Singsing, simbolo ng bagong kabanata ng buhay na darating

ni Seigusmundo Del Mundo - @Panaginip, salamin ng inyong buhay | November 30 , 2020

Salaminin natin ang panaginip ni Mary Jane na ipinadala sa Facebook Messenger.

Dear Professor,

Gusto kong malaman kung ano ang kahulugan kapag nanaginip ng singsing? Ngayong umaga, nanaginip ako na nasa isang lugar ako na maraming nagtitinda sa lapag. Nakaupo ako at nasa aking kandungan ang isang singsing na panlalaki na silver at sabi ko sa sarili ko, “Saan ito nanggaling?” Naisip ko na baka sa kinain kong bulalo dahil nakita kong parang galing sa nilutong ulam ang singsing.

Tapos, may umiikot na tumitingin ng mga alahas kung tunay o hindi, at napatingin ako sa kandungan ko at sabi ko, “Patingnan ko kaya ito?” Kaya lang, nawala na ‘yung tumitingin ng singsing.

At sa panaginip ko, napunta ako sa manugang ko. Naglilipat sila ng bahay at nakita ko ang bahay na pangkaraniwan lang at hindi sementado ang paligid, tapos tiningnan ko at may mga kurtina pero kulang pa. Sabi ko sa manugang ko, “Medyo maraming kurtina ang mailalagay dito.”

Tapos, bago ako magising sa panaginip ko, parang kasama ako roon, bata pa ako sa panaginip at may dumating na lalaking medyo may edad na, pero parang may kaya sa buhay. Siya ang susundo sa amin, tapos may kasama akong aalis pero mauuna ako at sabi ng nanay ko, mauna na ako. May naghihintay sa amin na sasakyan. Iyak ako nang iyak at yakap-yakap ko ang nanay ko at sabi ko, “Mama ko, mahal na mahal ko kayo!” Sa panaginip ko, bata pa ang nanay ko pero matagal na siyang patay.

Ano ang ibig sabihin ng mga panaginip kong ito?

Naghihintay,

Mary Jane

Sa iyo, Mary Jane,

Ang singsing sa panaginip mo ay sumisimbolo ng bagong mga kabanata ng buhay mo na darating sa iyo kung saan ang sabi ng panaginip mo, habang abala ka sa paghahanapbuhay, magdaratingan ang maraming magagandang pagkakataon.

Ang mga kakilala mo at malalapit sa iyo ay makikitang hindi agad-agad maniniwala na papaganda ang buhay mo, kumbaga, patuloy silang mag-aalinlangan kahit kitang-kita nila ang mga paunang palatandaan.

Nagbabalita rin ang panaginip mo na dahil gaganda ang kapalaran mo, gaganda rin ang lahat ng nasa iyo, kabilang dito ang bahay, buhay-pamilya at iba pang mga personal na aspeto ng buhay mo.

Kaya iyak ka nang iyak sa panaginip ay dahil sa pagkakaroon mo ng bagong magandang buhay, parang ayaw mo ring iwanan ang iyong nakaraan at kasalukuyan. Kaya lang, sabi ng panaginip mo, ang mga ito ay noon pa nakatakda na maganap sa buhay mo. At dahil nakatakda, ibig sabihin, ayaw mo man o kahit nag-aalinlangan ka, tuloy pa rin na guguhit sa iyong kapalaran ang nasabing pagbabago – isang pagbabago patungo sa tiyak na pag-unlad.

Hanggang sa muli,

Professor Seigusmundo del Mundo

Nakontrol ang sunog sa kahuyan, pahiwatig na kumilos kahit walang ideya sa mga kaganapan sa buhay

ni Seigusmundo Del Mundo - @Panaginip, salamin ng inyong buhay | November 29 , 2020

Salaminin natin ang panaginip ni Wilma na ipinadala sa Facebook Messenger.

Dear Professor,

Nag-aalala ako dahil nanaginip ako na nasa dagat ako, as in, sa gitna ng karagatan. Lumalangoy ako at masyadong maalon sa gitna ng dagat, tapos lumangoy ako nang lumangoy hanggang nakarating ako sa pampang. Tapos, lakad ako nang lakad paakyat ng bukid dahil may paparating na tsunami. Noong nasa kahuyan na ako, hindi ako makapunta sa itaas dahil may sunog doon, as in, malaking sunog at parang impiyerno tulad ng mga nakikita natin sa palabas sa TV o pelikula.

