Fighting Maroons.