Isolation facility sa bawat Bgy. sa Bulacan, sinimulan na

ni Twincle Esquierdo | December 11, 2020

Sinimulan na ng local government unit (LGU) ng Baliwag, Bulacan ang pagkakaroon ng sariling isolation facility sa 27 barangay dahil nahihirapan na umano ang municipality na i-accommodate ang lahat ng nagkakaroon ng COVID-19 sa nasabing lugar.

"Nahihirapan po kasi ang municipality na i-accommodate lahat, so we see to it na dapat magkaroon ang bawat barangay," sabi ni Dr. Dave Legazpi, rural health physician sa Baliwag.

Nagbigay din ang lokal na pamahalaan ng mga personal protective equipment (PPE) para sa mga health workers, ngunit aminado sila na hindi lahat ay mabibigyan nito, ayon kay Dr. Joseph Paul Cruzcosa na mula sa Gregorio del Pilar District Hospital sa Bulacan.

Aniya, "Malaking bagay po 'yan. Ang supply chain natin, hindi naman ganoon kaperpekto, unlike sa ibang bansa, umaasa pa rin tayo sa bigay." Kahit mababa ang kaso ng COVID-19 sa Bulacan at maging sa Nueva Ecija, maingat at mahigpit ang medical frontliners sa pag-aasikaso sa mga pasyente.

"Continuous po ang kailangan namin na proteksiyon," sabi ni Dr. August Abuelda Jr. ng Eduardo L. Joson Memorial Hospital.

'Wag munang mag-Christmas Party — P-Digong

ni Twincle Esquierdo | December 9, 2020

Hinimok ni Pangulong Rodrigo Roa Duterte ang mamamayan na iwasan ang Christmas party at pagtitipon ngayong darating na Kapaskuhan upang maiwasan ang pagdami ng mga naaapektuhan ng COVID-19 sa bansa.

"You have had so many Christmas blowouts and parties. This one Christmas, the only Christmas maybe, that government will interfere in your private affairs. You might think, 'This is too much, government does not control us.' Of course, we cannot control you individually if what you do is what you want.

"Would you be kind enough to skip the...festivities? Iwasan muna ninyo. Avoid it because it is for your own good and for the good of the community, and eventually, for the good of your own country," sabi ni Duterte.

Una nang sinabi ni Interior Sec. Eduardo Año na hihigpitan nila ang pagpapatupad ng mga minimum health standard at quarantine protocols ngayong darating na Pasko partikular sa Metro Manila.

Ayon naman sa Department of Health, noong nakaraang buwan pa umano nila ito pinaghahandaan dahil posibleng lumaki ang bilang ng kaso ng Covid-19. Gumagawa na ng contingency plan ang DOH na magbibigay-daan sa mga health authorities at iba pang opisyal na tumugon sa "post-holiday season surge," ayon kay DOH Sec. Francisco Duque.

Nauna nang ipatupad ng DOH ang Department Circular 2020-0355 o Reiteration of Minimum Public Health Standards para sa COVID-19 Mitigation sa panahon ng Kapaskuhan upang mapaalalahanan ang publiko na patuloy na sumunod sa mga minimum health standards.

APRIL BOY REGINO, PUMANAW NA SA EDAD NA 51

ni Twincle Esquierdo | November 29, 2020

Pumanaw na sa edad 51 si April Boy Regino. Ito ay kinumpirma sa Facebook post ng kanyang kapatid na si Vingo Regino.

Aniya, "Nakakalungkot naman ang araw na ito..wala na ang kuya April Boy ko..."

Na-diagnose ang singer na may prostate cancer noong 2009 at nanatili sa United States at noong 2013, inanunsiyo niyang gumaling na siya sa sakit na ito.

Samantala, ibinahagi niya noong 2015 na nakararanas siya ng diabetic retinopathy kung saan maaaring maging sanhi ng pagkawala ng paningin at pagkabulag.

Sa isang pahayag noong 2016, sinabi niya na ang kanyang kaliwang mata ay tuluyan nang nabulag habang ang kanang mata ay nakakaaninag na lamang ng mga ilaw. Kaya, naging limitado na lamang ang kanyang mga kilos.

Ilan sa mga sumikat na kanta ni April Boy ay ang 'Di Ko Kayang Tanggapin at Paano ang Puso Ko.