Gilas angat ang world rankings, Rondina, PVL Player of the Week

ni VA @Sports | March 4, 2024

Dahil sa magandang performances na kanilang ginawa sa nakaraang first window ng 2025 FIBA Asia Cup Qualifiers, umangat ng isang baytang ang Gilas Pilipinas sa world rankings.

Buhat sa pagiging world’s 38th, umakyat ang Pilipinas sa No. 37 spot makaraang walisin ang kanilang dalawang laro sa qualifiers noong nakaraang buwan.

Sa ilalim ng kanilang permanent coach na si Tim Cone, ginapi ng Gilas sa una nilang laban ang Hong Kong, 94-64, sa Tsuen Wan Stadium bago isinunod ang Chinese Taipei, 106-53, sa larong idinaos sa PhilSports Arena sa Pasig City.

Nanatili naman silang No.8 sa Asian rankings.

Hindi naman natitinag sa top 3 ng world rankings ang United States of America (USA) Spain at Germany bilang no.1,2,3 ayon sa pagkakasunod-sunod.

Ang iba pang nasa Top 10 ay ang Serbia (4th) , Australia (5th) , Latvia(6th), Canada(7th), Argentina(8th), France (9th) at Lithuania(10th).

Samantala, hindi maipagkakaila ang matinding laro na ipinapakita ni reigning MVP Cherry Ann “Sisi” Rondina upang tanghaling PVL Press Corps Player of the Week nang paangatin ng maaga sa tuktok ng liderato ang Choco Mucho Flying Titans sa pagpapatuloy ng aksyon at hampasan sa 8th edisyon ng Premier Volleyball League (PVL) All-Filipino Conference.

Sa kabila ng kanilang kabiguan sa nakaraang All-Filipino Conference, kung saan kinapos itong matupad ang kagustuhang maibulsa ang kauna-unahang titulo na siya ring unang podium finish ng koponan laban sa kapatid na Creamline Cool Smashers, nananatiling pwersa sa atake ang reigning MVP sa pagkasa ang doble-doble pigura sa 24 puntos mula lahat sa atake kasama ang 22 excellent receptions para matakasan ang lipad ng Petro Gazz Angels sa 24-26, 25-22, 25-18, 24-26, 15-13 nung Pebrero 27.

Sinundan naman ito ng 23 puntos mula sa 21 atake at dalawang aces, kasama ang 13 excellent receptions kontra Crossovers.

Paalam, Petecio at 8 pa asam ang Olympics slot

ni VA @Sports | March 1, 2024

Pamumunuan nina Tokyo Olympics silver medalists Carlo Paalam at Nesthy Petecio ang 10- kataong  PH team sa tangkang pagsungkit ng Paris Olympics berths sa unang World Olympic Qualifying Tournament  sa Sabado, (Linggo sa Pilipinas) sa Busto Arsizio, Italy.Ayon kay national coach Ronald Chavez kailangang ang mga miyembro ng koponan ay magwagi ng medalya kahit bronze medal upang magkamit ng ticket sa Paris Games sa kompetisyon na idaraos sa Maria Piantanida Sports Palace E-Work Arena.

Kabilang ang Pinoy boxers sa 632 na kinabibilangan ng 399 na kalalakihan at 233 kababaihan mula sa iba't-ibang panig ng mundo na mag-aagawan  sa nakatayang  28 slots sa men’s division at 21 sa women’s side para sa quadrennial meet sa Hulyo 26 - Agosto 11.

Ayon kay Association of Boxing Alliances in the Philippines head coach Pat Gaspi, nakahanda ang national boxers sa laban. “Everything’s on track, everything is in place,” ani Gaspi. “Coach Ronald says they’re 90 to 100 percent ready in conditioning and skills.”

Ang iba pang kasamang sasabak nina  Paalam at Petecio ay sina  SEA Games champion Rogen Ladon (flyweight), Mark Ashly Fajardo (light welterweight), Ronald Chavez Jr. (super lightweight) at John Marvin (heavyweight) sa men’s division at sina  Aira Villegas (flyweight), Claudine Veloso (bantamweight), Risa Pasuit (lightweight) at Hergie Bacyadan (middleweight) sa women’s.

Sa ngayon ay tanging si Tokyo Olympics bronze medalist Eumir Felix Marcial pa lang ang Filipino boxer na qualified sa Paris Olympics sa bisa ng  silver medal finish sa light heavyweight division noong Hangzhou Asian Games. Sa Spain nagwagi sina Petecio, Ladon, Villegas at Bacyadan ng gold medals sa nilahukan nilang Boxam Elite Tournament sa La Nucia,  Alicante, noong Peb. 4.

Samantala, ang ikalawa at huling World Olympic Qualifier ay idaraos sa Bangkok, Thailand sa Mayo 23 -Hunyo 3.

Malonzo, nag-sorry sa SBP nang masangkot sa gulo

ni VA @Sports | February 28, 2024

Nasangkot ang Gilas Pilipinas player na si Jamie Malonzo sa  kaguluhan sa isang fast food chain sa may Bonifacio Global City ilang oras bago ang laban nila kontra Chinese-Taipei noong Linggo ng gabi. Kasunod nito ay humingi na ng paumahin si Malonzo kahapon sa SBP. 

Ilang sandali bago magsimula ang nasabing laban sa FIBA Asia Cup 2025 Qualifiers, isang video ang kumalat sa mga social media channels na nagpapakita sa 6-foot-5 winger ng Ginebra na sangkot sa kaguluhan sa isang restaurant.

Nakumpirma noong Lunes na si Malonzo ang nasa video at ang kaaway nito ay isang mixed martial artist.

Ayon sa ilang sources, nagpaalam si  Malonzo na hindi makakalaro sa nasabing laban kontra Taipei dahil sa gastral pain o pananakit ng sikmura.

Naka-checked in noon ang Gilas sa Marco Polo Hotel sa Ortigas.

Matapos magpaalam, nagtungo si Malonzo sa BGC upang bumili ng inumin bago magtungo sa nabanggit na fast food restaurant kung saan sila nagpang-abot ng sinasabing martial artist.

Humingi na ng paumanhin si Malonzo sa pamunuan ng Philippine Basketball Association at ng Samahang Basketbol ng Pilipinas dahil sa pangyayari.

Ayon kay Gilas head coach Tim Cone may dinaramdam na si  Malonzo maging si Justin Browlee pagkaraan ng Gilas road game kontra Hong Kong.

Gayunpaman, naglaro pa rin si Brownlee kontra Chinese-Taipei. “We contemplated bringing him to the hospital. He’s that down and out,” ani Cone.

“We sent our doctors over to him and put him on IV, but I think maybe some of the guys just got dehydrated severely on the trip and we didn’t hydrate well after that. And I’ve got to be more cognizant of that, making sure that the guys are doing that better.”