Pahiwatig na gamitin ang kalayaan sa pagpapayaman

ni Seigusmundo Del Mundo - @Panaginip, salamin ng inyong buhay | October 25, 2020

Salaminin natin ang panaginip ni Kennent Joy na ipinadala sa Facebook Messenger.

Dear Professor,

Napanaginipan ko na sumakay ako ng single na motor, tapos kung saan-saan ako pumunta. Ang ipinagtataka ko ay hindi naman ako marunong mag-drive ng motorcycle sa totoong buhay. Pero sa panaginip, ang bilis kong magpaandar sa high-way, tapos kapag nasa siyudad, mabagal lang na para akong namamasyal.

Pupunta sana ako sa lagpas sa Metro Manila, kaya lang, naubos na ‘yung fuel, tapos iniwanan ko na lang sa kalsada ‘yung motor ko, tapos nagising na ako.

Naghihintay,

Kennent Joy

Sa iyo, Kennent Joy,

Masasalamin sa panaginip na malaya nang nagagawa ng mga tao ang gusto nilang gawin o malaya nang napupuntahan ang kanilang gustong puntahan.

Isang malinaw na senyales ito na nawala na ang takot mo sa COVID-19, kaya kung sino pa ang unang aabante ang buhay, ang sagot ay lalamang ka sa isa sa mga ito.

Totoong sa panaginip, hindi naman kinakitaan ng tungkol sa trabaho o kabuhayan, pero ang pagiging malaya ng tao ang paunang palatandaan na siya ay magtatagumpay sa anumang larangan na kanyang gustong tutukan.

Kalayaan ang susi ng tagumpay. Ang kawalan ng kalayaan naman ay susi rin, pero susi ng kalungkutan at kawalan ng pagsulong ng personalidad at mismong buhay.

Malaya na ang tao dahil pumayag na ang mga awtoridad na maglakbay kahit saan, kaya ang payo, samantalahin mo ito para sa pagpapaunlad ng iyong buhay.

Sa una, dahil sabik ang mga tao, kung anu-ano ang kanilang ginagawa at kung saan-saan sila pupunta tulad ng nangyari sa panaginip mo, pero sa huli, may tututukan na silang aktibidad at para sa iyo, pagpapaganda ng kabuhayan ang iyong dapat pagkaabalahan.

Hanggang sa muli,

Professor Seigusmundo del Mundo

Zombie, pahiwatig na babalik ang multo ng nakaraan

ni Seigusmundo Del Mundo - @Panaginip, salamin ng inyong buhay | October 23, 2020

Salaminin natin ang panaginip ni Severe Karissa na ipinadala sa Facebook Messenger.

Dear Professor,

Hindi ako mapakali sa panaginip ko, kaya sana ay masagot at mapansin n’yo ako dahil mahilig akong magbasa ng mga panaginip sa BULGAR dahil ito ay gabay para sa lahat.

Noong nakaraang buwan, nabasa at napanood ko ang prediction ni Nostradamus na magkakaroon ng zombie next year na mag-uumpisa sa Russia. Hindi ko masyadong iniisip ‘yun, kaso ilang beses na akong nanaginip ngayon ng zombie, pero binabalewala ko naman.

Pero kanina, may nakita na naman akong prediction sa YouTube. Hindi tuloy ako mapakali kahit alam kong nand’yan si God at hindi Niya tayo pababayaan, pero nag- aalaala pa rin ako.

Noong isang araw, nagising ako nang alas-6:00 ng umaga, tapos natulog ako ulit at bandang alas-7:00 ng umaga, nagsimula ang panaginip kong nasa isang building ako at sa isang kuwarto, pumasok ang mga zombie. Sa takot ko, nakalabas ako ng kuwarto, tumakbo ako at may nakita akong hagdan, tapos tumalon ako.

Naghihintay,

Severe Karissa

Sa iyo, Severe Karissa,

Alam mo, iha, noong unang panahon, walang zombies sa Western world at dito rin sa atin. Kaya lang naman nauso at inilagay sa diksiyunaryo ang zombies ay dahil sa mga sumikat na pelikula tungkol dito.

At dahil patok na patok ang pelikula kapag tungkol sa zombie, dumami nang dumami ang mga palabas na ganito ang tema. Sa pagdami ng mga best-selling movies na zombie, natanim sa kamalayan ng maraming tao na ang zombie ay totoo.

Kaya ngayon, tulad mo na may zombie sa panaginip ay dahil nar’yan sa iyong malalim na kamalayan ang paniniwala sa mga palabas o pelikula tungkol sa zombies.

Sa panaginip, ang may nakitang zombies ay nagsasabing muling babalik sa buhay mo ang mga multo na iyong nakaraan tulad ng zombies na iyong kinatatakutan.

Hanggang sa muli,

Professor Seigusmundo del Mundo

Susundin ang puso at hindi ang isip, pahiwatig ng panaginip na walang ulo

ni Seigusmundo Del Mundo - @Panaginip, salamin ng inyong buhay | October 22, 2020

Salaminin natin ang panaginip ni Mhelo Dy na ipinadala sa Facebook Messenger.

Dear Professor,

Gusto kong malaman ang ibig sabihin ng panaginip ko. Napanaginipan ko ‘yung kapamilya ko na wala siyang ulo. Bad omen ba ‘yun? Sana ay masagot n’yo ako. Salamat!

Naghihintay,

Mhelo Dy

Sa iyo, Mhelo Dy,

Oo, iha, bad omen ang walang ulo sa panaginip dahil tayong mga Pinoy ay mapamahiin, pero ang pagiging mapamahiin natin ay hindi naman likas sa ating kultura. Tinuruan lang naman tayo ng mga Kastila na mabuhay sa negatibong kaisipan nang sa gayun ay sila ang magpakasaya sa likas na yaman ng ating bansa.

Huwag kang matakot, malayo na ang bagong mundo sa mundo ng mga pamahiin na ating lumang sibilisasyon. Kaya iba na rin ang mga pananaw sa buhay at mas tama at maganda na dahil ang “bagong ngayon” ay dahilan kaya ang mundo ay maunlad at papaunlad pa na nagiging ultra modern na.

Nagsimula ang “bagong ngayon” nang magkaroon ng siyensya o science. Dumami rin ang sangay ng agham at isa na rito ang sangay ng sikolohiya.

Dahil dito, gusto kong ipaabot sa iyo na ayon sa mga makabagong teorya sa sikolohiya, ang panaginip na walang ulo ang isang tao ay simple lang ang kahulugan. Ito ay nagsasabing susundin niya ang kanyang puso at hindi ang isip.

Halimbawa, sa love life, puso ang kanyang pakikinggan at ang isipan niya ay mababalewala kahit ang mga katwiran ng isip ay tuwid at nasa tama.

Ang ganitong katotohanan ay makikita natin sa bagong kasabihan na, “Heart has reasons that the mind does not know.”

Hanggang sa muli,

Professor Seigusmundo del Mundo