Kayamanan, paggaling sa karamdaman, powers at tukso, simbolo ng ahas

ni Seigusmundo Del Mundo - @Panaginip, salamin ng inyong buhay | September 1, 2020

Salaminin natin ang panaginip ni Cheann na ipinadala sa Facebook Messenger.

Dear Professor,

Madalas akong managinip ng ahas ngayon. Ano ang mensahe ng ahas sa panaginip ko?

Naghihintay,

Cheann

Sa iyo Cheann,

May mga ahas na sinisimbolo ng kayamanan dahil ang ahas ay tagapagbantay ng nakatagong yaman. Ito ay ang panaginip na ang ahas ay may magagandang kulay tulad ng green, yellow orange, red at iba pa.

May ahas din na ang simbolo ay paggaling sa karamdaman. Ito ay kapag ang nanaginip o mahal niya sa buhay ay may sakit o iniindang karamdaman.

May ahas na ang inilalarawan ay personal power. Ito ay ang ahas sa panaginip na nakitang nakatayo o nakataas at hindi ang ahas na gumagapang. Ito ay nagpapayo na mag-ehersisyo ang nanaginip nang lumbas ang kanyang naiibang galing at husay.

May ahas na ang simbolo ay tukso. Ito ay ang ahas na malaki na nasa loob ng kuwarto at tumatabi sa nanaginip. Minsan, maliit lang din ang ahas na ito, pero may mapanuksong titig na ang mga mata ay nakatingin sa mga mata ng nanaginip.

May ahas na malaki kung saan tukso rin ang ibig sabihin, pero ang tinutukso ay ang partner, asawa o karelasyon ng nanaginip. Ang payo naman ay magmatyag ka dahil baka natukso na ng ahas ang mahal mo.

Hanggang sa muli,

Professor Seigusmundo del Mundo

Senyales na maganda at mapera ang gustong mapangasawa

ni Seigusmundo Del Mundo - @Panaginip, salamin ng inyong buhay | August 30, 2020

Salaminin natin ang panaginip ni Olivar na ipinadala sa Facebook Messenger.

Dear Professor,

Nakasakay ako sa motor, maganda ang takbo ko sa una, pero bigla akong sumemplang. Hindi agad ako nakatayo, may sugat ako sa tuhod at masakit ‘yung paa ko, tapos may sugat din ako sa braso.

Tinulungan ako ng babaeng nakasakay sa kotse, maganda siya, kaya kahit nahihirapan ako ay sinabi kong okey lang ako. Kumbaga, nagkunwari ako, pero mukhang hindi siya naniwala kaya inalalayan niya pa rin ako. Tapos, dumating na ang rescue team at isinakay ako sa ambulansiya, tapos nagising na ako.

Naghihintay,

Olivar

Sa iyo Olivar,

Nakatutuwa ang iyong panaginip, mukhang machong-macho ka, tigasin at lalaking-lalaki. Ayon sa iyong panaginip, ang gusto mong mapangasawa ay maganda at mayaman tulad ng babae sa panaginip mo.

Mangyari kaya ang wish mo? Malaki ang tsansa na makapag-asawa ng maganda at mayaman. Paano? Simple lang, panatilihin mo ang hiling na ito, kumbaga, anuman ang maranasan mo, ‘yun pa rin dapat ang gusto mong matupad. Ganu’n lang naman ang buhay sa mundo na nagsasabing ang hindi umaayaw sa kanyang pangarap ay nagtatagumpay.

Paano kung makakita ka ng maganda pero hindi mayaman? Ang sagot ay huwag mong pansinin dahil ang gusto mo ay mayaman at maganda.

Paano naman kung may makita kang mayaman pero hindi maganda? Naku, baka magbago ka ng pangarap dahil sa totoo lang, ang yumaman lang ang talagang gusto ng mga tao. Gayunman, huwag mo pa rin siyang pansinin. Bakit? Dahil mismong panaginip ang nagbibigay ng garantiya na ikaw ay makapag-aasawa ng mayaman at maganda tulad ng nasa iyong panaginip. Gayundin, ang mismong panaginip ay paunang sulyap kung sino ang iyong mapapangasawa.

Hanggang sa muli,

Professor Seigusmundo del Mundo

Nahulog na dahon mula sa puno, simbolo ng parating na pagbabago

ni Seigusmundo Del Mundo - @Panaginip, salamin ng inyong buhay | August 29, 2020

Salaminin natin ang panaginip ni Dindo na ipinadala sa Facebook Messenger.

Dear Professor,

Napanaginipan ko ‘yung puno ng mangga sa harap ng bahay namin na palagi kong inaakyat dahil maraming bunga at nakita kong nahuhulog ‘yung mga dahon at napakaraming tuyong dahon sa lupa.

Sabi ko, hindi na ko makakakuha ng mangga dahil namatay na yata ‘yung puno, saka ako nagising.

Naghihintay,

Dindo

Sa iyo Dindo,

Sa ngayon, madalas nating marinig ang tinatawag na “new normal” dahil magbabago na ang takbo ng buhay pagkatapos ng COVID-19 pandemic at kahit ngayong may pandemya ay marami nang nagbago.

Ang totoo, kahit anong new normal, may kaugnayan man sa COVID o wala, ang ibig sabihin ay may dati at kasalukuyang “normal” o nakasanayan at ang new normal na parating ang papalit sa ating mga nakasanayan noon.

Ibig sabihin, mawawala na ang lahat at mapapalitan ng bago. Ang prosesong ito ng buhay ay inilalarawan mismo ng mga halaman na nahuhulog, as in, nalalagas ang mga dahon upang mabigyang-daan ang bago at sariwang mga usbong.

Ang panaginip ay ganundin ang mensahe—may mga mawawala sa iyo, may aalis at lalayas, pero wala kang dapat ikalungkot dahil ang lahat ay kailangang mangyari nang mabigyang-daan ang pagdating ng iyong mga bagong kapalaran.

Hanggang sa muli,

Professor Seigusmundo del Mundo