Tapos, may nagsabi sa akin sa panaginip ko na kaya kong kontrolin ang aking isip para mahinto ‘yung sunog. Parang magic, nakontrol ko ang utak ko at huminto ang sunog hanggang umaliwalas na ‘yung paligid.

Naghihintay,

Wilma

Sa iyo, Wilma,

Sa kasalukuyan, ayon sa panaginip mo, dumaraan ka sa isang pagsubok kung saan hindi mo malalaman kung iyong kakayanin o ikaw ay matatalo. Pero ang tao, ‘di ba hindi naman nawawalan ng mga pagsubok? Kumbaga, normal lang ang pagdating at pag-alis ng mga pagsubok sa ating buhay.

Ang iba, nag-aakalang kapag ginagamitan ng talino ang pagsubok, matatalo na niya. Ang iba naman, nag-aakalang kapag hinaharap nang mukhaan ang mga pagsubok, sila ay mananalo. Ang iba pa nga, nag-aakalang kapag humingi sila ng tulong sa malalapit sa buhay nila, mareresolba na nito ang mga pagsubok. Karamihan, ipinauubaya kay Lord ang lahat, kumbaga, iba’t iba ang inaakala ng tao na panlaban sa mga pagsubok.

Mayroong lumang kuwento na paulit-ulit na ikinukuwento ng lola ko, at ito ay tungkol sa matanda at batang palaka na nahulog sa timba na may gatas ng kalabaw. Noong mga bata pa kami, maraming palaka rito samin sa Bulacan at marami ring gatas ng kalabaw. Kaya ang kuwento ni lola ay gustung-gusto naming pakinggan dahil naglalarawan ito ng buhay sa probinsiya.

Sabi ni lola, sa dalawang palakang nahulog sa timba ng gatas, matandang palaka ang makakaligtas dahil may talino siya dahil sa kanyang edad. Pero wala ring nangyari dahil nasa loob pa rin ng timba ang dalawang palaka. Kaya ang ginawa ng matandang palaka, nagrosaryo at tinawag ang lahat ng santo, pero nandu’n pa rin sila sa timba.

Pero ‘yung batang palaka ay kilos nang kilos at wala siyang ginawa kundi magkikilos. Sa kakikilos niya, naging keso ang gatas sa timba at dahil solid ang keso, nakatalon silang dalawa at tuwang-tuwa sila dahil sa sila ay nakaligtas.

Dito sa Maynila, wala namang gatas ng kalabaw, keso at palaka, pero rito sa siyudad, ang mga pagsubok ay hindi nawawala. Kung susuriin natin ang kuwento ni lola, may aral tayong makukuha — kapag hindi tayo pumayag na matalo ng pagsubok at kilos tayo nang kilos kahit hindi tayo nakapag-aral o wala tayong alam sa nangyayari sa atin, mas malamang na malagpasan natin ang kahit na anong malaking pagsubok.

Sa pagkilos, lalabas ang ating tunay na lakas, kumbaga, ang todong puwersa natin ay lilitaw kung saan siya mismong sinasabi ng iyong panaginip na nakontrol mo ang sunog. Oo, parang magic ang epekto ng pagkilos dahil mahimalang malulutas nito ang ating mga suliranin.

Pero kung hindi tayo kikilos, para na ring sinabing talo na tayo, kumbaga, game over na. ‘Yan ang hindi puwedeng mangyari sa iyo ngayon, kaya kilos na at kilos pa kahit hindi mo nauunawaan ang mga nangyayari sa iyong buhay sa kasalukuyan.

Hanggang sa muli,

Professor Seigusmundo del Mundo

Pinagbawalan ng yumaong ama, pahiwatig na ‘wag ituloy ang balak na puwedeng magpahamak sa nanaginip

ni Seigusmundo Del Mundo - @Panaginip, salamin ng inyong buhay | November 28 , 2020

Salaminin natin ang panaginip ni Annalyn na ipinadala sa Facebook Messenger.

