3 suspek sa rape-slay sa flight attendant, pinalaya na

ni Thea Janica Teh | January 6, 2021

Iniutos ng Makati City Prosecutor ngayong Miyerkules na palayin para sa karagdagang pagsisiyasat ang 3 kabilang sa 11 suspek sa pagkamatay ng flight attendant na si Cristine Dacera.

Ayon kay Prosecutor General Benedicto Malcontento, isasailalim ang tatlo na kinilalang sina John Pascual Dela Serna III, Rommel Galido at John Paul Halili pati na rin ang 8 pa sa preliminary investigation sa Enero 13 upang matukoy kung ginahasa ba at pinatay si Dacera. Kung ito ay mapapatunayan, mahaharap ang 11 suspek sa kasong rape with homicide.

Matatandaang nitong Bagong Taon ay natagpuang patay si Dacera, 23-anyos sa bathtub sa isang hotel sa Makati City.

Sa inilabas na resulta ng autopsy, sinabing ang ikinamatay nito ay ruptured aortic aneurysm. Ngunit, hindi sang-ayon ang pamilya rito at sinabing ginahasa at pinatay ang kanilang kaanak.

Kaya naman, nag-request muli ng panibagong autopsy ang pamilya ni Dacera mula sa independent medico-legal officer.

Samantala, ibinahagi ni Justice Secretary Menardo Guevarra na nakikipagtulungan na rin ang National Bureau of Investigation (NBI) sa Philippine National Police (PNP) upang matukoy ang totoong ikinamatay ni Dacera.

Pagbabayad ng tax sa Valenzuela City, online na!

ni Thea Janica Teh - @Bulgarific | January 6, 2021

Hello, Bulgarians! Papalapit na ang tax season, mas challenging na ang pagpapasa dahil kinakailangang sumunod sa mga health protocols tulad ng social distancing dahil sa COVID-19 pandemic.

Kaya naman malaking pasasalamat na ang Paspas Permit ng Valenzuela City ay online na! Hindi na natin kailangan pang pumunta sa City Hall para lang makapag-register, makapagpasa ng application at makapagbayad dahil sa online, mas pinabilis, pinadali at pinaligtas pa.

Maaaring bisitahin ang Paspas Permit online sa website ng Valenzuela City na www.valenzuela.gov.ph at i-click ang 3S Plus Valenzuela City Online Service button.

Ang mga new users ay maaaring gumawa ng kanilang sariling account upang ma-enjoy ang ilang services tulad ng Business Permit and Licensing Office, Assessor's Office, Treasurer's Office, Office of the Building Official at Local Civil Registry.

Hindi lang ‘yan, para sa mga kailangan ng permit sa City Health Office tulad ng Issuance of Provisional Sanitary Permit at Application of Health Certificates at sa pagpoproseso ng Land Use Verification sa City Zoning Office, maaari na rin natin itong makuha online.

Inaanyayahan ng lokal na pamahalaan ng Valenzuela City na gamitin ng mga taxpayer at business owner ang Paspas Permit upang maiwasan ang dagsa ng tao sa City Hall at maging ligtas laban sa COVID-19. Pinaalalahanan din nito na magbayad sa tamang oras upang maiwasan ang 25% surcharge at 2% interest.

Samantala, may ilang venue pa rin ang magbubukas para makapagpasa ng First Quarter deadline hanggang January 20 at ito ay ang mga sumusunod:

• 3S Ugong (taxpayers mula sa Brgy. Ugong, Mapulang Lupa at Bagbaguin)

• 3S Punturin (taxpayers mula sa from Brgy. Punturin, Bignay, Lawang Bato at Canumay East)

• 3S Maysan (taxpayers mula sa Brgy. Maysan, Paso de Blas at Parada)

• 3S Gen. T. de Leon (taxpayers mula sa Brgy. Gen. T. de Leon)

• 3S Karuhatan (taxpayers mula sa Brgy. Karuhatan)

• 3S Marulas (taxpayers mula sa Brgy. Marulas)

• Valenzuela Astrodome (taxpayers mula sa Brgy. Dalandanan, Malanday, Coloong, Pasolo, Rincon, Malinta, Veinte Reales, Canumay West, and Lingunan)

Pinaalalahanan ng lungsod ng Valenzuela ang lahat na panatilihin ang pagsasagawa ng social distancing at pagsusuot ng face mask at face shield.

13.5B para sa libreng COVID-19 vaccine sa mga taga- Taguig

ni Thea Janica Teh | January 5, 2021

Naglaan na ng kabuuang P1 bilyon ang lokal na pamahalaan ng Taguig para sa COVID-19 vaccination ng kanilang mga residente.

Inanunsiyo noong Disyembre 23, 2020 ng Department of Budget and Management na naaprubahan ang P13.5 bilyong budget para sa pandemic recovery plan kung saan kasama ang mass testing, treatment at vaccination ngayong 2021.

Ayon kay Mayor Lino Cayetano, ang lahat ng residente ng Taguig ay makatatanggap ng COVID-19 vaccine nang libre. Naghahanda na rin umano ang lokal na pamahalaan ng Taguig para sa pagbili at distribusyon kapag naaprubahan na ng bansa ang vaccine.

Aniya, "We are working closely with the national government. We want to assure all Taguigeños na mayroon tayong vaccination delivery plan at pagkatapos ng allotment ng national government, we are working hard, diretso pa sa ibang suppliers ng mga vaccine na bukod po sa ipo-provide ng national government."

"We will set aside money po para makasigurado na meron tayong vaccination plan at puwedeng mabakunahan ang lahat ng Taguigeño nang libre," dagdag ni Cayetano.

Bukod pa rito, nakikipag-usap na rin sila sa ilang suppliers ng vaccine at sakop umano ng programang ito ang 28 barangay.

Samantala, mayroon namang karagdagang tulong na ibibigay para sa mga senior citizens dahil kabilang ang mga ito sa vulnerable individual ngayong pandemya.

Pinaalalahanan naman ni Cayetano ang kanilang mga residente na panatilihin ang pagsunod sa health protocols tulad ng pagsusuot ng face mask at face shield at pagsasagawa ng social distancing kahit na malapit nang magkaroon ng vaccine.