Lady Bulldogs, tinambakan ang UE Warriors sa UAAP

ni VA - @Sports | October 3, 2022

Nobyembre pa ng taong 2019 nang huling masabak sa laro ang reigning UAAP Women's basketball champion National Univérsity, ngunit ni hindi kinakitaan ng pangangalawang ang mga ito.

Gaya ng dati, tinambakan ng 84 puntos ng Lady Bulldogs ang University of the East Lady Warrios, 131-47, kahapon sa pagpapatuloy ng aksiyon sa Mall of Asia Arena.

Pinalawig din ng Lady Bulldogs ang kanilang historic winning streak hanggang 97 games mula pa noong 2014. Nagtala rin ang NU ng rekord na most points sa kasaysayan ng women’s basketball mula noong maging computerized ang stats ng liga matapos ang naitalang 129 puntos ng Tigers Setyembre 22, 2018 kontra- University of the Philippines.

Ang panalo ang buwenamano para kay bagong NU coach Aris Dimaunahan na pumalit kay dating Lady Bulldogs Patrick Aquino. Angat na angat ang laro ng NU na nagtala ng 27 puntos na kalamangan,38-11 sa first quarter bago nilimitahan ang Lady Warriors sa dalawang puntos lamang sa second period upang palobohin ang lamang sa 30 puntos sa pagtatapos ng half, 68-13. Sunod nilang makakalaban ang Ateneo de Manila University sa Miyerkules ganap na alas-11:00 ng umaga sa UST Quadricentennial Pavilion.

Samantala sa isa pang laban noong opening, iginupo ng De La Salle University ang University of the Philippines (UP), 73-51 sa Mall of Asia Arena. Pinamunuan ni Fina Niantcho ang panalo ng Lady Archers sa kanyang itinalang double double na 16 puntos at 12 rebounds na may kasama pang tatlong assists.

JRU Heavy Bombers, binomba ang Mapua

ni VA - @Sports | October 1, 2022

Kinakailangan ng Jose Rizal University ang ekstrang overtime na 5 minuto para manligpit, 67-64 at tapusin ang Mapua University Cardinal sa NCAA Season 98 sa San Juan Arena kahapon.

Pumoste si Joshua Guiab ng 17 points at 10 rebounds para pangunahan ang Heavy Bombers habang si Marwin Dionisio ay may binakas na 15 markers, kasama ang 4 sa overtime. Angat sa 3 puntos sa payoff period, nagpakawala ang Heavy Bombers ng 10-5 run para sa lumider sa 60-52 sa nalalabing 4:18 minuto.

Pero nakaalpas ang Cardinals sa 6-0 run at dumikit sa 60-58, bago nasipulan ang team dahil sa turnover. Ipinatas ni Rence Nocum sa bisa ng layup, 60-60, ang nalalabing 11.6 segundo bago sumablay si Agem Miranda sa huling tangka at naitakda ang overtime.

Umangat sa dalawang free throws ni Dionisio ang JRU, 67-62, sa loob ng two-minute warning bago naihabol ni Nocum sa 67-64 affair.

Magkasunod na sablay ng Mapua ang sinamantala ng JRU. Hindi na lumingon pa ang JRU at nagsalpak ng tres para 3-2 win-loss card habang sumadsad ang Mapua sa matamlay na 1-5 kartada.

Sa pagtatapos ng first half, apat na technical fouls at dalawang unsportsmanlike fouls ang nasipulan habang na-thrown out sa game si Jonathan Medina ng JRU makaraang pumasok sa court sa 4:59 mark ng second quarter.

Isang buzzer-beater na tres mula kay Toby Agustin sa half-court mark na nagtapos sa third quarter ng JRU para lumamang sa 50-47 iskor.

World class pole vaulters Nilsen, Braz at Duplantis, lalaro sa bansa

ni VA / MC - @Sports | September 24, 2022

Sasabayan ng husay ni Pinoy Ernest John "EJ" Obiena bilang world's No. 3 ang mga world-class pole vaulting colleagues na dadalhin niya sa bansa sa isang invitational competition sa 2023.

Iimbitahin na makarating sa Pilipinas sina world No. 2 Chris Nilsen, Rio 2016 Olympics gold medalist Thiago Braz lalo na si world and Olympic champion at world record holder Armand Duplantis.

Sa unang pagkakataon, ang tatlo at iba pang world class pole vaulters ay magpapakita ng mga high-flying acts sa harap ng Pinoy fans.

“The objective is to bring them here after the outdoor season’s over,” saad ni Obiena kay Philippine Olympic Committee President Rep. Abraham “Bambol” Tolentino sa isa nilang pag-uusap habang nasa bakasyon sa bansa ang world championships bronze medalist kasama ang nobya na German long jumper na si Caroline Joyeaux.

Aprubado ito ni Tolentino at hahanapan na ito ng POC head ng venue.

“The Picnic Grove here could be an ideal venue,” saad ni Tolentino, hinggil sa paboritong destinasyon ng local at foreign tourists sa Tagaytay City.

Itutulad ang setup na parang sa Europe, isang street venue kung saan ang runway, box, crossbars at landing area ay portable o collapsible. “With the Taal Volcano as backdrop, what more could you ask for—a world-class pole vault action in one of the most picturesque tourist attractions in the country,” saad ni Tolentino. “Every jump will be postcard-perfect.”

Ang European outdoor season ay magtatapos sa unang linggo ng Setyembre at ang Asian Games sa Huangzhou ay naka-set sa parehong buwan sa 2023. Napipisil nina Obiena at Tolentino ang last part ng Setyembre o early mid-October bilang petsa. “The event will be a spectator-friendly event, and it’s planned that it be sanctioned by World Athletics,” ani Obiena.