Dear Professor,

Ano ang ibig sabihin ng panaginip ko na may isa kaming bahay at pinuntahan ko ito? Isang madilim na lugar at ‘yung bahay ay sobrang dilim din. Nakabukas ‘yung gate ng bahay, tapos papasok na ako pero biglang isinara ng papa ko ‘yung gate. Sabi niya, walang papasok doon kahit na sino. Nagtataka ako kung bakit hindi niya ako pinapasok, eh, anak naman niya ako. Umalis ako agad dahil natakot ako, pero sa totoong buhay, patay na ‘yung papa ko. Bakit ganu’n, patay na siya pero napanaginipan ko pa rin siya? Sana ay masagot n’yo ang kahulugan ng panaginip ko. Maraming salamat!

Naghihintay,

Annalyn

Sa iyo, Annalyn,

Ang sabi, “Mother knows best,” tama, ‘di ba? Pero may mga anak na sa totoo lang ay alam din nila na ang kanilang ina ay hindi okey. Kasi may mga nanay na mas matino ang anak, may maganda ang ugali at may alam kung ano ang mabuti at hindi.

Alam mo, ‘yung sinasabing “Mother knows best,” ay sa totoo lang, hindi lang para sa mga ina dahil ang sinasabing “Father knows best” ay totoo rin. Dahil ang simpleng ibig sabihin nito ay hindi tayo ipapahamak ng ating mga magulang.

Madalas, ang sinasabing “knows best” ay ginagamit ng matatanda dahil marami na silang naranasan, pinagdaanan at nilagpasang mga pagsubok sa buhay. Kumbaga, alam na niya kung ano ang puwedeng mangyari sa mga mahal nila sa buhay at kung itutuloy nila ang katigasan ng kanilang ulo, kaya ito rin ay nagsasabing “Elders know best.”

Marami na sa kabataan at iba pa na hindi nakinig sa sinabi ng magulang at nakatatanda, kaya sila ay napahamak, nabigo at nasaktan. Para hindi ka mapabilang sa mga “nabigo, nasaktan, kumain nang kumain at tumaba” o iba pang kahawig na salita, mas mabuting sundin mo ang mensahe ng iyong ama.

Sa panaginip mo, ang ipinagbabawal ni papa mo para sa iyo ay ang tinatawag na “curiosity”, ‘yun bang natutukso ang tao na alamin ang hindi niya alam o maranasan ang hindi pa niya naranasan. Sa kasaysayan ng mundo, “curiosity” ang tunay na may kasalanan kung bakit napalayas sa Paraiso sina Adam at Eve.

Isipin mo, iha, kung hindi natangay ng curiosity sina Adam at Eve, sana tayong lahat ay nabubuhay sa Paraiso. Ikaw, ‘di ba, ang gusto mo kaya ka nagsisikap ay ang magkaroon ka ng magandang buhay?

Hindi na sana tayo mahihirapan pa dahil sa Paraiso ay papasyal-pasyal lang ang tao at ang nararanasan nila ay walang iba kundi ang sobrang masarap na kalagayan. Pero ngayon, ano na ang nangyari? Kailangang maghirap muna ang tao para siya ay kumain. ‘Yung iba nga, hirap na hirap sa katatrabaho, kapos pa rin sa pambili ng pagkain.

Sayang, ‘di ba? Sana ay nabubuhay tayo sa Paraiso.

Curiosity din ang may sala kung bakit sa matandang kuwento tungkol sa “Gamo-gamo at Lampara,” nasunog ang pakpak ng gamo-gamo. Kasi natukso siyang lapitan ang maganda at nakaaakit na liwanag ng lampara, kaya nasunog ang pakpak ng batang gamo-gamo.

Sundin mo ang payo ng iyong panaginip, sabihin mo sa sarili mo na ang curiosity ay hindi magbubunga ng maganda. Kaya kung natutukso ka na alamin ang hindi mo pa alam, mararanasan mo ang hindi mo pa naranasan at tuklasin mo ang mga akala mong magbibigay sa iyo ng kaligayahan, pero naiisip mo ang mga ayaw ng papa mo na mangyari sa iyo, labanan mo ang curiosity.

Paano ba ‘yun? Siguro, ‘yan mismo ang tanong mo. Ang sagot— kapag ang tao ay nahaharap sa puwedeng magpahamak sa kanya, sure na maaalala niya na ang kanyang mga magulang at ilang malalapit at nagmamahal sa kanya na bawal at hindi maganda na gawin niya ang isang nakakatuksong bagay.

Hanggang sa muli,

Professor Seigusmundo del Mundo