Matataas na gusali, pahiwatig na dapat taasan pa ang pangarap

ni Seigusmundo Del Mundo - @Panaginip, salamin ng inyong buhay | June 24, 2020

Salaminin natin ang panaginip ni Myrna na ipinadala sa Facebook Messenger.

Dear Professor,

Bigla akong napunta sa city sa panaginip ko, pero sa totoong buhay, nasa probinsiya ako at madalang akong pumunta sa Manila.

Sa panaginip ko, naglalakad ako sa isang magandang street. Matataas ang building, sobrang taas at hindi ko tanaw ‘yung nasa tuktok na floor. Nag-iisa lang ako sa panaginip at ang suot ko ay hindi naman panluwas na damit at halos pantulog lang ‘yung suot ko.

Ano ang ibig sabihin ng panaginip ko?

Naghihintay,

Myrna

Sa iyo Myrna,

Dinala ka ng iyong panaginip sa magandang lugar na larawan ng maunlad na siyudad. Ito ay para malaman mo na kailangan mong mangarap, hindi lang para gumanda ang buhay mo kundi upang maabot mo ang iyong matataas na pangarap.

Kaya kung ngayon ay simple lang ang mga pangarap mo sa buhay, gawin mo itong malalaki, matatayog at matataas tulad ng mga gusali na nasa iyong panaginip. Dapat ang ambisyon mo sa buhay ay mga dakilang ambisyon, kumbaga, nakakamangha at nakakatulala kapag narinig o nalaman ng iba.

Maaaring sabihin nila na napakataas at napakatayog ng ambisyon mo kaya sasabihin nila na malabong makuha mo ang mga ito. Kumbaga, hindi mo mararating ang dulo ng iyong tagumpay na para bang sinabi nila walang mangyayari sa iyong ambisyon.

Doon sila nagkamali dahil ayon sa Law of Success, ang tao ay dapat mangarap nang matataas nang sa gayun ay bumagsak man sila, mataas pa rin ang kanilang pagkakalaglag.

Ang isang napakagandang halimbawa ng ganitong pormula ng tagumpay ay ang sa exam sa eskuwelahan. Pangarapin mo ang pinakamataas na grado—hindi mo man makuha ang pinakamataas, sure na mataas pa rin ang iyong magiging marka. Ganundin sa larangan ng pagpapayaman, pangarapin mo na ikaw ang maging pinakamayaman at sa huli, maaaring hindi ikaw ang tanghaling pinakamayaman, pero tiyak na isa ka sa mayayaman.

Kaya tulad ng mga gusali sa iyong panaginip, mangarap ka ng sintaas ng mga ito dahil hindi mo man maabot ang pinakamataaas na kalagayan, mataas pa rin ang antas ng buhay na iyong maaabot.

Hanggang sa muli,

Professor Seigusmundo del Mundo

Namumulot ng barya, senyales na minamaliit ang sarili

ni Seigusmundo Del Mundo - @Panaginip, salamin ng inyong buhay | June 23, 2020

Salaminin natin ang panaginip ni Olive na ipinadala sa Facebook Messenger.

Dear Professor,

Namumulot ako ng mga barya, tapos napuno na ‘yung kamay ko sa dami. Hindi pa rin ako humihinto sa kapupulot kahit pagod na ako. Ano ang ibig sabihin ng panaginip ko?

Naghihintay,

Olive

Sa iyo Olive,

Kapag nakapanaginip ng mga barya, ang nanaginip ay minamaliit ang kanyang sarili. Hindi ito magandang makaugalian dahil ang tao ay hindi maliit o hindi dapat minamaliit ninuman kahit ng mismong sarili niya.

Ganito ang sabi, “Nilikha ni God ang tao, ayon sa kanyang wangis,” kumbaga, in the image of God, man was created. Kaya lahat ng tao sa mundo noon at hanggang ngayon ay nagkakaisa sa sinasabing “Man is the greatest creation of God.”

Kaya hindi mo dapat minamaliit ang iyong sarili dahil ikaw ay hindi kawangis ng barya, ang iyong kalarawan ay dakilang pagyaman. From now on, ilagay mo sa isipan mo na ikaw ay hindi barya, bagkus, ikaw ay perang papel na lilibuhin.

Gawin mo ito at magugulat ka dahil ang libu-libong pera ay mahahawakan mo. Ang tawag sa ganitong batas ng tagumpay ay “think big”. Ang pahabol na kahulugan ay malalaki at magagandang kapalaran ang magsisidapo sa iyo.

Hanggang sa muli,

Professor Seigusmundo del Mundo