Pangarap na magtrabaho sa manila para mas malaki ang kita, magkakatotoo

ni Seigusmundo Del Mundo - @Panaginip, salamin ng inyong buhay | October 18, 2020

Salaminin natin ang panaginip ni Ate Vicky na ipinadala sa Facebook Messenger.

Dear Professor,

Lumuwas ako sa Manila dahil magwo-work ako roon. Dito sa amin sa Gapan, saleslady ang trabaho ko at ang liit ng kita, kaya noon pa man ay gusto ko nang makapagtrabaho sa Manila.

Magkakatotoo ba ang panaginip ko na sa Manila na ang work ko?

Naghihintay,

Ate Vicky

Sa iyo, Ate Vicky,

Maliit lang din ang kita ng saleslady sa Manila, lalo na kapag sa palengke ang puwesto ng paninda. Kapag naman sa kumpanya, malaki pero maraming requirements bago ka matanggap.

Ang nasa isip mo ay kung paano gaganda ang iyong buhay, kaya ang nais mo ay lumaki ang kita mo. Mas magandang maunawaan mo na sa totoo lang, wala sa laki ng sahod o kita ang ganda ng trabaho, ang dapat isipin ay kung maganda ba ang buhay ng isang namamasukan.

Nasa dami ng naipon ang basehan kung ang pamamasukan ay maganda o hindi. Kaya kahit naman nasaan ka, dapat ay may naiipon ka. Kumbaga, kahit malaki ang kita ng isang tao, kung wala naman siyang ipon, walang silbi ang malaking kinikita niya.

Ang panaginip mo ay nagsasabing makapagtatrabaho ka sa Manila bilang isa ring saleslady. Kaya huwag na huwag mong kakalimutan na kung may ipon o wala ang batayan kung maganda ang pamamasukan.

Hanggang sa muli,

Professor Seigusmundo del Mundo

Carousel at yumaong tita, pahiwatig na magkakaroon ng magandang future

ni Seigusmundo Del Mundo - @Panaginip, salamin ng inyong buhay | October 17, 2020

Salaminin natin ang panaginip ni Maribel na ipinadala sa Facebook Messenger.

Dear Professor,

Ano ang ibig sabihin ng panaginip ko na maraming tao na nasa kalawakan at nakasakay sa malaking carousel tulad ng nasa amusement park at ang ganda nito, tapos lahat sila ay puting-puti ang mga damit at maliwanag din ang kalangitan?

Pangalawa, masaya kaming nagkukuwentuhan ng tita ko, pero tatlong taon na siyang pumanaw at super-close kami nang nabubuhay pa siya at kapag may problema ako, lagi ko siyang napapanaginipan. Maraming salamat. Keep safe and God bless!

Naghihintay,

Maribel

Sa iyo, Maribel,

Ang panaginip mo ay nagbabalita na magkakaroon ka ng pagkaganda-gandang future. Ito ang gustong ipahiwatig ng panaginip mo na carousel tulad ng nasa amusement park.

Kaya panatilihin mo ang iyong magagandang katangian at ang pagiging positibo ay lagi mo ring isabuhay. Ang pagmamahal sa kinikilala mong Diyos ay palagi mong yakapin.

Ang pagmamahal sa kapwa na likas sa iyo ay lagi mo ring isabuhay. Ang pagtulong sa hindi kakilala o pagpapasaya sa hindi mo kaano-ano, paminsan-minsan ay gawin mo.

Dahil sa lahat ng ito, palagi kang kakalingain ng langit na ang ibig sabihin, ang maliliit at ang malalaking request mo ay bibigyan ng katuparan.

Muli, huwag mong bibitawan ang iyong faith o paniniwala sa nasa itaas.

Hanggang sa muli,

Professor Seigusmundo del Mundo

Nangingisda, pahiwatig na parating ang masaganang buhay

ni Seigusmundo Del Mundo - @Panaginip, salamin ng inyong buhay | October 16, 2020

Salaminin natin ang panaginip ni Braynt na ipinadala sa Facebook Messenger.

Dear Professor,

Ano ang ibig sabihin ng magkasama kami ng asawa ko sa isang ilog na mababaw at malinis, tapos nanghuhuli kami ng isda? May nakita kaming isda na malaki ang tiyan, hinuli at inilagay ko sa basket na hawak ng asawa ko. ‘Yung paisa-isang lumalangoy papunta sa kinatatayuan namin ay hinuli ko lahat at inilagay sa basket.

Naghihintay,

Braynt

Sa iyo, Braynt,

Noon pa man hanggang ngayon, ang isda ay sinisimbolo ng suwerte at dahil dito sa mundo ay maraming klase ng suwerte at para mas malinaw, ang isda ay nagsasabing masaganang buhay ang darating sa inyo.

Ang masaganang buhay ay may iba’t iba ring larawan, pero sa isda, ito ay ang “walang gutom dahil maraming biyaya.” Kumbaga, kaligtasan sa taggutom o kahirapan. Isang magandang balita ito para sa inyo ng iyong asawa. Sa dinaranas natin na paghihirap dahil sa COVID-19 pandemic, kayo ng asawa mo ay pinaniniwalaang hindi mapabibilang sa naghihirap kundi mapabibilang sa gumaganda ang buhay.

May isang paglilinaw para sa iyong kaalaman nang hindi kayo maligaw ng paniniwala. Kapag isda ang napanaginipan na tulad ng nasabi na simbolo ng suwerte, ang nanaginip ay pinapayuhan na huwag magbabago ng paniniwala sa kanyang Diyos na kinikilala.

Ibig sabihin, dapat ay malapit kayo sa langit, gumawa ng mabuti sa kapwa at magkawang-gawa. Ang isda ay hindi pangkaraniwang isda kapag napanaginipan dahil ito ay si Lord Jesus Christ mismo, ang Tagapaglitas.

Hanggang sa muli,

Professor Seigusmundo del Mundo