Cement mixer, sumabit sa kable, 3 poste bumagsak sa sasakyan

ni Thea Janica Teh | December 24, 2020

Isang cement mixer ang sumabit sa power line sa kahabaan ng CAA Road sa Las Piñas na dahilan ng pagbagsak ng poste sa dalawang sasakyan at isang tricycle ngayong Miyerkules.

Kumalat ang kuha ng isang netizen sa social media at makikita ang pagsabit ng cement mixer na dahilan upang mahila at lumiyab ang kable.

Makikita rin na patuloy na umaandar ang cement mixer kahit na sumabit na ito sa kable kaya naman natangay nito at natumba ang tatlong poste na bumagsak sa ilang sasakyan.

“Noong dumadaan kami, biglang may bumagsak na poste ng Meralco, tapos pagbagsak, sumunod na ‘yung poste ng mga cable wire.

‘Yung kotse namin, ‘yun ang napuruhan. Nabigla kami,” ayon sa isang motoristang nakakita sa insidente. Samantala, wala namang naitalang nasugatan sa nangyaring insidente.

Deadline sa pagpapasa ng prangkisa ng mga tsuper, extended sa Marso 2021

ni Thea Janica Teh | December 23, 2020

Mas pinalawig pa ngayong Miyerkules ng Land Transportation Franchising and Regulatory Board (LTFRB) ang deadline para sa pagpapasa ng aplikasyon sa consolidation ng individual at existing franchise holder sa ilalim ng PUV Modernization Program hanggang March 31, 2021.

Ayon kay DUMPER-PTDA party-list Representative Claudine Bautista, nag-isyu kamakailan ang LTFRB ng Memorandum Circular No. 2020-084 kung saan ipagpapaliban ang deadline nito sa December 31, 2020 at iuusog sa Marso, 2021.

Ang orihinal na deadline nito ay noong Hulyo 31 pa, ngunit napagdesisyunan ng LTFRB na palawigin ito hanggang katapusan ng taon alinsunod sa deklarasyon ni Pangulong Duterte sa National Health Emergency dahil sa COVID-19.

Samantala, ini-request ni Bautista na mas palawigin pa ito dahil hindi pa umano nakare-recover ang public transport industry dahil sa pandemya.

Aniya, “PUV operators and drivers cannot at this moment shoulder the cost that comes with the filing of their application for consolidation. Their current economic situation necessitates that they be given more time to get back to their own feet and fully recover.”

Ibinahagi rin ni Bautista ang Bayanihan to Recover as One Act kung saan hindi pinapayagan ang mga phase out at non-compliance routes.

“I never doubted that the LTFRB will heed the appeal of the public transport sector. The board deserves a commendation from a grateful industry,” dagdag ni Bautista.

Aftershock na Magnitude 4 na lindol, naramdaman sa Davao Occidental

ni Thea Janica Teh | December 22, 2020

Isang Magnitude 4 na lindol ang tumama sa Davao Occidental ngayong Martes nang umaga, ayon sa Phivolcs.

Ito ay naramdaman kaninang 9:19 am sa southwest ng bayan ng Sarangani na may lalim na 30 kilometers. Ito rin umano ay isang aftershock sa nakaraang magnitude 6.2 na lindol na tumama noong Miyerkules.

Wala namang inaasahang aftershock sa nangyaring pagyanig.

Samantala, naramdaman din ang Instrumental Intensity II sa General Santos City at Instrumental Intensity I sa bayan ng Kiamba at Alabel sa Sarangani province.

Kaninang madaling-araw ay niyanig din ng Magnitude 4.9 na lindol ang Quezon Province at naramdaman hanggang Metro Manila.

Wala namang naitalang nasugatan o nasirang istruktura sa nangyaring pagyanig.