Yulo qualified na sa Olympics, Paalam babanat sa q'finals

ni MC / VA / GA @Sports | October 03, 2023

Matapos ang kanyang nakapanlulumong performance sa vault na naging sanhi ng kabiguan niya sa individual all-around, nakabawi ang Filipino gymnast na si Carlos Edriel Yulo sa kanyang paboritong event na floor exercise at nakamit ang target na 2024 Paris Olympics berth noong Linggo ng gabi (Manila time) sa 2023 Artistic Gymnastics World Championships sa Antwerp, Belgium.

Tumapos si Yulo na highest ranked gymnast sa floor exercise mula sa inabot nitong disaster sa unang araw ng qualifying.

Pumangatlo si Yulo sa men's floor exercise sa naitala nitong 14.600 points kasunod ng mga nangunang sina Artem Dolgopyat ng Israel (15.100) at Frederick Richard ng US (14.600).

Ngunit dahil qualified na sa Paris Games sina Dolgopyat at Richard hindi pa man naidaraos ang World Championships ay umangat si Yulo.

Dahil dito, nakabawi na rin si Yulo sa kanyang 'di malilimutang pagtatapos sa vault na nagresulta ng kanyang pagka-zero sa vault.

Si Yulo ang ikalawang Filipino athlete kasunod ni EJ Obiena na nakasisiguro na ng slot sa Paris Olympics.

Samantala, inspirado ngayon si Carlo Paalam kontra astiging kasagupa na si regining world champion Carlo Khalokov Abdumalik ng Uzbekistan ngayong Martes sa quarterfinal round. Aakyat si Paalam sa ring kontra 23-ayos na Uzbek ng 7:30 p.m. sa Hangzhou gymnasium. Kailangang dispatsahin ng Tokyo silver medal winner si Uulu Munarbek Siitbek ng Kyrgystan sa Round-of-16 sa iskor na 4-1 upang maabot ang q'finals. Si Seiitbek, 27, ay bronze medalist sa nakaraang World C'ship sa Tashkent, Uzbekistan.

Si Paalam ay sasabak na sa gold medalist para makasama si Marcial sa semis. “Halos lahat sila sa division namin magaling,” pag-amin ng 25-anyos na Pinoy hinggil sa stacked roster sa men's 58 kg class na unang beses siyang lalaban.

Gilas Pilipinas sa 2nd win vs. Thais, 3x3 target ang q'finals

ni MC / VA @Sports | September 29, 2023

Ikalawang panalo ang naitala ng Gilas Pilipinas matapos na pahirapan sila sa fourth quarter ng Thailand sa 87-72 victory sa ikalawa nilang laro sa 19th Asian Games kahapon sa Hangzhou, China.

Big buckets ang kinakamada nina Ange Kouame at Justin Brownlee para ganahan nang husto ang Gilas kaya umibayo ang kanilang laro 2-0 sa Group C sa Zhejiang Gymnasium.

Nakatipon si Brownlee ng 22 points at 15 rebounds, bagamat pumukol lang ng 8-of-27 sa field habang natitighaw sa pagod ang buong Philippine team. Nakagawa si CJ Perez ng 16 points, kahit mintis sa ilang point-blank shots.

Tumiyak na ang Pilipinas ng kuwalipikasyon sa next phase ng tournament.

Makasisiguro pa rin siya ng direct qualification sa q'finals kung magwawagi sa final Group C game laban sa Jordan.

Nagpakabog pa ang Thailand sa tikas ni Chanatip Jakrawan para sa 79-70 sa nalalabing 3:13 minuto, pero pinatibay ng Gilas ang depensa. Kinapos ang 29 puntos ni Lamb at 22 ni Lee para sa Thailand, tanging double-digits sa team.

Samantala, mawalis ang group stage at magkamit ng outright q'finals berth ang target ng Phl men 3x3 squad.

Tinalo ng Gilas sa pangunguna nina John Ray Pasaol at Bismarck Lina, 21-15 ang Hong Kong para sa ikatlong sunod napanalo sa Group A.

Kinakailangan na lamang nilang gapiin ang Mongolia sa huling laban nila ngayong Biyernes -Setyembre 29 para makumpleto ang sweep at makopo ang isa sa outright berth sa knockout stage.

“Yun ang gusto namin, win as many games,” pahayag ni national coach Lester Del Rosario. “Prepared kami. Lalaban lang ulit. Huwag lang makampante, may chance kami.”

Pumapangalawa sa Team Philippines sa Group A ang Chinese Taipei (2-1), kasunod ang Mongolia (1-1), Jordan (0-2) at Hong Kong (0-2).

Ang tatapos na top team sa bawat grupo ay awtomatiko sa q'final habang ang susunod na dalawa ay lalaro sa qualification round para sa apat pang q'finalists.

Gilas Youth, pasok na sa FIBA U-17 World Cup 2024

ni VA @Sports | September 24, 2023

Nagpatuloy sa kanilang pamamayagpag ang Gilas Pilipinas Boys’ Under-16 team sa ginaganap na 2023 FIBA U16 Asian Championship matapos iposte ang come-from-behind 64-59 na panalo kontra Japan sa quarterfinals kahapon ng umaga-Sabado, Setyembre 23 (Manila time) sa Doha, Qatar.

Dahil sa panalo, pasok na ang mga kabataang Pinoy sa FIBA U17 World Cup na gaganapin sa Turkey sa 2024 sa bisa ng kanilang top four finish sa torneo Kasama ang China, New Zealand, at Australia na siyang makakatunggali nila sa semifinals.

Pagkaraang malimitahan sa kanyang tournament-low na 11 puntos noong Biyernes kung saan tinalo nila ang Korea, muling nanguna ang second-generation player na si Kieffer Alas para sa Gilas Boys nang magposte ito ng bagong tournament-best na 29 puntos bukod pa sa 9 na rebounds at 3 assists.

Naiiwan ng 10 puntos matapos ang first half, 25-35, nag-init si Alas, bunsong kapatid ng PBA star na si Kevin Alas sa third canto kung nagsalansan ito ng 14 puntos para maagaw ang pangingibabaw sa Japan, 46-45 papasok ng final period.

Nagtala si Alas ng 4-of-5 clip sa field at solong maungusan ang koponan ng Japan sa busluan,14-10.

Naging dikdikan ang laban ng dalawang koponan sa 4th quarter at nakalalamang pa Japan, bago nag- takeover ang big man na si Bonn Daja na nag-deliver ng back-to-back baskets sa endgame para sa itala ang final score na 64-59.

Si Joaquin Ludovice na umiskor ng 25 puntos kontra Korea ay tumapos na may 11 puntos kasunod si Kurt Velasquez na may 10 puntos at si Daja na may 6 na puntos.

Nakatakdang sagupain ng Gilas Boys ang Australia ngayong alas-12:30 ng madaling araw-Setyembre 24,-Linggo (Manila time).