Negros Occidental, lubog sa baha, 200 pamilya inilikas

ni Thea Janica Teh | January 9, 2021

Binaha ang malaking bahagi ng Negros Occidental dahil sa walang tigil na pag-ulan simula pa nitong Biyernes.

Ayon kay Zeaphard Caelian, head ng Disaster Management Program Division ng lalawigan, “May mga cities and municipalities po tayo kaninang affected na ng flooding because of torrential rains and light to moderate to heavy to sometimes severe rains dito sa ating area sa province ng Negros Occidental.”

Ilan sa mga lubos na naapektuhan ng pag-ulan at pagbaha ay ang bayan ng Talisay, Silay, EB Magalona, Victorias, Cadiz, Sagay at Escalante.

Libu-libong katao rin ang tinatayang lumikas sa evacuation centers dahil lampas-tao na ang baha sa kanilang mga tinitirhan. Kaya naman, agad ding tumulong ang Philippine Coast Guard at nagsagawa ng rescue operation.

“'Yung continuous rains talaga ang isang factor, plus marami rin kaming nakitang obstruction sa ating mga river system like mga garbage, siltation ng river banks and river system na nakapag-contribute sa taas ng tubig sa ating area,” kuwento pa ni Caelian.

Samantala, nasa 1,089 pamilya na ang inilikas sa Victorias, habang 200 pamilya naman sa Talisay at 295 pamilya mula sa 19 barangay ng Silay City.

Konduktora at pasahero sa nasunog na bus, dating magka-live-in, nag-away

ni Thea Janica Teh | January 9, 2021

Nakilala na ngayong Sabado ang pasaherong nasunog sa loob ng bus sa nangyaring insidente sa Fairview, Quezon City noong Enero 3.

Ayon kay Bureau of Fire Protection-Quezon Operations Fire Chief Inspector Joseph del Mundo, kinilala ang biktima na si Edwin Dejos, 49-anyos.

Sa imbestigasyon, napag-alamang si Dejos at ang konduktorang nasunog din na si Ameline “Amy” Sembrana ay dating live-in partners at may tatlong anak.

Sa kuwento ng mga kasamang pasahero, nag-away umano ang dalawa sa loob ng bus na naging sanhi ng pagsaboy ni Dejos ng gas kay Sembrana.

Sa ngayon, ayon kay del Mundo, wala pa ring kumukuha ng labi ni Dejos sa Rizalde Funeral Services sa Barangay Payatas, Quezon City dahil napag-alamang nasa Cebu ang mga kamag-anak nito.

Unang naging asawa ni Sembrana ang kakambal ni Dejos na matagal nang pumanaw. Naiwan ni Sembrana ang siyam nitong anak kasama ang kambal na isang taon pa lamang.

Bagong variant ng COVID-19, nadiskubre sa South Africa

ni Thea Janica Teh | January 9, 2021

Ikinababahala ng ilang scientists ang bagong COVID-19 variant na nadiskubre sa South Africa at tinawag na E484K mutation.

Nagpaplano nang magsagawa ng kaparehong test na ginawa sa COVID-19 variant na nadiskubre sa UK ang mga scientists upang malaman kung epektibo pa rin ang nagawang COVID-19 vaccine ng Pfizer Inc. at BioNTech.

Napag-alaman namang epektibo pa rin sa bagong variant ng COVID-19 sa UK ang vaccine na gawa ng Pfizer Inc. at BioNTech, ayon sa isinagawang laboratory study ng US drugmaker.

Sa pag-aaral ng Pfizer at mga scientists mula sa University of Texas Medical Branch, epektibo pa rin ang vaccine sa pagnyu-neutralize ng virus na kung tawagin ay N501Y mutation.

Ibinahagi ni Phil Dormitzer, isa sa top viral vaccine scientists ng Pfizer Inc. na pinag-aralan ng mga ito na maaaring ang mutation ang dahilan ng mabilisang pagkalat ng virus at inaalala na maaaring mawala ang antibody neutralization mula sa vaccine.

Kaya naman nagsagawa sila ng test sa 16 na magkakaibang mutation at kumuha ng blood sample sa mga taong nakakuha na ng vaccine.

“So we've now tested 16 different mutations, and none of them have really had any significant impact. That's the good news... That doesn't mean that the 17th won't,” ani Dormitzer.