Travel Restriction, mas hinigpitan vs. bagong klase ng COVID-19

ni Thea Janica Teh | January 13, 2021

Inirekomenda ng OCTA Research Group ngayong Miyerkules sa pamahalaan na palawigin pa ang 2 linggong travel restriction sa mga bansang nakapagtala ng bagong variant ng COVID-19.

Nitong Martes, nadagdag sa listahan ang bansang China, Pakistan, Jamaica, Luxembourg at Oman na epektibo lamang hanggang Biyernes. Ayon kay Guido David, miyembro ng OCTA Research Group, kinakailangang ipatupad ang mas pinahigpit na border control, monitoring at quarantine ng mga biyahero.

Aniya, "Nire-recommend talaga nating i-extend 'yan...Posibleng nakapasok na rito. Kung nakapasok na, posibleng hindi ganu'n karami 'yung cases natin ng bagong variant dahil baka nakontrol naman natin 'yung pagpasok."

Dagdag pa nito, kung hindi na palalawigin ang travel restriction ay malaki ang posibilidad na makapasok na sa bansa ang bagong variant ng virus at maaari pang lumaki ang bilang ng kaso ng COVID-19 sa bansa.

Nauna nang ibinahagi ng Department of Health na wala pang naitatalang kaso ng bagong variant ng virus sa Pilipinas. Sinabi rin ni David na mababa pa ang kasong naitatala ngayon dahil halos 40% ng laboratories sa bansa ang nagsara nitong Christmas season.

"Slowly nakukuha na natin ang mga nag-positive during the holidays pero 'di pa siguro lahat-lahat. Ang nakikita nating average number niyan, almost 2,000 cases per day na naitatala natin," ani David. Inaasahan din na ang epekto ng pagdikit-dikit ng mga debotong dumalo sa Kapistahan ng Poong Nazareno ay maitatala sa susunod na linggo.

Visayas at southern Mindanao, magiging maulan dahil sa LPA

ni Thea Janica Teh | January 13, 2021

Isang low pressure area (LPA) ang magdadala ng malakas na pag-ulan ngayong Miyerkules sa Visayas at southern Mindanao, ayon sa PAGASA.

Huling namataan ang LPA sa 210 kilometers south ng Zamboanga City, Zamboanga del Sur. Ayon kay PAGASA weather forecaster Benison Estareja, maliit ang posibilidad na maging bagyo ang binabantayang LPA.

Ngunit, pinaalalahanan pa rin ng PAGASA ang mga naninirahan sa Visayas, Caraga, Northern Mindanao, Zamboanga Peninsula, Bangsamoro, Sorsogon at Masbate na maaaring magkaroon ng flash flood at landslide dahil sa malakas na pag-ulan.

Dagdag pa ni Estareja, makararanas din ng localized thunderstorm ang Davao Region at Soccskargen na magtatagal ng 1 hanggang 2 oras. Bukod pa rito, ang Metro Manila at natitirang bahagi ng Luzon ay makararanas ng mahinang pag-ulan dahil naman sa hanging amihan.

Samantala, nakapagtala ng temperaturang 20.7 degrees Celsius kaninang 5:00 am ang National Capital Region at ang Baguio City naman ay nakapagtala ng 12.2 degrees Celsius kaninang 2:00 am.

Biyaherong papasok sa US, 3 days dapat COVID negative

ni Thea Janica Teh | January 13, 2021

Kinakailangan nang magnegatibo sa COVID-19 test ang lahat ng pasahero ng eroplanong papasok sa United States sa loob ng tatlong araw ng kanilang departure bago payagang makapasok sa kanilang bansa, ayon sa Centers for Disease Control and Prevention (CDC) nitong Martes.

"Testing does not eliminate all risk but when combined with a period of staying at home and everyday precautions like wearing masks and social distancing, it can make travel safer," sabi ni CDC Director Robert Redfield. Ito ay magiging epektibo simula Enero 26, 2021 at pag-iingat na rin sa posibilidad na pagpasok ng bagong variant ng virus sa kanilang bansa.

Matatandaang nakapagtala na ng bagong variant ng virus ang bansang South Africa, Brazil at Japan. Sa ngayon ay inaaral na ng mga nabanggit na bansa kung paano ito malalabanan.

Bukod pa rito, inirerekomenda rin ng CDC sa mga pasahero na magpa-test muli 3 o 5 araw matapos ang kanilang pagdating at mag-quarantine sa bahay nang hanggang 7 araw. Ang test na ito ay para sa “current infection” at kinakailangan na may written proof ang lahat ng pasahero na ipapasa sa airlines, bago ito payagang makasakay ng eroplano.

Samantala, may ilang eksperto na ang nagbigay ng babala sa publiko na maaaring nabubuo na ang bagong variant sa loob ng US dahil sa dami ng nagkakaroon ng virus sa araw-araw at sa dami ng namamatay dito.